NATIONAL NEWS

Aabot sa P58 milyong halaga ng shabu ang nasabat ng mga tauhan ng Bureau of Customs (BOC) katuwang ang Philippine Drug Enforcement Agency (PDEA), at NAIA-Inter-Agency Drug Interdiction Task Group sa Maynila.

Ayon sa mga otoridad, naharang ang naturang kargamento dahil sa kawalan nito ng dokumento na galing umano sa Nigeria at una nang idineklarang “pinatuyong pampalasa.”

Sa pahayag ng BOC, nakatago sa isang puting plastic bowl na isinilid sa kahon ng dried spices ang mga iligal na droga na may timbang na aabot sa 8.575 kilos.

Hawak na ngayon ng PDEA ang nasamsam na iligal na droga habang patuloy pang iniimbestigahan kung sino ang nasa likod ng pagpapadala ng kargamento papasok ng Pilipinas.

Iba’t-ibang uri ng pampasabog at mga war materials ang nasamsam ng mga otoridad sa Mount Nentingli, barangay Bagnen Proper, Bauko, Mountain Province.

Kasunod ito ng ikinasang joint operation ng mga tauhan ng Mt. Province Provincial Police Office sa isang inabandunang kampo ng Communist Terrorist Group (CTG).

Sa tulong ng pinagsanib puwersa ng Provincial Director ng MPPPO, 1st and 2nd Mountain Province Provincial Mobile Force Company Bauko Municipal Police Station, Provincial and Regional Intelligence Unit, Explosive Ordinance Disposal at Canine Group, ay naisagawa ng major internal security ang nasabing operasyon.

Nakuha sa operasyon ang isang homemade shotgun; 18 pcs na dinamita; stick commercial “nitron em 1500 emulsion explosive”; 20.5″ polyvinyl chloride o pvc pipe; 53 pirasong compact disc, 5 pirasong ibat-ibang klase ng dvd; at 1 pirasong 15 liter gallon na naglalaman ng gasolina.

Samantala, sa tulong din ng mga tauhan ng eod at k9 sniffing dog narekober din ang mga subersibong dokumento, ilang communication device, medicine kits, iba’t-ibang personal na gamit at improvised explosive device o ieds.

Sa ngayon, isinailalim na sa kaukulang disposisyon ang mga nakumpiskang armas at iba-ibang uri ng pampasabog.

Inihayag ni Department of Health (DOH) officer-in-charge Maria Rosario Vergeire, na hindi umano kinunsulta sa kanilang tanggapan ang pagluluwag sa pagsusuot ng facemask ng Cebu City Government.

Matatandaang naglabas si Cebu City Mayor Michael Rama ng kautusan sa hindi pag-oobliga sa kanilang mga residente hinggil sa paggamit ng face mask laban sa covid-19.

Ito ay makaraang umabot sa 110% ang vaccination rate ng lungsod at napatunayan na ring epektibo ang mga bakuna laban sa virus.

Ayon kay Vergeire, hindi maaaring magpatupad ng sariling ordinansa ang isang lugar sa ating bansa habang ang ibang lugar ay nagpapatuloy parin sa implementasyon ng pagsusuot ng face mask.

Naniniwala si Vergeire na maraming borders sa Pilipinas ang maaaring pasukan ng mga dayuhan mula sa ibang bansa kaya posibleng tumaas parin ang panganib ng hawaan ng covid-19.

Iginiit ni Vergeire na dapat magkaroon ng one-nation approach ang bansa at hindi ang kaniya-kaniyang desisyon kung saan, maari lamang magpatupad ng pagtanggal ng facemask sa pampublikong lugar, kung nakitaan ng adequate protection ang populasyon sa pamamagitan ng pagbabakuna.

Sinabi ni Vergeire na hahayaan nila sa Department of the Interior and Local Government (DILG) ang desisyon at paghawak sa naturang usapin.

Arestado ang 69 na indibidwal sa ikinasang one time big time operation ng mga otoridad sa ilang lugar sa Batangas.

Ayon kay Batangas Police Provincial Dir. Col. Pedro Soliba, nagkaroon ng implementasyon ng warrant of arrest sa iba’t-ibang lugar sa Batangas kung saan, sa mahigit 500 operasyon, 69 na most wanted persons ang natimbog sa regional level, provincial level maging sa city at municipal level.

Sinabi ni Soliba, na layunin ng naturang operasyon na mabawasan ang kriminalidad sa probinsya ng Batangas at matiyak ang kaligtasan ng publiko laban sa mga kriminal at iba pang sangkot sa mga ilegal na aktibidad.

Nangako naman si Soliba na kanilang ipagpapatuloy ang mga operasyon para sa kapayapaan at kaayusan ng bansa.

Hindi pa makumpirma ng Department of Health (DOH) kung mayroon nang local case ng Monkeypox virus sa bansa o wala.

Ayon kay DOH-OIC Maria Rosario Vergeire, hanggang ngayon ay hindi pa mabatid kung may nakasalamuhang foreign o ibang tao na galing sa ibang bansa ang naitalang pasyente.

Aniya, sa ay nanatili pa rin sa apat ang kaso ng Monkeypox sa bansa at wala pang bagong na-detect o nagpositibo base sa gianwang sample collection at testing.

Nabatid naman na walang sintomas na ipinakita ang close contact ng case no. 4 at natutuyo na rin ang mga lesion ng ika-apat na kaso ng naturang virus at patungo na sa recovery.

Bagama’t kailangan pa rin aniya nitong tapusin o kumpletuhin ang isolation period.

Pumasok na sa Philippine Area of Responsibility (PAR) ang super typhoon Hinnamnor na tatawagin sa local name na “Henry”.

Ayon sa PAGASA, alas-singko: trenta ng hapon kanina ng pumasok ang super typhoon.

Sa huling tala ng Weather Bureau, taglay ni “Henry” ang maximum sustained winds na 195 kilometers per hour at pagbugsong hanggang 240 kilometers per hour.

Una nang sinabi ng PAGASA, na maaari nitong makasanib ang bagyong Gardo, na magpapalakas sa habagat.

 Inihayag ng Department of Justice (DOJ) na agad nilang aaksyunan ang mga reklamo kaugnay sa mga suspek sa kidnapping incidents kapag inendorso ito sa kanilang ahensya.

 Ayok kay Justice Spokesperson Atty. Mico Clavano, sa kasalukuyan ay hinihintay nila ang resulta ng imbestigasyon ng Philippine National Police (PNP).

 Aniya, iniutos ni PNP Chief Police General Rodolfo Azurin Jr. ang imbestigasyon sa mga sasakyan na may improvised plate numbers.

Samantala, nagkasa na rin ang DOJ ng imbestigasyon sa mga ninakaw na sasakyan.

 Pinag-aaralan na ng Metropolitan Manila Development Authority (MMDA) ang adjustments na gagawin sa motorcycle lanes.

 Ito ayon kay MMDA Spokesperson Crisanto Saruca Jr. ay sa harap ng pagtaas ng bilang ng mga motorsiklo.

 Mababatid na noong 2021, una nang sinabi ng MMDA na kinokonsidera nito ang paglalaan sa rightmost lane ng Edsa para sa mga motorsiklo, ngunit naging Edsa busway ito noong, kung kaya’t kung saan-saang lane na lamang anila dumaraan ang mga motorsiklo.

Samantala, nakasaad sa 2018 MMDA regulation ang pagtatalaga ng non-exclusive motorcycle lanes sa iba’t-ibang daan gaya ng Edsa, Commonwealth, C5, at iba pa.