NATIONAL NEWS

Nagkasa ng on-the-spot verification sa mga sasakyan sa Ilocos Norte ang Philippine National Police (PNP).

Ito ay bilang pagtalima sa direktiba ni PNP Chief Gen. Rodolfo Azurin Jr., na magkasa ng crackdown laban sa mga ilegal na sasakyan sa loob ng Ilocos Norte Police Provincial Office Headquarters, Camp Captain Valentin San Juan sa Laoag City, Ilocos Norte sa tulong narin ng mga tauhan ng Provincial Highway Patrol Team.

Ayon kay Azurin, kanilang palalakasin ang kampanya laban sa anumang uri ng kriminalidad partikular na ang paghihigpit sa mga sasakyang walang plaka sa gitna ng mga insidente na kinasasangkutan ng mga puting van na ginagamit umano sa kidnapping.

Sinabi pa ni Azurin na mabisang paraanang pakikipag-ugnayan sa Land Transportation Office (LTO) para malabanan ang kriminalidad at mapalakas ang kampanya laban sa car theft.

Bukod pa dito, hinikayat din ng PNP ang publiko partikular na ang Ilokano community na ipagpatuloy ang kanilang pagsuporta at kooperasyon sa INPPO team at PNP sa lalawigan.

Pag-aaralan ng Malacañang ang joint exploration sa pagitan ng Pilipinas at China hinggil sa usapin ng West Philippine Sea (WPS).

Ayon kay Press Secretary Trixie Cruz-Angeles, kasunod ito ng reaksyon sa sinabi ni Chinese Minister Liu Jianchao, na nagpahayag ng pag-asa na isasaalang-alang ni Pangulong Ferdinand “Bongbong” Marcos Jr. ang joint exploration.

Umaasa si Jianchao, na magpapatuloy ang pakikipag-ugnayan at pakikipagtulungan ng dalawang bansa.

Matatandaang sa unang naging State of the Nation Address (SONA), sinabi ni Pangulong Marcos na hindi niya isusuko ang kahit isang pulgada ng teritoryo ng bansa sa ilalim ng kanyang pamumuno.

Nabatid na ang West Philippine Sea ay mayaman sa langis, gas at iba pang mapagkukuhanan ng enerhiya.

Umalis na sa Pilipinas ang halos kalahating porsyento ng Philippine Offshore Gaming Operators (POGOs) dahil sa mataas ng buwis na ipinataw ng Republic Act no. 11590.

Sa pagdinig ng Senate Committee on Games and Amusement sa House of Representatives kaugnay sa kinita ng PAGCOR, natanong ni Camarines Sur 2nd District Rep. Lray Villafuerte ang mga opisyal ng PAGCOR kaugnay sa isyu ng POGO sa buwis.

Dito na kinumpirma ng PAGCOR na mula sa 60 licensed operators ng POGO, bumaba na lang 30 ang aktibo dahil sa mataas na tax.

Una rito, naging paksa sa mga imbestigasyon at kontrobersiya ang POGO dahil sa pagiging konektado umano ng mga operasyon nito sa iligal na gawain.

Pansamantalang ipinatigil ng korte suprema ang pagpapatupad ng No Contact Apprehension Policy (NCAP) na kasalukuyang ipinatutupad ng limang lungsod sa Metro Manila.

Ito ay batay sa resolusyon na inaksyunan ng Supreme Court En Banc hinggil sa petisyon na inihain ng ilang grupo ng transportasyon na kinabibilangan ng Pasang Masda; Transportation Industry Reform Party Inc. (KAPIT); Alliance of Transport Operators and Drivers Association of the Philippines (ALTODAP); at Alliance of Concerted Transport Organizations.

Ayon kay Chief Brian Keith Hosaka ng Supreme Court Public Information Office, ang nasabing kautusan ay epektibo na sa lahat ng lungsod na nagpatupad ng NCAP.

