NATIONAL NEWS

Pinabulaanan ng Department of Health (DOH) na nagbibigay sila ng expired doses ng booster shot.

Ipinapliwanag ni Health Officer-in-Charge Maria Rosario Vergeire na ang iba sa mga bakuna ay may “extended shelf life” at kapag pinalawig ng manufacturers ang shelf life ng mga bakuna ibig sabihin ay mabisa at ligtas pa rin ang mga ito.

Aminado naman si Vergeire na nagkaroon ng naturang isyu dahil ang mga bakuna na nagkaroon ng extended shelf life ay hindi napalitan ang labels.

Aniya, marami sa mga manufacturer ang huminto na sa produksyon kung kaya sertipiko kung saan nakalagay na na-extend ang shelf life lamang ang mayroon sila.

Inihayag ni Pangulong Ferdinand Marcos Jr. na parang nasa Pilipinas lamang din siya matapos ang inihandang arrival honors sa kanya ni Indonesian President Jojo Widodo sa Jakarta kaninang umaga.

 Ayon sa pangulo, kaya pinili niya ang Indonesia na unang bisitahin ay dahil sa halos magkaparehong kultura nito at ng Pilipinas.

 Mababatid na bahagi ng naging aktibidad ng punong ehekutibo ang pagtatanim ng puno sa hardin ng Bogor Palace kasama si First Lady Liza Araneta-Marcos at nilagyan ng kanyang pangalan ang signage na inaasahang yayabong sa mga darating na araw.

 Nagpapasalamat naman ang pangulo kay Widodo dahil sa mainit na pagtanggap sa kanya at naniniwala ang presidente na hindi siya nagkamali sa kanyang unang binisitang bansa upang mas lalo pang mapagtibay ang magandang uganayan ng Pilipinas at Indonesia.

Nakapagtala ng mahigit 650 karagdagang kaso ng COVID-19 Omicron subvariants ang bansa.

 Batay sa pinakahuling datos ng Department of Health (DOH), nasa 624 ang bagong kaso ng Omicron BA.5, 13 kaso ng BA.4, isang kaso ng BA.2.12.1 at 18 ang “other sublineages.”

 Sa nasabing bilang ng BA.5 cases, 134 dito ay naitala sa metro manila, 119 sa Cordillera Administrative Region (CAR) at 61 sa Calabarzon.

 Na-detect naman ang 11 kaso ng BA.4 sa Soccsksargen habang tag-isa sa Central Luzon at Visayas habang sa Central Luzon din naitala ang isang kaso ng BA.2.12.1

 Ayon sa DOH, ang naturang resulta ay mula sa latest sequencing na isinagawa noong September 2.

Sinelyuhan ng Pilipinas at Indonesia ang apat na kasunduang may kinalaman sa ekonomiya, kultura at defense.

Kasunod na rin ito ng state visit ng Pangulong Ferdinand “Bongbong” Marcos, Jr. sa Indonesia.

Kabilang sa mga nasabing kasunduan ang: plan action sa pagitan ng gobyerno ng Pilipinas at Indonesia mula 2022 hanggang 2027, Memorandum of Understanding sa pagitan ng dalawang bansa hinggil sa cultural cooperation.

Bukod pa ito sa:  kasunduan sa cooperative activities sa  aspeto ng defense and security sa pagitan ng dalawang bansa at Memorandum of Understanding for Cooperation para sa development and promotion ng creative economy sa pagitan ng Indonesia at Pilipinas.

Ayon sa Pangulong Marcos, mahaba ang naging pag uusap nila ni Indonesian President Joko Widodo hinggil sa dapat na maging papel ng ASEAN sa mga hamong kinakaharap may kinalaman sa geopolitics hindi lamang sa rehiyon kundi maging sa iba pang bahagi ng mundo.

Nagpasalamat din si PBBM sa Indonesia sa pagtulong nito sa infrastructure programs ng nakalipas na Duterte administration gayundin sa patuloy na commitment ng bansa hindi lamang sa mga programang ito kundi para mapalakas at mapaganda pa ang relasyon ng dalawang bansa.

Anim na raang nurse mula sa pilipinas ang kailangang i-hire ng Germany para sa partner hospital at elderly care centers nito.

Sa ilalim ng Triple Win Project (TWP) ng Germany at gobyerno ng Pilipinas, sinabi ng embahada nito na nag-umpisa nang tumanggap ang Department of Migrant Workers (DMW) ng aplikasyon mula sa mga registered Filipino nurses na may kahit isang taong professional experience sa ospital, rehabilitation center at care institution o private duty nurse.

Nabatid na nag-deploy ang gobyerno ng Germany ng mga nurse sa major parner hospitals nito.

Ilan sa mga nasabing nurse ay na-promote na sa mas mataas na posisyon habang ang iba ay ipinursige ang academic studies parasa kanilang career.

Walang shortage sa suplay ng tamban sa merkado.

Ito ang nilinaw ni Bureau of Fisheries and Aquatic Resources (BFAR) Spokesperson Nazario Briguera na nasa mahigit 200% at 400% ang sufficiency levels ng tamban para sa first at second quarter.

Ayon sa tagapagsalitaa, ibe-verify nila ang napaulat na kakulangan ng nasabing isda sa market.

Sa kabila nito, sinabi ni Briguera na posibleng ang hindi magandang lagay ng panahon at aktibidad sa pangingisda ang nakaapekto sa suplay ng tamban.

Malaki ang maitutulong ng anumang economic agreement na malalagdaan sa mga bansang pupuntahan ni Pangulong Ferdinand Marcos Jr., partikular na sa Indonesia.

Ayon kay Employers Confederation of the Philippines (ECOP) President Sergio Ortiz-Luis, itinuturing na kabilang sa malalakas na bansa sa ASEAN ang Pilipinas at Indonesia kaya magandang development ang mapipirmahan nilang kasunduan pagdating sa investment at trade.

Pero umaasa si Luis, na kasama sa agreement na mapagkakasunduan ng dalawang bansa ang mga solusyon sa natitirang mga problemang kinakaharap sa investment at trade ng mga investor.

Inihayag din ng ECOP na pagdating sa mga economic deals ay talagang napag iiwanan ang Pilipinas kung ikukumpara sa ibang mga kaalyadong bansa, na nasa lima hanggang anim na ang kanilang mga nalagdaang developmental agreement.

Paliwanag ni Luis na nahuhuli aniya ang bansa sa bagay na ito dahil hanggang sa ngayon nasa dalawa pa lamang ang investment at trade deal na pinapasok ng ating pamahalaan. —sa ulat ni Jopel Pelenio (Patrol 17)

Pinawalang bisa ng Court of Appeals (CA) ang arrest warrant na inisyu nuong November 2019 laban sa nakakulong na aktibistang si Reina Mae Nasino at dalawang iba pang kasamahan nito.

Kasunod na rin ito nang pagpabor ng Appellate Court sa Petition for Certiorari na isinampa ni Nasino, Ram Carlo Bautista at Alma Moran laban kay Manila RTC Judge Marivic Balisi-Umali at ibinasura ang search warrants na inilabas ni QC RTC Judge Cecilyn Burgos-Villavert.

Ayon sa CA, nakagawa ng Grave Abuse of Discretion si Balisi-Umali nang pabiran ang validity ng search warrants na naka-address sa tatlong magkakaibang lugar.

Binigyang diin pa ng Appellate Court na walang probable cause na pinagbasehan ang pag i isyu ng search warrants.

Magugunitang nanganak si Nasino habang nakakulong subalit namatay din si Baby River makalipas ang tatlong buwan o October 2020 nang ma diagnose ito ng pneumonia.