NATIONAL NEWS

Nakarating na ng Pilipinas si Pangulong Ferdinand “Bongbong” Marcos Jr., matapos ang anim na araw na working visit sa New York, America.

Kasamang bumalik ng bansa ni Pangulong Marcos ang kaniyang mga gabinete bago pa man maglandfall ang bagyong karding sa bahagi ng Luzon partikular na sa Metro Manila.

Ibinahagi ng Pangulo ang kaniyang naging pagharap sa United Nations General Assembly (UN-GA) maging ang kaniyang pakikipag-pulong kay UN Secretary General Antonio Guterres, at iba pang international leaders maging ng mga investor.

Sa naturang pagpupulong, ipinakita din ni PBBM ang kaniyang interes pagdating sa pagpapalawak ng UN peace keeping operations partikular na ang mga lugar sa Middle East at North Africa kung saan madalas nagtatrabaho ang nasa mahigit 2.2 million Overseas Filipino Workers (OFWs).

Ang peace keeping operations ay isang joint effort ng mga miyembrong bansa ng UN na tumutulong sa mga bansang may sigalot upang mapanatili at mapalakas ang seguridad ng bansa at layunin din nitong maprotektahan ang mga sibilyan.

Ibinaba na sa 2^nd level o Second alarm ang ilang lugar sa Marikina City matapos bumaba sa 17.9 meters ang water level ng Marikina River bunsod pa rin sa pag-ulan dulot ng bagyong Karding.

Sa official facebook page ng Marikina Public Information Office (PIO), nakaantabay parin ang mga emergency equipment ng lokal na pamahalaan na gagamitin sakaling maapektuhan ng pagbaha ang ilang lugar sa lungsod.

Apektado rin ang ilang lugar sa Marikina partikular na ang brgy. Malanday, Tumana, Barangka, Tañong, Nangka, Sto. Niño, Sta. Elena, Calumpang at iba pang bahagi ng lungsod.

Sa ngayon, nanatili pa ring bukas ang walong gate sa Manggahan Floodway, Pasig City habang ibinaba na sa Tropical Cyclone Wind Signal (TCWS) no. 1 ang ilang lugar sa National Capital Region (NCR) partikular na sa Marikina City.

Patuloy namang nagpapaalala ang Marikina LGUs sa mga residente na doblehin ang pag-iingat at panatilihing maging alerto para sa kaligtasan ng bawat isa.

Bumaba na sa 20.99 meters ang level ng tubig sa Batasan Bridge pero nananatili parin sa critical level o 3^rd alarm ang ilang lugar sa San Mateo Rizal.

Ayon sa San Mateo Rizal Public Information Office (PIO), nakataas pa rin ang forced evacuation sa ilang lugar ng San Mateo Rizal bunsod ng patuloy na pag-ulan na may malalakas na hanging dala ng bagyong Karding.

Apektado parin ang ilang lugar sa San Mateo Rizal, kabilang na ang Banaba, Malanday at Guinayang Gravel Pit, Maly Sitio Ibayo, Sta Ana, Ampid 1 at 2, Dulong Bayan 1 at 2, Guitnang Bayan 1 at 2.

Wala namang naitalang untoward incident at nadadaanan parin sa ngayon ang mga pangunahing kalsada sa mga nabanggit na lugar pero umabot hanggang gutter deep ang tubig baha sa Secondary Road ng Barangay Malanday.

Sa ngayon, pinag-iingat at pina-a-alerto ng lokal na pamahalaan ang mga residente sa mga nabanggit na lugar para sa kanilang kaligtasan.

Kanselado ang ilang flights sa mga paliparan bunsod ng pananalasa ng bagyong Karding.

Ayon sa pamunuan ng Airswift Regional Airline, nagsimula na silang magkansela ng mga biyahe kahapon partikular na ang Davao-Manila PR 2808 ngayong araw.

Samantala, pahayag naman ng Philippine Airlines (PAL), ilang flights din mula sa Japan ang naantala ng lima hanggang anim na oras kabilang na ang mga paliparan sa Tokyo Haneda, Fukuoka, Osaka, Kansai at Tokyo Narita dahil pa rin sa nararanasang mga pag-ulan na dala ng bagyong Karding.

Bukod pa dito, kanselado din ang iba pang international at domestic flights ng PAL kaya pinapayuhan muna ang mga pasahero na tumawag sa kanilang mga airline o bisitahin ang kanilang official website para sa karagdagan pang impormasyon.

Itinaas na sa 3^rd alarm ang ilang lugar sa Marikina City, makaraang umakyat sa 18.4 meters ang water level sa Marikina River dahil parin sa pag-ulan dulot ng bagyong Karding.

Sa official facebook page ng Marikina Public Information Office (PIO), nakaantabay na ang mga emergency equipment na gagamitin sakaling maapektuhan ng pagbaha ang ilang lugar sa lungsod.

Apektado ang ilang lugar sa Marikina partikular na ang brgy. Malanday, Tumana, Barangka, Tañong, Nangka, Sto. Niño, Sta. Elena, Calumpang at iba pang bahagi ng lungsod.

Samantala, nanatili pa ring bukas ang walong gate sa Manggahan Floodway, sa Pasig City habang nananatili parin sa Tropical Cyclone Wind Signal (TCWS) no. 3 ang ilang lugar sa National Capital Region (NCR) partikular na sa Marikina City.

Patuloy namang nagpapaalala ang Marikina LGUs sa mga residente na doblehin ang pag-iingat at panatilihing maging alerto para sa kaligtasan ng bawat isa.

Pumalo na sa 10 barangay ang bilang ng mga apektadong residente bunsod ng bagyong Karding sa San Mateo Rizal.

Ito ay matapos pumalo sa 21.58 meters ang lebel ng tubig sa Batasan Bridge.

Ayon sa San Mateo Rizal Public Information Office (PIO), nasa kabuuang 850 na apektadong pamilya o katumbas ng 3,760 na indibidwal ang nagsilikas sa mga covered court bunsod ng nararanasang patuloy na pag-ulan na dala ni bagyong Karding at Hanging Habagat.

Kabilang sa mga apektadong residente na lumikas ang 221 pamilya sa brgy.  Sta Ana; 273 na pamilya sa brgy. Maly; 9 na pamilya sa brgy. Malanday; 24 na pamilya sa brgy. Guinayang; 71 na pamilya sa brgy. Dulong Bayan 1; isang pamilya sa brgy. Dulong Bayan 2; 33 sa brgy. Banaba; 7 sa brgy. Guitnang Bayan 1; 16 sa brgy. Guitnang Bayan 2; 32 sa brgy. Ampid 1; at 73 naman sa brgy. Ampid 2.

Samantala, naglabas naman ng emergency hotline ang pamahalaang loka ng San Mateo Rizal sakaling magkaroon ng anumang untoward incident ay tumawag lang sa mga numerong: (02) 8297-8100 local 129-131.