NATIONAL NEWS

 Inihayag ng Department of Budget and Management (DBM) na walang inilaang pondo para sa rehabilitasyon ng Bataan Nuclear Power Plant (BNPP).

 Ayon kay DBM Secretary Amenah Pangandaman, hindi nakasama ang nasabing planta sa pondong inilaan sa Department of Energy (DOE) na siyang may saklaw sa rehabilitasyon nito.

 Matatandaan na isa ang Bataan Nuclear Power Plant sa mga binanggit ni Pangulong Ferdinand Marcos Jr. sa kanyang State of the Nation Address (SONA) na nais niyang mapag-aralan upang magkaroon ng sapat na enerhiya sa bansa.

 Samantala, ang BNPP ay itinayo at nakumpleto noong 1984 subalit hindi nagamit at pinabayaang nakatengga sa loob ng mahigit apat na dekada dahil sa matinding pagtutol ng iba’t-ibang grupo.

Inanunsiyo ng Land Transportation Office (LTO) na nangunguna ang hindi pagsusuot ng seat belt sa traffic violation ng mga motorista noong nakaraang taon.

 Ayon kay Atty. Roberto Valera, Deputy Director at Spokesperson ng LTO Law Enforcement Service, ang Violation of the Seat Belts Use Act ang top traffic infraction mula 2016 at pawang mga public utility vehicle drivers ang karaniwang violators ng nasabing batas.

Nabatid na nakapagtala ang ahensya noong 2021 ng 110,399 violations sa seat belt law.

Samantala, nagpaalala naman ang opisyal sa publiko na requirement sa front-facing passengers ng Public Utility Vehicles (PUVs) at private vehicles ang pagsusuot ng seat belts.

Plano ng Department of Tourism (DOT) na papalitan ang “It’s More Fun in the Philippines” slogan ng bansa.

 Tinanong ni Zambales Representative Jefferson Khonghun si Tourism Secretary Christina Frasco sa deliberasyon ng House Commission on Appropriations kaugnay ng plano ng ahensya sa slogan nito.

 Sinabi naman ni Frasco na “under review” na ito, aniya, target ng DOT na lumikha ng slogan na magpapakita ng kasalukuyang sitwasyon ng bansa.

 Matatandaan na sinimulang gamitin ng DOT ang “It’s More Fun in the Philippines” slogan noong 2012 kapalit ng Wow Philippines.

Hindi nagbigay ng komento ang Malakanyang kaugnay sa inisyung executive order ni Cebu City Mayor Mike Rama na gawin nang boluntaryo ang pagsusuot ng face mask sa kanilang lalawigan maliban sa mga medical facilities.

Ayon kay Press Secretary Trixie Cruz-Angeles na nirerespeto nila ang mandato ng local government pero wala aniyang reaksyon ang pangulo kaugnay rito.

Dagdag pa nito na mas maiging hintayin na lang muna ang desisyon ng Department of Health (DOH).

Hangga’t wala aniyang reaksyon mula sa DOH ay wala ring maibibigay na statement ang Malakanyang.

Pinirmahan na ni Cebu City Mayor Michael Rama ang executive order na nagsasaad na hindi obligado o mandatory ang pagsusuot ng face mask sa Cebu City.

Ayon sa alkalde ito ay isang self-preservation and protection na maaaring magsuot ang isang indibidwal o hindi na magsuot ng naturang face mask.

Samantala sa mga may comorbidities naman, kinakailangan na mag stay at home at kapag lumabas naman ay kinakailangan na magsuot ng facemask.

Maliban dito, dapat pa rin magsuot ng face mask ang mga indibidwal na nasa ospital at clinic.

Habang ang iba naman ay maaari nang hindi magsuot ng facemask kapag nasa open areas lang.

Dahil dito, ang mga estudyante na nasa paaralan ay pwede nang hindi magsuot ng facemask pero depende sa regulation na ipatutupad ng Department of Education (DEPED).

Itinalaga na ni Pangulong Ferdinand Bongbong Marcos Jr. ang bagong opisyal sa Cybercrime Investigation and Coordinating Center (CICC) na nasa ilalim ng Department of Information and Communications Technology (DICT).

Ayon kay Press Secretary Trixie Cruz-Angeles itinalaga ni Pangulong Marcos Jr. si Alexander Ramos bilang bagong Executive Director 5 ng CICC.

Habang si Mary Rose Magsaysay naman ang in-appoint bilang New Deputy Executive-Director ng ahensya.

