NATIONAL NEWS

Mahigpit na binabantayan ng National Disaster Risk Reduction and Management Council (NDRRMC) ang possibleng epekto sa Batanes ng bagyong Gardo at super typhoon Hinnamnor na kapag pumasok na sa Philippine Area of Responsibility (PAR) ay tatawaging bagyong Henry.

Sinabi ni Assistant Secretary Bernardo Rafaelito Alejandro IV, National Disaster Risk Reduction and Management Council (NDRRMC) Spokesperson at Office Civil Defense (OCD) Deputy Administrator for Operations, bagama’t hindi inaasahan magla-landfall ang dalawang bagyo, posibleng maranasan ang epekto ng bagyo sa Batanes at ilang bahagi ng Luzon.

At kung maaapektuhan ng dalawang bagyo ang habagat magdudulot ito ng pag-ulan sa central at western coast line ng Luzon.

Dahil dito, posible aniya na magtaas ng blue o red alert ang NDRRMC.

Pinaiimbentaryo na rin ng ahensya ang mga stockpile sa OCD warehouse sa rehiyon.

Samantala, tiniyak naman ni Alejandro na may sapat na suplay ng food at non-food items sa mga apektadong lugar at nakahanda na rin aniya ang quick response fund ng NDRRMC kung kakailanganin.  – sa ulat ni Gilbert Perdez (Patrol 13)

Pinaghahandaan na ng Department of Social Welfare and Development (DSWD) sa magiging epekto ng dalawang bagyo sa bahagi ng Hilagang Luzon.

Sinabi ni DSWD Asec. Romel Lopez, nakatakda silang magpulong ngayong araw para talakayin ang lahat ng paghahanda kabilang na ang pagpapadala ng tulong sa posibleng maapektuhan ng sama ng panahon.

Naglaan aniya sila nang nasa isa punto pitong bilyong pisong standby fund upang tugunan ang pangangailangan ng mga kababayan.

Maliban dito nakahanda na rin ang family food packs upang mabilis na makapag-abot ng tulong.

Samantala, ayon sa PAG-ASA, posibleng hindi lumapag sa kalupaan ang bagyo pero posibleng magdulot pa rin ito ng pagbaha dahil sa malakas na pag-ulan.

Nasunog ang isang bahagi ng isang restaurant sa Tomas Morato, Barangay South Triangle sa Quezon City.

Nangyari ang insidente pasado alas-3:00 kaninang madaling araw.

Sa imbestigasyon ng Bureau of Fire Protection (BFP), nagmula ang sunog sa exhaust vent ng kusina ng restaurant.

Hindi na umabot pa sa unang alarma ang sunog at wala namang nasugatan.

Sa ngayon ay wala pang inilalabas na pahayag ang pamunuan ng restaurant kaugnay sa insidente.

Naniniwala ang National Parents Teachers Association (NPTA) na maraming magandang maidudulot ang pagbabalik ng face-to-face classes ng mga mag-aaral.

Sa panayam ng DWIZ, sinabi ni NPTA President Willy Rodriguez na dahil dito ay bumalik ang social life ng mga estudyante.

Aminado si Rodriguez na mahirap talaga ang online classes ngunit dahil din aniya dito ay nagkaroon ng magandang koneksyon ang mga magulang, guro at mag-aaral.

Sinabi pa ni Rodriguez na dapat na magtuloy-tuloy ang in-person classes ng mga estudyante lalo’t bumababa na ang kaso ng COVID-19.

Aminado ang Department of Agriculture (DA) na nagkukulang narin ang suplay ng bawang sa bansa.

Ayon sa DA, inaasahang papalo sa 63,000 metric tons ng bawang ang posibleng kulangin ngayong taon.

Sa naging pagdinig ng House Committee on Agriculture and Food, sinabi ng ahensya na ang kabuuang suplay ng bawang sa bansa ngayong taon ay nasa 82,950 metrictons.

Sa datos ng ahensya, nasa 4,817 metric tons ang lokal na produksyon habang aabot sa 78,132 metric tons ang inangkat ng bansa at kabuuang 146,850 metric tons naman ang demand o kailangan na bawang sa bansa.