NATIONAL NEWS

Nag-alsa-balutan ang Pangulo ng Madagascar na si Andry Rajoelina sa gitna ng malawakang protesta na pinangunahan ng mga Gen Z ng naturang bansa.

Ito’y ayon kay Malagasy Parliament Opposition Leader Siteny Randrianasoloniaiko matapos bumaliktad ang militar upang suportahan ang mga nagpo-protesta.

Ayon kay President Rajoelina, umalis siya ng bansa upang maprotektahan ang kanyang sariling buhay, ngunit hindi niya sinabi kung saang bansa siya pumunta.

Ngunit sinabi naman ng ilang Malagasy military sources na lulan ng isang French military aircraft si Rajoelina, at hindi pa kinukumpirma ni French President Emmanuel Macron kung tinulungan ng kanyang bansa ang Pangulo ng Madagascar na tumakas mula sa galit ng mga nagpo-protesta.

—sa panulat ni Anjo Riñon

Itinurn-over na ng Department of Justice sa Office of the Ombudsman ang mga dokumento o kaso hinggil sa palpak na flood control projects.

Kabilang sa mga inirereklamo rito ay mga contractor at DPWH official mula sa Bulacan 1st District na sina Henry Alcantara, Brice Ericson Hernandez, Aryjay Domasig, Jaypee Mendoza, Niño Lawrence Morales, Juanito Mendoza, Floralyn Simbulan, Christina Mae Pineda, at Sally Santos.

Sa ngayon, wala pang legislator o mga mambabatas ang kasama sa mga nakasampa ngayon dahil sinabi ni Ombudsman Jesus Crispin Remulla na simula pa lamang ito at masusundan pa ito sa mga susunod na araw.

Lumabag ang mga nabanggit na pangalan sa Article 217 na may kaugnayan sa Revised Penal Code, partikular na ang malversation through falsification.

Gayunman, nilinaw ni Acting Justice Secretary Eric Vida na ito ay referral ng kanilang imbestigasyon katuwang ang NBI at Deputy Investigators and Prosecutors’ System.

Inihahanda na rin anya ng Ombudsman ang mga malalaking kaso.

Tumaas sa 78 percent ang scam calls sa bansa nitong ikatlong quarter ng 2025.

Batay ito sa pinakahuling Whoscall Scam Report ng Gogolook, isang global TrustTech company na siyang developer ng anti-scam application na Whoscall.

Sa datos ng kumpanya, umabot sa 62,390 scam calls ang naitala mula noong Hulyo hanggang Setyembre — mas mataas kumpara sa 34,964 noong nakaraang quarter.

Gayunman, mas mababa pa rin ito ng 62.24 percent kumpara sa 165,236 scam calls na naitala sa kaparehong panahon noong 2024.

Samantala, patuloy naman ang pagbaba ng mga scam text messages, na bumaba ng 42.17 percent mula 65,035 noong ikalawang quarter tungo sa 37,609 ngayong quarter.

Katumbas ito ng 97.71 percent year-on-year decrease mula sa mahigit 1.6 milyong SMS scams na naitala noong 2024.

Dahil dito, hinikayat ni Cybercrime Investigation and Coordinating Center (CICC) Acting Executive Director Usec. Renato “Aboy” Paraiso ang publiko na manatiling mapagmatyag at agad i-report ang anumang tangkang panloloko.

Buo ang loob ni dating House Speaker at Leyte Rep. Martin Romualdez na dumalo sa pagdinig ng Independent Commission for Infrastructure (ICI).

Sa ambush interview bago ang kaniyang pagdalo sa nagpapatuloy na imbestigasyon ng independent body, sinabi ni Romualdez na ang kaniyang pagdalo ay bilang pagpapakita na wala siyang itinatago at wala siyang dapat na itago.

Iginiit ni Romualdez na bagaman hindi siya naging bahagi o parte ng bicameral conference ay kaniyang ibabahagi ang mga nalalaman.

