NATIONAL NEWS

Nagawang sunugin ng isang lalaki sa Taguig City ang kaniyang sariling bahay matapos hiwalayan ng kaniyang misis sa Viscara Street, Purok 1, Barangay New Lower Bicutan.

Kinilala ang suspek na si Rayven Ison, 38-anyos na napag-alaman na lasing nang isagawa ang pagsunog gamit ang isang kutson at lighter.

Ayon sa mga otoridad, nadamay din ang ilang mga katabi nitong bahay kung saan, 11 pamilya o mahigit 48 indibidwal ang apektado.

Tinatayang aabot sa P300,000 ang halaga ng napinsalang ari-arian sa nabanggit na lugar habang kasalukuyan pang iniimbestigahan ng mga otoridad ang suspek na posibleng maharap sa kasong Arson.

Aabot sa 1,000 mga laptop ang ipinamahagi ng Quezon City Government para sa mga pampublikong guro sa elementarya at sekondarya ng lungsod.

Ayon kay Quezon City Mayor Joy Belmonte, namahagi din sila ng 50 laptop sa Child Development Workers (CDW), para naman sa mga pampublikong daycare center.

Bukod pa dito tumatanggap din ng buwanan at quarterly allowance ang mga pampublikong guro mula sa pamahalaang lungsod habang nasa mahigit 450,000 na mag-aaral naman, ang nakatanggap ng mga gamit pang-eskwela mula pa noong nagsimula ang face-to-face classes.

Sinabi pa ng Alkalde na namahagi din ang Lungsod ng 96,440 storybooks; 710,371 learning and teaching kits; 6,875,846 modules; at 430,438 hygiene kits para sa mga public school learners.

Iginiit ni Belmonte na mahalaga ang edukasyon kaya patuloy nilang susuportahan ang mga paaralan mula sa mga mag-aaral hanggang sa mga guro.

Sa ngayon, nakikipag-ugnayan na ang QC LGUs sa City Schools Divisions Office (SDO) at Social Services Development Department (SSD) para masigurong sapat ang suportang ibinibigay sa mga guro at mga mag-aaral.

Sinimulan nang ipamahagi ng Manila City Government, ang monthly financial aid para sa mga senior citizen ng lungsod katuwang ang mga Barangay Chairman at Treasurer ng District 1.

Ayon sa Manila LGUs, ang monthly allowance ay bahagi ng apat na buwan o mula buwan ng may hanggang August 2022.

Siniguro din ni Manila Mayor Honey Lacuna, na otomatikong nasusunod ang distribusyon ng ayuda para sa mga elderly citizens o ang mga lolo at lola ng Districts 2 hanggang 6.

Ang bawat benepisyaryo ng naturang programa ay tatanggap ng P2,000 o P500 kada buwan.

Samantala, patuloy din sa pagbabakuna ang pamahalaang Lokal ng Maynila para sa mga senior citizen sa pangunguna ng Manila Health Department.

Nabatid na ang unang linggo ng Oktubre ay idineklara bilang Elderly Filipino Week, sa ilalim ng Presidential Proclamation no. 470, series of 1994, bilang parangal sa mahalagang papel at kontribusyon ng mga matatanda sa lipunan.

Mariing kinondena ng National Union of Journalist of the Philippines (NUJP) ang pagpatay sa broadcaster-komentaristang si Percival Mabasa o mas kilala bilang “Percy Lapid” ng DWBL matapos pagbabarilin habang nasa loob ng kaniyang sasakyan sa Las Piñas City.

Ayon sa NUJP, ang pagpatay sa biktimang si Lapid ay nagpapakita lamang na nanatili paring mapanganib ang propesyon ng mga mamamahayag sa bansa.

Iginiit ng NUJP, na hindi nabibigyan ng proteksiyon ng mga otoridad ang mga mamamahayag, maging ang mga ordinaryong mamamayan laban sa mga salarin.

Sa kabila nito, nananawagan sa publiko ang NUJP na makiisa sa pagkondena sa panibagong pagpatay sa isang mamamahayag.

Bukod pa dito, nananawagan din ang grupo sa Philippine National Police (PNP), na panagutin ang mga salarin lalo na ang mga nasa likod ng pagpatay kay Lapid.

Matatandaang si Ka-Percy ay naging anchor din ng DWIZ at DZRJ at kapatid ni dating National Press Club president Roy Mabasa ng Manila Bulletin.

