NATIONAL NEWS

Nanguna ang University of the Philippines Los Banos (UPLB) sa ginanap na Veterinarian Licensure Examination nuong nakaraang buwan.

Ayon sa Professional Regulation Commission (PRC),  nanguna sa board exam si Kenny Vergara Pique mula sa UPLB, sa iskor na 84.9%.

Pumangalawa naman ang isa pang estudyante mula rin sa unibersidad na si Regina Isabelle Jaimee Ignacio Ranada, na nakakuha ng iskor na 84.52%.

Anim na estudyante pa ang mula sa UPLB ang nakapasok sa top 10.

Samantala, 335 mula sa 928 ang pumasa sa Veterinarian Licensure Examination.

Arestado ang apat na Vietnamese fishermen matapos mahuli sa akto na ilegal na nangingisda gamit ang sodium cyanide sa karagatang sakop ng Pag-Asa Island, Kalayaan, Palawan.

Nahuli ang mga ito sa pinagsanib na pwersa ng Philippine Coast Guard (PCG) Station Kalayaan, Philippine Navy, Philippine National Police Maritime Group.

Nakumpiska ng Joint Maritime Law Enforcement Team ang fishing vessel na gamit ng mga Vietnamese na tinawag na Sampan.

Samantala, nakatakdang kasuhan ng kasong paglabag sa Sections 91 at 92 ng Republic Act No. 10654 o ang “Philippine Fisheries Code of 1998” ang mga Vietnamese.

Posibleng malaki ang mawala sa ekonomiya ng bansa sakaling tuluyang alisin sa Pilipinas ang mga natitirang Philippine Offshore Gaming Operators (POGO).

Ayon kay POGO Representative, Property Consultant David Leechiu, bilyun-bilyong piso ang mawawala sa bansa kapag umalis ang mga ito.

Sa taunang renta sa opisina ng mga POGO na may kabuuang 1.05 million square meters, 18.9 billion pesos ang mawawala.

Kasabay ng pagkawala ng trabaho ay ang 54 hanggang 57 billion pesos sa makokolektang income tax mula sa foreign employees.

Giit ni Leechiu, kailangan ng bansa ng POGO lalo na ngayon na bumabangon ang bansa mula sa epekto ng pandemya ay mas dapat pa ngang hinihikayat ang employments at investments.

Inanunsiyo ng Light Rail Manila Corporation (LRMC) na balik-operasyon na ang 19 na istasyon ng Light Rail Transit (LRT) line 1.

Ito’y matapos pansamantalang isuspinde kasunod ng nangyaring sunog malapit sa Vito Cruz station.

Batay sa ulat ng Bureau of Fire Protection, nangyari ang sunog sa isang commercial at residential area sa Rafael Alunan Street sa Maynila.

Umabot sa unang alarma ang naturang sunog dakong 8:55 ng umaga.

Samantala, naapula naman ito bandang 9:38 ng umaga kanina.

Nagpadala na ng liham ang Department of Social Welfare and Development (DSWD) sa Office of the President (OP) para humiling ng karagdagang pondo para sa mga lolo’t lola na umabot na sa mahigit 100 taong gulang.

Ayon kay DSWD Secretary Erwin Tulfo, kulang ang kanilang pondo para sa 600 centenarian na nakapilang tumanggap ng tig 100,000 pisong financial aid mula sa pamahalaan.

Naiparating na rin nila aniya sa budget hearing ng kongreso ang hiling nilang additional fund upang maisama sa 2023 General Appropriations Act.

Samantala, umabot na kasi sa 600 na mga nakatatanda ang may edad na mahigit 100 taong gulang at tila lumalaki pa aniya ang bilang na ito. —sa ulat ni Jopel Pelenio (Patrol 17)

Isinusulong ni Albay Rep. Edcel Lagman na alisin na sa ilalim ng panukalang P5.268-T na 2023 National Budget ang mga aniya’y sobra at hindi kailangang confidential at intelligence funds na nakapaloob sa pondo ng iba’t ibang ahensya ng gobyerno na aabot sa P9.29-B.

Ito’y dahil aniya sa posibilidad na magamit ang nasabing pondo sa katiwalian.

Partikular na binaggit ni Lagman ang aniya’y hindi makatwirang P500-M na confidential funds para sa Office of the Vice President (OVP) at P150-M para sa Department of Education na aniya kapwa nasa ilalim ni Vice President Sara Duterte.

Giit nito ang OVP ay hindi surveillance agency at walang hurisdisksyon sa pambansang seguridad.

Binanggit ni Lagman ang nasabing pahayag habang pinag-iisipan ng mga miyembro ng House Panel ang mga iminungkahing pagbabago sa House Bill No. 4488 o ang 2023 General Appropriations Bill na inaprubahan ng kamara nitong nakaraang linggo. —sa ulat ni Tina Nolasco (Patrol 11)

Nakipag-ugnayan ang Department of Social Welfare and Development (DSWD) sa Public Attorney’s Office (PAO) upang tulungan ang mga single mother na makakuha ng sustento para sa kanilang mga anak.

Ito ay sa pamamagitan ng isang memorandum of agreement na nilagdaan ng dalawang ahensya matapos dumagsa ang mga reklamo ng mga magulang na kulang ang natatanggap nitong tulong-pinansyal mula sa kanilang mga dating asawa o kinakasama.

Paliwanag ni DSWD Secretary Erwin Tulfo, ang mga abogado ng PAO ang tutulong sa mga ina para makakuha ng sustento.

Kailangan lamang aniya na pumunta sa provincial o regional office ng DSWD para makahingi ng nasabing tulong.

Samantala, paalala ni Tulfo sa mga ama na maari silang kasuhan ng Violence Against Women and Children kung hindi ito magbibigay ng child support sa kanilang mga anak.