NATIONAL NEWS

Ibinunyag ni Vice President Sara Duterte na sangkot umano si dating Ako Bicol Representative Zaldy Co sa kontrobersyal na laptop procurement ng Department of Education (DepEd).

Sinabi ni VP Sara na nagsagawa siya ng imbestigasyon habang siya pa ang kalihim ng DepEd.

Sunwest Construction and Development Corporation aniya ang kontraktor ng laptop sa DepEd.

Dagdag pa ng Pangalawang Pangulo, lumabas sa kanilang pagsusuri na may mga iregularidad sa pagpapatupad ng kontrata kaugnay ng laptop project.

Ang laptop scandal ay unang lumutang matapos mabunyag ang umano’y labis na presyo at mabagal na delivery ng mga laptop na nakalaan para sa mga guro sa gitna ng pandemya.

Maaari nang ma-access ng publiko ang Statement of Assets, Liabilities, and Net Worth (SALN) ng mga opisyal ng pamahalaan, bilang bahagi ng pagpapalakas ng transparency at pananagutan sa serbisyo publiko.

Ayon sa Ombudsman, ang desisyong ito ay nakabatay sa isang malinaw na prinsipyo na may karapatan ang publiko na malaman kung paano kumikita at pinamamahalaan ng mga nasa gobyerno ang kanilang yaman.

Pinakamabisang paraan aniya ito para maibalik ang kumpiyansa ng publiko sa pamahalaan sa pamamagitan ng pagbukas at pag-access sa impormasyon.

Hinimok din ng Ombudsman ang lahat ng ahensyang may hawak ng opisyal na kopya ng SALN — kabilang ang Civil Service Commission (CSC), Office of the President, Kongreso, Hudikatura, at mga lokal na pamahalaan — na iisa ang maging patakaran sa pagbubukas ng SALN records alinsunod sa ipinatutupad na panuntunan.

Binigyang-diin ng Ombudsman na hindi ito usaping pampulitika, kundi usapin ng pananagutan. —ulat mula kay Jenn Patrolla (Patrol 38)

Aabot sa 60% ng mga Pilipino ang galit sa nalantad na isyu ng korapsyon sa mga infrastructure, partikular sa flood control projects.

Batay ito sa OCTA Research survey na isinagawa noong Setyembre 25 hanggang 30 sa 1,200 respondents.

Pinakamarami ang naitala sa NCR — 81%; sinundan ng Balance Luzon, 64%; Visayas, 53%; at Mindanao, 46%.

Nasa 30% naman ang amining natatakot, habang 9 percent ang nalulungkot at 1% lamang ang nakikita pang may pag-asang maresolba ang problema.

Lumabas din sa OCTA survey na walo sa bawat sampung Pilipino, o 83%, ang sumusuporta sa desisyon ni Pangulong Ferdinand Marcos Jr. na isiwalat ang mga katiwalian sa flood control projects.

Nasa 46% naman ng mga respondents ang pabor na pangunahan ng independent commission ang imbestigasyon sa flood control scandal.

Magsasagawa ng panibagong malawakang protesta laban sa katiwalian sa bansa sa Oktubre a-disi-siyete at a-bente-uno ang mga grupong nasa likod ng “Baha sa Luneta” rally noong Setyembre 21.

Pangungunahan ng mga kabataan ang rally at martsa sa Mendiola sa Oktubre a-disi-siyete, habang mga grupo naman ng mga magsasaka mula sa mga binabahang lugar sa bansa ang mangunguna sa protesta sa Liwasang Bonifacio sa Oktubre 21.

Ang protesta sa mga nasabing araw ay hiwalay pa sa naunang inihayag na rally na nakatakda sa Nobyembre a-trenta.

Sa inilabas na pahayag ng Kilusang Bayan, layunin ng panibagong malawakang protesta na ipanawagan at igiit ang pananagutan ng mga sangkot sa mga maanomalya at guni-guning flood control projects.

Dagdag pa ng nasabing grupo, nakipag-ugnayan na sila sa mga organizer noon pang Oktubre a-onse, at nangakong patuloy na makikipag-ugnayan hanggang sa mga susunod na araw at linggo.

Ipinagmamalaki ng Philippine National Police ang pagbaba ng mga naganap na krimen sa bansa.

Ayon kay PNP Spokesman Brigadier General Randulf Tuaño, bumaba ang naitalang focus crimes sa mahigit dalawampu’t pitong libo simula Enero 1 hanggang Oktubre 9 ngayong taon — mas mababa kumpara noong 2024 na mahigit tatlumpu’t isang libong krimen.

Saklaw ng focus crimes ang mga krimeng carnapping, pagnanakaw ng motorsiklo, robbery, rape, theft, murder, homicide, at physical injury.

Batay sa datos ng pulisya, ang kaso ng rape ang bumaba ng 22%, sinundan ng robbery na mayroong 17.35%.

Kaugnay nito, wala ring naitalang mga looting incidents sa mga nagdaang lindol sa Cebu at sa Davao Oriental.

Idinepensa ng Malacañang ang pagbebenta ng ₱20 kada kilong bigas ng Department of Agriculture sa mga lugar na tinamaan ng mga kalamidad.

Ayon kay Palace Press Officer Claire Castro, ang bigas ay mula sa National Food Authority na may mandato lamang na magbenta ng murang bigas at hindi mamigay nang libre.

Iginiit ni Usec. Castro na may mga nakatalagang ahensya ng pamahalaan na responsable sa pamimigay ng mga ayuda sa mga nasalanta ng sakuna tulad ng Department of Social Welfare and Development, Department of Public Works and Highways, at Department of Human Settlements and Urban Development.

Dagdag pa ng palace official, pinalawak din ng NFA at DA ang saklaw ng mga pwedeng makabili ng murang bigas.

Kung dati aniya, tanging mga miyembro ng 4Ps, mga senior citizen, PWD, single parent, at mga tsuper ng tricycle at jeepney ang maaaring makabili — ngayon ay bukas na ito sa lahat sa mga lugar na apektado ng bagyo at lindol upang mas marami ang makinabang.

Dapat pagtulungan na lamang ng Department of Agriculture at Public Works and Highways ang pagpapatupad ng mga farm-to-road o FMR projects.

Ito ang panawagan ni Abono Partylist Rep. Robert Raymund Estrella, taliwas sa hirit ni Senador Sherwin Gatchalian na ilipat na lamang sa DA ang proyekto sa halip na sa DPWH matapos mabunyag ang ₱10 billion ghost FMR.

Ayon kay Congressman Estrella, bagaman mas makabubuti na DA ang manguna sa mga proyekto ng farm-to-market roads dahil mas alam nito ang kondisyon sa kabukiran at kung saan kailangan ang mga kalsada, aminado siya na dapat pa ring makiisa ang DPWH dahil ito ang may “technical capabilities” pagdating sa disenyo at pagpapatayo ng mga kalsada.

Kinumpirma ng isang infectious diseases expert na nananatili ang Pilipinas bilang may pinakamabilis na pagtaas ng bagong kaso ng H.I.V. sa buong Asya.

Aminado si Dr. Rontgene Solante, hepe ng San Lazaro Hospital – Adult Infectious Diseases and Tropical Medicine Section, na ang stigma pa rin hinggil sa H.I.V. ang nakikitang dahilan ng patuloy na pagdami ng mga bagong kaso.

Nabatid na isang sampung-taong-gulang ang pinaka-batang H.I.V. case sa ngayon, habang umaasa si Solante na hindi na ito madaragdagan o wala nang maitala na mas bata pang kaso ng nahahawaan ng nasabing sakit.