Sinabi pa ni Hosaka na anumang ordinansa o programa na may kaugnayan sa NCAP ay ipinagbabawal hangga’t wala pang ibinababang order o kautusan mula sa korte suprema.

Nilinaw ni Department of Social Welfare and Development (DSWD) Secretary Erwin Tulfo na may appointment umano ang pagbisita ni dating Vice President at Angat Buhay Chairperson Leni Robredo sa kanilang ahensya kamakailan.

Ayon sa kalihim, kaniyang tinanggap ang naging appointment ni dating VP Leni bilang representative ng Angat Buhay.

Sinabi ni Tulfo na kanilang napag-usapan ang mga volunteers na tutulong sa DSWD para sa pag-aabot ng tulong sa mga malalayo at liblib na lugar.

Dagdag pa ng kalihim na pumayag sila na makausap ang dating bise presidente dahil ito naman daw ay boluntaryo at walang kolaborasyon na naganap sa pagitan ng DSWD at Angat Buhay.

Iginiit pa ni Tulfo na hindi sila nakikipag kolaborasyon sa mga foundation at wala ring ini-aalok ang angat buhay hinggil sa kumakalat na isyu sa social media kung saan, maari lamang silang tumanggap ng tulong kung ito ay boluntaryo at libre.

Inilabas ng Consumer Finance Company na Home Credit ang mga produktong madalas tangkilikin ng mga Pilipino para utangin.

Ayon kay Zdenek Jankovsky, Director at Treasurer ng Home Credit Philippines, nangunguna sa produktong ito ang laptop at bike na importante lalo’t Balik-Eskwela na ang mga mag-aaral.

Hindi naman nakikita ng Home Credit na may negatibong epekto sa kanila ang paghihigpit ng Bangko Sentral ng Pilipinas sa Monetary Policy.

Simula noong 2013, nakapagpautang na ang Home Credit ng P178 billion para sa halos 9 milyong Pilipino.

Inihayag ni dating Ifugao Rep. Teddy Baguilat, Jr. na may ilang mga grupo ang nagpaplanong maghain ng kaso laban sa mga umano’y nagpapakalat ng “fake news.”

Matatandaan na usap-usapan sa social media ang naging courtesy call ni dating Vice President Leni Robredo kay Department of Social Welfare and Development (DSWD) Secretary Erwin Tulfo noong Agosto 26 pero pinabulaanan agad ito ni VP Leni.

Sa inilabas na ‘Resibo’ ng Executive Director ng ‘Angat Buhay’ na si Raffy Magno, kanilang nilinaw ang umano’y fake news tungkol sa pagbisita ni dating Vice President at Angat Buhay Chairperson Leni Robredo sa DSWD kamakailan.

Sinabi ni Magno na mayroon silang sulat na nagre-request para magkaroon  umano sila ng meeting kasama si DSWD Secretary Erwin Tulfo pero imposible umano ang biglaang meeting maging ang mga walk-ins sa naturang tanggapan.

Sa kabila nito, muling idiniin ni Baguilat na mayroong grupo na nag-uusap para maghain ng kaso laban sa mga umano’y nagpapakalat ng fake news pero hindi naman nilinaw kung ano at kung sino ang grupo na nais umanong magsampa ng kaso.

Tatanggap ng 5,000 monthly allowance ang mga tauhan ng Manila Police District (MPD) mula sa Manila City LGUs.

Ayon sa pamahalaang lokal ng Maynila, inaasikaso na ng city administration ang lahat ng kakailanganing dokumento para agad na mailabas ang monthly allowance allotment ng MPD Police ngayong linggo.

Sa pahayag ni Manila City Mayor Honey Lacuna, nakikipag-ugnayan na siya sa iba pang mga ahensya at nakatutok din ang Manila LGUs sa mga regular stakeholder para matulungan at masuportahan ang mga adhikain ng lungsod.

Umaasa naman ang alkalde na masusuportahan ng mga manilenyo ang ibat-ibang programa para sa pagkakaisa at pagpapaganda ng Maynila.