NATIONAL NEWS

Agad sumabak sa trabaho si Pangulong Bongbong Marcos at nakipag-ugnayan sa mga miyembro ng kanyang gabinete na direktang kabilang sa tumututok sa sitwasyon kaugnay sa epekto ng Typhoon Karding.

Ito’y kahit may jet lag pa dahil sa kanyang anim na araw na working visit sa Estados Unidos.

Ayon kay PBBM, patuloy ang kanyang pakikipag-ugnayan kay Defense secretary Jose Faustino Jr., na chairman ng NDRRMC secretaries Erwin Tulfo ng DSWD at Renato Solidum ng DOST.

Magugunitang ipinag-utos ng Pangulo ang suspensyon ng trabaho sa lahat ng government offices at klase sa mga pampublikong paaralan sa NCR at pitong iba pang rehiyon.

Ikinasa ng Department of Education ang kinakailangang adjustments sa anito’y learning delivery dahil sa suspensyon ng klase.

Para maabot ang learning competencies, ipinabatid ng DepEd na dapat magpatupad ng make-up classes, modular distance learning, performance tasks at projects.

Sinabi pa ng DepEd na dapat ding ikunsidera ang attendance at completion ng learning tasks ng mga estudyante dahil sa suspensyon ng klase dulot ng bagyo at iba pang-kalamidad.

Mayruon naman anitong responsibilidad ang mga magulang para tutukan ang mga anak nila na makatapos sa mga itinakdang proyekto.

Kasabay nito, sakaling walang anunsyo ng suspensyon ng klase sa isang lugar, inihayag ng DepEd na bahala na ang magulang o guardian kung papasukin ang estudyante batay na rin sa physical at mental health nito.

Aabot na sa 2,500 pasahero, drivers at cargo helpers ang hindi pinayagang makabiyahe dahil sa bagyo Karding.

Ayon sa Philippine Coast Guard, 39 na rolling cargoes, 18 vessels at 15 motorbancas ang stranded hanggang kahapon.

Kabilang sa mga apektado ang mga pasahero sa mga pantalan sa southern tagalog at Bicol regions.

Hindi pinayagan ng PCG na makapaglayag ang mga sasakyang-pandagat dahil sa naglalakihang alon.

Suspendido na ang expanded Number Coding Scheme sa Metro Manila ngayong araw.

Ito ang inanunsyo ng MMDA alinsunod sa direktiba ni acting chairman Carlo Dimayuga III dahil sa sama ng panahon na dulot ng bagyong Karding.

Unang nag-landfall ang bagyo sa Burdeos, Quezon dakong ala 5:30 kahapon na sinundan ng ikalawang landfall sa bahagi ng Dingalan, Aurora pasado alas-8 kagabi.

Karagdagang 3,520 COVID-19 cases ang naitala ng Department of Health kahapon.

Ito na sa ngayon ang pinaka-mataas na cases sa nakalipas na anim na araw at naitala matapos ang tatlong sunod na araw na mas kaunti sa 2,000 ang bagong infections.

Tumaas din sa 35,399 ang aktibong kaso kumpara sa 32,323 noong Sabado o ikatlong sunod na araw namang nakapagtala ng mahigit sa 30k active cases.

Lumobo naman sa 3,938,203 ang total case load kabilang ang 3,840,041 recoveries habang nadagdagan ng 31 ang death toll kaya’t sumampa na sa 62,790 ang namatay.

Nangunguna pa rin ang National Capital Region sa may pinaka-maraming kaso sa nakalipas na dalawang linggo na 13,808; sinundan ng CALABARZON, 5,054 at Central Luzon, 2,804.

Nakarating na ng Pilipinas si Pangulong Ferdinand “Bongbong” Marcos Jr., matapos ang anim na araw na working visit sa New York, America.

Kasamang bumalik ng bansa ni Pangulong Marcos ang kaniyang mga gabinete bago pa man maglandfall ang bagyong karding sa bahagi ng Luzon partikular na sa Metro Manila.

Ibinahagi ng Pangulo ang kaniyang naging pagharap sa United Nations General Assembly (UN-GA) maging ang kaniyang pakikipag-pulong kay UN Secretary General Antonio Guterres, at iba pang international leaders maging ng mga investor.

Sa naturang pagpupulong, ipinakita din ni PBBM ang kaniyang interes pagdating sa pagpapalawak ng UN peace keeping operations partikular na ang mga lugar sa Middle East at North Africa kung saan madalas nagtatrabaho ang nasa mahigit 2.2 million Overseas Filipino Workers (OFWs).

Ang peace keeping operations ay isang joint effort ng mga miyembrong bansa ng UN na tumutulong sa mga bansang may sigalot upang mapanatili at mapalakas ang seguridad ng bansa at layunin din nitong maprotektahan ang mga sibilyan.