NATIONAL NEWS

Pangungunahan ng Department of Foreign Affairs sa halip na ang Department of Migrant Workers ang paghawak sa kaso ni Mary Jane Veloso, ang pinay na nasa death row sa Indonesia dahil sa drug-related case.

Ito ang nilinaw ni Migrant Workers secretary Susan Ople sa gitna ng pagbisita sa Indonesia ni Pangulong Bongbong Marcos.

Ipinunto ni Ople na DFA ang mas naka-aalam ng estado ng kaso at mas mahalagang magkaroon ng isang boses para sa napaka-sensitibong issue.

Nito lamang Biyernes ay nagpadala ng liham ang mga magulang ni Veloso kay Pangulong Marcos, sa pamamagitan ng DMW, upang hilingin na iuwi na si Mary Jane.

Gayunman, inihayag ng Kalihim na ipinasa na niya sa DFA ang naturang liham at nakipag-usap na rin siya kay Foreign Affairs secretary Enrique Manalo at kabilang sa tinalakay ang kaso ni Veloso.

Umaasa naman si Ople na bubuksan ni Secretary Manalo ang nasabing issue kay PBBM.

Bahagya muling tumaas sa 24,067 ang mga kaso ng COVID-19 sa bansa kahapon kumpara sa 23,571 noong Sabado.

Ito’y makaraang makapagtala ang Department of Health ng karagdagang 2,321 COVID-19 cases dahilan upang sumampa naman sa 3,891,318 ang total case load.

Gayunman, ito na ang ika-8 sunod na araw na mas mababa sa 30,000 ang aktibong kaso ng COVID-19.

Umakyat naman sa 3,805,340 ang recoveries habang nasa 62,011 na ang death toll matapos madagdagan ng 49.

Nangunguna pa rin ang Metro Manila sa mga rehiyong may pinaka-maraming COVID infections o 9,564 sa nakalipas na dalawang linggo; sinundan ng CALABARZON, 4,611 at Central Luzon, na may 3,064.

Tinapos na ng Kamara ang pagdinig para sa mahigit P9-B budget ng Office of the President (OP) para sa susunod na taon.

Pinasalamatan ni Executive secretary Victor Rodriguez ang kamara sa kanilang ibinigay na suporta hinggil sa P9.03 billion na pondo para sa OP.

Tinitiyak naman ni Rodriguez na makikipagtulungan ang gobyerno sa lehislatura o ang pagpupulong sa paggawa ng mga batas, pagtaguyod ng pampublikong interes at pagbuo ng maayos na pamamahala sa bansa.

Ayon kay Rodriguez sa kabuuang bilang ng budget, P6.87 billion dito ay ilalaan para sa maintenance at iba pang operating expenses; P1.501 billion, mapupunta sa personnel services habang mapupunta naman sa capital expenditures o capital outlay ang natitirang ang P590, 794,000.

Ang pag-apruba sa motion to terminate ay nagpapakita na mag-eendorso muli ng panukalang budget sa plenaryo para sa isa pang pagdinig.

Asahan na magiging maulap ang kalangitan na may kalat-kalat na pag-ulan, pagkulog at pagkidlat sa bahagi ng Palawan, at Ilocos Region bunsod parin ng Southwest monsoon o Hanging habagat.

Ayon kay PAGASA weather specialist Obet Badrina, malaki pa rin ang tiyansa ng mga pag-ulan sa bahagi ng Luzon partikular na sa hapon hanggang sa gabi.

Makakaranas parin ng isolated rain showers o pulu-pulong mga pag-ulan, pagkulog at pagkidlat sa hapon hanggang sa gabi ang nalalabing bahagi ng bansa lalo na sa Central Luzon, sa bahagi ng Bicol Region, Southern Luzon, kasama na ang Metro Manila, at Cordillera Administrative Region (CAR) pero asahan ang mainit na temperatura sa umaga hanggang sa tanghali.

Magiging maulap naman ang kalangitan sa Visayas at may malaking tiyansa ng mga pag-ulan dahil pa rin sa hanging habagat at Inter-Tropical Convergence Zone (ITCZ).

Posible ding ulanin ang bahagi ng Eastern Mindanao dala ng ITCZ o ang pagsasalubong ng hangin mula sa magkaibang hemisphere o ang hangin na nagmumula sa Pacific Ocean.

Magkakaroon naman ng pulu-pulong pag-ulan sa natitirang bahagi ng Mindanao lalo na sa hapon hanggang sa gabi.

Samantala, patuloy paring paalala ang pagasa ang palagiang pagdala ng payong at iba pang panangga sa biglaang pagbuhos ng ulan at matinding sikat ng araw.

Agwat ng temperatura sa Metro Manila ay maglalaro sa 25°C hanggang 32°C habang sisikat naman ang haring araw mamayang 5:44 ng umaga at lulubog naman ito mamayang 6:05 ng hapon.