NATIONAL NEWS

Nakapagtala na ang Department of Health (DOH) ng mahigit 1,400 na kaso ng leptospirosis ngayong taon.

Batay sa datos, umakyat na sa 1,462 ang leptospirosis cases sa bansa mula Enero 1 hanggang Agosto 13.

17% itong mataas kumpara sa 1,249 cases na naitala sa kaparehong panahon noong 2021.

Nabatid na karamihan sa mga kaso ay nagmula sa Metro Manila na may 274 leptospirosis cases.

Sinundan ito ng Cagayan Valley at Western Visayas, na kapwa mayroong 174 na kaso; Central Visayas, 118; Davao Region 115; at Central Luzon na may 112 cases.

Pumalo naman sa 203 ang naitalang nasawi dahil sa leptospirosis, kung saan mas mataas ito ng 13.9% sa naitalang 131 cases noong 2021.

Aabot na sa kabuuang 1,491 na mga indibidwal o katumbas ng 494 na mga pamilya ang naapektuhan ng Bagyong Henry.

Ayon sa National Disaster Risk Reduction and Management Council, nagmula ang mga ito sa 16 na mga barangay sa Ilocos, Cagayan, Central Luzon, at Cordillera.

Tatlong pamilya ang nanunuluyan sa mga evacuation centers habang nasa 140 indibidwal o 32 pamilya ang nananatili sa labas ng evacuation centers.

Pitong kabahayan naman ang nasira sa Cordillera habang pitong kalsada at isang tulay sa Ilocos at Cordillera ang hindi pa rin madaanan ng mga motorista.

Nananatili naman sa isa ang bilang ng nasawi sa Bagyong Henry, na naitala sa Ilocos.

Tatakbo ng 9 hanggang 12 buwan ang pilot operation ng Automated Fare Collection System.

Ayon kay Transportation Undersecretary Timothy John Batan, kapag nagtagumpay ang pilot implementation, tatanggap pa ang sistema ng mas maraming payment cards maliban sa Landbank of the Philippines at masasakop ang mas maraming PUV units at ruta.

Sinabi ni Batan na uubra pa rin namang magbayad ng cash ang mga pasahero kung wala silang payment cards.

Sa ngayon aniya ay tanging ang Landbank prepaid at credit contactless cards ang tinatanggap sa 150 kasaling PUVs sa bansa sa ilalim ng pilot run.

Nasa Indonesia na si Pangulong Bongbong Marcos Jr., para sa kanyang tatlong araw na state visit.

Ayon kay Pangulong Marcos, nakatakda silang magpulong ni Indonesian president Joko Widodo at sasaksihan ang paglagda ng ilang agreement kaugnay sa defense, security, creative economy at culture.

Umaasa rin si PBBM, na tumatayong Kalihim ng Department of Agriculture, na maka-e-engganyo ang Pilipinas ng Indonesian investors sa agriculture at energy sector.

Gayunman, hindi bibisitahin ni Pangulong Marcos ang filipina death row convict na si Mary Jane Veloso.

Matapos ang pagbisita sa Indonesia, nakatakda ring bumiyahe ang Punong Ehekutibo sa singapore bukas.

Ilang kasunduan din sa nasabing pagbisita ang nakatakdang lagdaan.

Humihirit ang isang Transport group ng dayalogo sa Land Transportation Franchising and Regulatory Board (LTFRB) upang talakayin ang mga petisyon sa kanilang hiling na dagdag-pasahe sa jeep.

Dos pesos na fare hike ang hiling ng Liga ng Transportasyon at Operators sa Pilipinas (LTOP) maging ng Federation of Jeepney Operators and Drivers Association of the Philippines.

Ito’y dahil sa walang-prenong pagtaas ng presyo ng mga produktong petrolyo sa kabila ng minsanang pagpapatupad ng rollback.

Ayon sa LTOP, nasa kamay na ng LTFRB ang pagpapatupad ng win-win solution para sa lahat ng stakeholders.

Bukod sa mga jeepney operator, humihiling din ang bus operators ng increase ng 4 pesos para sa ordinary trip habang 7 pesos para sa air-conditioned trip.

Bagaman nagpatupad ng bigtime price hike ang mga kumpanya ng langis noong isang linggo, biglang kambyo naman ang mga ito ng bigtime ding rollback na ilalarga bukas.

Una nang inihayag ng LTFRB na nakatakda itong maglabas ng desisyon sa fare hike petitions ng mga transport group ngayong buwan.

Naniniwala ang isang ekonomista na hindi pa napapanahon na itigil ng gobyerno ang pamamahagi ng ayuda.

Sa panayam ng DWIZ, sinabi ni Astro Del Castillo, Economic Analyst at UP Professor, na hindi pa tapos ang COVID-19 pandemic at hindi pa lahat nakakarekober mula sa epekto nito.

Maliban dito, lahat aniya ay tinatamaan ng pagtaas ng presyo ng mga bilihin at langis.

Matatandaang iginiit ni Finance Secretary Benjamin Diokno na dapat nang ipatigil ng pamahalaan ang pamamahagi pandemic cash assistance at sa halip ay ituloy na lang ang tulong sa mahihirap at senior citizens.

Nagbigay naman ng payo sa publiko si Del Castillo kaugnay sa tamang paggasta.

Tinitimbang pa ni Pangulong Bongbong Marcos ang mga isyung bumabalot sa Executive Order sa Cebu City hinggil sa boluntaryong pagsusuot ng face masks.

Ayon kay Press secretary Trixie Cruz-Angeles, hinihintay pa ni Pangulong Marcos ang developments sa isinasagawang intervention ng Department of Interior and Local Government.

Una nang inihayag ni Interior secretary Benhur Abalos na pumayag ang Cebu City Local Government na ipagpaliban ang implementasyon ng naturang kautusan.

Gayunman, nilinaw ni Cebu City Mayor Mike Rama na nilagdaan na niya ang Executive Order.

Iginiit naman ng Department of Health na magiging mas mahirap ang pag-control sa COVID-19 pandemic kung magkakaroon ng magkakaibang protocols sa iba’t ibang panig ng bansa.