Isa sa 433 lucky bettor ang pumayag na magpakita at makapanayam ng Philippine Charity Sweepstakes Office (PCSO).

Ayon sa PCSO, hindi sapilitan at may basbas umano ng mismong lucky winner na ilabas ang kaniyang pagkakakilanlan sa publiko.

Kasunod ito ng pagbatikos ng netizens matapos masungkit ng mga mananaya ang winning combination number na 9, 45, 36, 27, 18, at 54 na lumabas sa Grand Lotto 6/55 kamakailan na kauna-unahang nangyari sa kasaysayan ng PCSO.

Sa naging pahayag ng nanalong bettor, kaniyang sinabi na matagal na niyang inaalagaan ang nasabing mga numero dahil naniniwala ang kaniyang ama na swerte ito.

Bukod pa dito, ipinakita din ng naturang mananaya ang tsekeng kaniyang natanggap na nagkakahalaga ng mahigit P436, 196.

Mahabang pila ang sumalubong sa mga mananakay ng MRT-3 sa kalagitnaan ng rush hour, kahapon.

Bunsod ito ng naranasang technical glitch sa signaling system sa track circuit malapit sa Taft Avenue Station, sa Pasay City, pasado alas-4 ng hapon.

Ayon sa pamunuan ng MRT-3, nagpatupad ng provisional service sa pagitan ng North Avenue Station at Shaw Boulevard Station.

Dakong ala-7 naman kagabi ay balik na sa full operations ang biyahe mula North Avenue Station at Taft Avenue Station.

Posible nang bumaba ang Covid-19 cases sa National Capital Region.

Ito, ayon sa OCTA Research Group, ay dahil sa posibilidad na bumabagal na ang trend sa Metro Manila at mga karatig lalawigan, kabilang ang Cavite, Laguna, Rizal at Bulacan.

Inihayag ni OCTA Research Fellow, Dr. Guido David na nananatili sa -8% ang one-week growth rate sa NCR.

Gayunman, hindi anya nila isinasantabi ang posibilidad na umabot sa halos 4,000 Covid-19 cases kada araw dahil sa humihinang immunity, pagbabalik ng face-to-face classes at pagluluwag ng restrictions.

Inabisuhan naman ni David ang publiko na sumunod sa health protocols at magpabakuna laban sa nakahahawang sakit.

Isang highschool teacher ang patay matapos saksakin ng estudyante sa Basey, Samar.

Kinilala ang biktimang si George Lauron, 32-anyos, guro sa Basey National High School habang suspek ang isa umanong 19-anyos na Senior High School student.

Naganap ang krimen sa tinutuluyang boarding house ng biktima sa Barangay Sulod, dalawang araw bago ang National Teachers Day.

Ayon sa Basey Municipal Police, nag-iinuman si Lauron at ang suspek kasama ang isa pang lalaki nang magkaroon ng argumento ang guro at estudyante.

Nagalit umano ang mag-aaral at sinaksak niya sa dibdib ang biktima gamit ang isang kutsilyo.

Naisugod pa sa ospital si Lauron pero hindi na umabot ng buhay habang sumuko ang suspek sa Pulisya at nahaharap sa kasong murder.

Nagsasagawa na ng imbestigasyon ang mga otoridad hinggil sa krimen.

Isinumite na ng Alliance of Concerned Teachers (ACT) sa Kamara kahapon ang petisyong nananawagang taasan ang sahod ng mga nagtatrabaho sa sektor ng edukasyon.

Sa bisperas ng National Teachers Day, mahigit 57,000 teachers at non-teaching personnel ang lumagda sa petisyon upang suportahan ang House Bill 203 na layuning magbigay ng umento sa mga education worker.

Nakasaad sa petisyon na napag-iwanan na ang suweldo ng mga guro ng sahod ng mga Pulis at Sundalo na dinoble  sa hindi bababa sa halos P30,000 noong 2018 habang noong sunod na taon ay itinaas din ang Entry-level Salary ng public nurses sa Salary Grade 15 o P35,000.

Sa ngayon anila ay naiwan ang suweldo ng mga guro sa hindi bababa sa Salary Grade 11 o P25,400 kada buwan.

Samantala, umapela ang ACT na itaas din ang minimum pay ng Public School Teachers sa S.G. 15.

Inihirit din ng grupong itaas ang minimum pay ng College instructors sa Local at State Universities at Colleges sa S.G. 16 o P38,150 at ng private school teachers sa P30,000 kada buwan.