NATIONAL NEWS

Umakyat na sa 19.7 milyong Pilipino ang naturukan ng Covid-19 booster sa buong bansa.

Ang nasabing bilang ay 25% ng 70 million eligible population na nakatanggap ng unang booster shot at primary dose.

Ayon kay DOH officer-in-charge Maria Rosario Vergeire, kabilang sa tumanggap ng booster ang 3.2 million individuals na tinurukan sa ilalim ng “PinasLakas” campaign.

Para makamit ang 30% target bago mag-Sabado, Oktubre a – 8, na hudyat ng unang 100 araw ng Marcos Administration, kailangan pa anyang makapag-administer ang gobyerno ng 3.6 million booster jabs.

Sa ngayon ay umabot na sa 73.2 million Filipinos ang fully vaccinated laban sa Covid-19.

Sumadsad pa sa 1,347 ang karagdagang Covid-19 cases ang naitala ng Department of Health, kahapon.

Umabot naman sa 36 ang nadagdag sa death toll kaya’t lumobo na sa 63,078 ang namatay habang 3,867,242 na ang recoveries.

Nasa 26,792 na ang aktibong kaso habang sumampa na sa 3,957,112 total caseload.

Sa mga pinaka-bagong kaso naman, 547 sa mga ito ay mula sa Metro Manila.

Ibinasura ng Energy Regulatory Commission (ERC) ang hirit na taas-singil sa kuryente ng Meralco, South Premiere Power Corporation (SPPC), at San Miguel Energy Corporation (SMC).

 Desisyon ito ng ERC matapos ang masusing pag-imbestiga sa petisyon na inihain ng Meralco at mga units ng SMC Global Power Holdings Corporation, para sa pansamantalang adjustment na nakapaloob sa power supply agreements na nilagdaan noong 2019 para marekober ang kanilang gastos sa langis.

 Ayon sa ERC, bilang isang ahensya ng gobyerno ay inaasahan nila na ang SMC at SPPC ay gagawa ng paraan para masolusyunan ang problema kasabay ng pagtiyak ng pagsunod sa mga obligasyong kontraktwal nito.

 Inihayag naman ng ERC na alinsunod ang kanilang desisyon sa mandatong protektahan ang mga consumers, mapigilan ang market abuse at masigurong transparent ang presyo ng kuryente itinatadhana sa ilalim ng Electric Power Industry Reform Act (EPIRA).

Ipinagdiwang ng Eternal Crematory ang blessing ng bagong San Lorenzo Ruiz Columbarium sa Eternal Gardens sa Baesa, Caloocan City at Eternal Gardens sa Biñan City, Laguna sa naganap na seremonya noong September 28, 2022.

Ito ay kasabay ng pista ng San Lorenzo Ruiz, ang unang Pilipinong santo.

Dumalo sa nasabing event ang top executives ng sister company nitong Eternal Plans, Inc. (EPI) na pinamumunuan nina Vice Chair at Chief Executive D. Antoinette C. Cabangon-Jacinto, Board Director D. Adrian C. Cabangon at President and Chief Operation Officer Elmer M. Lorica, na Pangulo rin ng Eternal Crematory Corporation.

Kasama rin sa kaganapan ang sales force members ng EPI, executive at officer ng mga miyembrong kompanya ng Eternal Group, kabilang ang Eternal Gardens President at COO Numeriano Rodrin, Vice President for Finance Marvin C. Timbol at Executive Officer Dannica Nicole A. Cabangon.

Ang bawat nitso o crypt sa San Lorenzo Columbarium ay kayang tumanggap ng hanggang dalawang urn na idinisenyo upang maging economical alternative sa mas mahal na traditional interment.

Ang columbarium sa Baesa ay nag-aalok ng higit sa 200,000 bagong crypts, habang ang isa sa Biñan ay may mahigit 500 bagong crypts.

Ang Eternal Crematory ay isa sa mga pinakaunang kompanya na nag-aalok ng cremation services sa bansa matapos itong ma-establish noong 1995 ni late Ambassador Antonio L. Cabangon Chua.

Ito ay bahagi ng ALC Group of Companies, kabilang ang sister companies na Eternal Gardens, Eternal Chapels, at Eternal Plans Inc. sa ilalim ng pamumuno ni Chairman D. Edgard A. Cabangon.