Kabilang din sa mga bagong naitalaga sa CICC para sa posisyong Director 4 sina Patricia May Abejo, Rojun Hosillos, at Alvin Miro Navarro.

Pumirma ng deal ang Commission on Higher Education (CHED) at ilang unibersidad na agad matatanggap ang mga estudyanteng apektado ng pagsasara ng Colegio de San Lorenzo (CDSL).

Ang mga paaralan namang tatanggap sa mga displaced students ay ang St. Joseph’s College ng Quezon City, Our Lady of Fatima University, College of St. Catherine Quezon City, NBS College, Villagers Montessori College, WCC-Aeronautical and Technological College North Manila, Siena College, Inc., Quezon City, AMA University at STI College Fairview.

Sinabi naman ni CHED Chairman Prospero de Vera na kailangan umanong pumirma ang mga partido ng memorandum dahil mayroong probisyon ng Manual of Regulations for Private Higher Education (MORPHE) ang na-waive sa pagtanggap ng nasa 700 displaced students.

Dagdag ni CHED Executive Director Cinderella Benitez-Jaro na ilang general provisions na posibleng ma-waive ng mga universities ay ang units na kailangang ma-credit para ang mga estudyanteng apektado ay makakapagtapos pa rin sa oras o hindi naman kaya ay makakatanggap.

Una nang sinabi ni CDSL Spokesperson Vix Dorado, na ang mga chekeng na-isyu na ay nasa 625 sa 652 college students.

Sa ngayon, ilang paaralan pa rin naman daw ang willing na kunin ang mga estudyanteng apektado sa pagsasara ng Colegio de San Lorenzo.

Pinakikilos na ng Office of Civil Defense (OCD) Cordillera ang mga Local Disaster Risk Reduction and Management Office (LDRRMO) sa rehiyon na maghanda na ng mga evacuation center.

Ito’y bilang paghahanda sa bagyong Gardo na nasa loob na ng Philippine Area of Responsibility (PAR) at ang super typhoon na Hinnamnor na kapag pumasok na sa PAR ay tatawaging bagyong Henry.

Pinasisiguro ni Edgardo Ollet, Officer in Charge ng OCD Cordillera na mayroong mga lugar na paglilikasan ang mga maapektuhang indibidwal.

Sinabi pa nito na dapat masunod ng maigi ang health protocols partikular na ang social distancing sa mga evacuation center.

Giit pa nito, upang maiwasan ang malaking pinsala, dapat maagang magkaroon ng paglilikas sa mga lugar na delikado sa pagguho ng lupa at pagbaha.

Kasunod nito nagpaalala ang OCD sa publiko na mag-ingat, mag-monitor sa lagay ng panahon at makinig sa abiso ng mga otoridad.

 Pansamantalang sinuspinde ang flight at ground operations sa Ninoy Aquino International Airport (NAIA) ngayong araw.

Ito ay matapos ideklara ng pagasa ang red lightning alert.

Inihayag ng Department of Transportation (DOTR) na itinaas ang red lightning alert bandang alas dies trentay dos ng umaga.

Ang pagsususpinde ng mga operasyon ay paghahanda para sa epekto ng tropical depression Gardo at super typhoon Hinnamnor.

Samantala, nasa labas pa rin ng Philippine Area of Responsibility (PAR) ang mga nabanggit na bagyo. - sa ulat ni Raoul Esperas (Patrol 45)

Hindi malayong tumigil na sa pamamasada ang marami sa mga tsuper ng pampublikong sasakyan kapag hindi napagbigyan o naaprubahan ang hirit nilang dalawang pisong taas pasahe.

Ayon kay Liga ng Transportasyon at Operators sa Pilipinas (LTOP) Pres. Lando Marquez, halos wala na aniyang kinikita ang mga kawawang tsuper dahil sa napakamahal na halaga ng produktong petrolyo.

Kaya kung di aniya mapagbibigyan ang kanilang kahilingan na fare increase, mapipilitan ang marami sa kanila na wag na munang pumasada.

Dagdag ni Marquez, sakaling di umayon sa kanilang panig ang magiging desisyon ng Land Transportation Franchising and Regulatory Board (LTFRB) ukol sa kanilang petisyon, agad aniyang magsasagawa ng pagpupulong ang kanilang hanay upang mapag usapan ang kanilang susunod na hakbang. –  sa ulat ni Jopel Pelenio (Patrol 17)