Handa aniya siyang makipagtulungan sa ICI at linawin ang mga isyung ibinabato laban sa kaniya na makakatulong sa trabaho ng komisyon.

Aniya, ang kaniyang pagdalo ay bilang pagiging bukas, pagpapahalaga sa pananagutan, at ilantad ang katotohanan tungo sa mas mabilis na pagsisiyasat.

Binigyang-diin ni Romualdez na kaniyang patutunayan na walang basehan ang mga paratang sa kaniya at ang kaniyang presensya ay patunay ng kaniyang pananagutan sa katotohanan at hindi manaig ang pamumulitika.

Inilunsad ng Bureau of Customs ang malawakang random drug testing sa lahat ng opisina, pantalan, at sub-port sa buong bansa bilang tugon sa panawagan ni Pangulong Ferdinand Marcos Jr. para sa mas mataas na integridad sa serbisyo publiko.

Ayon kay Customs Commissioner Ariel Nepomuceno, layunin ng programa na palakasin ang disiplina, kalusugan, at tiwala ng publiko sa ahensya.

Sa ilalim ng naturang hakbang, titiyakin ng BOC na magiging drug-free workplace ang buong institusyon bilang bahagi ng mas malawak na kampanya ng pamahalaan laban sa iligal na droga.

Maliban dito, patunay aniya ang pagpapatupad ng programa na hindi lang tagapagbantay ng kalakal ang Customs, kundi tagapagtanggol din ng integridad at disiplina sa loob ng gobyerno.

Naniniwala si Federation of Philippine Industries Chairperson Elizabeth Lee na may masamang epekto sa mga negosyo sa bansa ang malawakang isyu ng korapsyon.

Sa panayam ng DWIZ, sinabi ni Chairperson Lee na dahil sa malawakang isyu ng katiwalian, nagiging “unsettled” o magulo ang mga negosyo sa bansa.

Binigyang-diin pa ni Lee na mas tumataas ang karagdagang panganib sa pamumuhunan sa bansa bunsod ng nasabing isyu.

Iginiit ng FPI chairperson na hindi sapat ang pag-ugong ng isyu ng korapsyon sa balita; dapat may managot at makulong sa pagnanakaw ng bilyon-bilyong piso sa kaban ng bayan.

Suportado nina Senate President Vicente Sotto III at Senate President Pro-Tempore Panfilo Lacson ang mungkahi ni Akbayan Party-list Representative Chel Diokno na alisin na ang pondo para sa unprogrammed appropriation sa susunod na taon.

Ito’y sa gitna ng pangamba na magamit ang nasabing pondo sa pangungurakot dahil sa flexible na mekanismo ng nasabing alokasyon.

Ayon kay Senador Lacson, napagkasunduan nila ng ilang mga senador na alisin ang unprogrammed appropriations, bukod sa foreign-assisted projects.

Nabatid na tinutulan ng karamihan sa mga kongresista ang pagtatanggal sa U.A., kung saan idinipensa ito ni House Appropriations Chairperson Mikaela Suansing dahil kailangan aniya ng bansa ng nakahandang pondo lalo na sa commitments na nauugnay sa foreign-assisted initiatives.

Ibinunyag ni Deputy Minority Leader JV Ejercito na naantala ang mga foreign-assisted projects gaya ng railway system, airport, at dams matapos itong mailagay sa unprogrammed funds noong 2024.

Sa panayam ng DWIZ, sinabi ni Senador Ejercito na nagdulot ito ng maraming problema sa pagpapatupad ng mga proyekto.

Dagdag pa ni Senador JV na dapat sana ay tatakbo na ang ilang subway sa bansa sa taong 2028, ngunit naantala ito hanggang 2032 dahil sa pagkakalipat nito sa unprogrammed funds.

Tiniyak naman ni Senador JV Ejercito na hindi na muling mangyayari ang paglipat ng foreign-assisted funds sa unprogrammed funds sa ilalim ng kanyang pamumuno.