NATIONAL NEWS

Kinumpirma ng isang volcanologist ang mudflow na patuloy na nagaganap sa Bulkang Mayon bunsod ng mga pag-ulan sa lugar nitong mga nakalipas na araw.

Partikular dito ang bahagi ng Miisi channel sa Barangay Anoling, Camalig, Albay.

Ayon kay Resident volcanologist Paul Alanis, umabot ang mudflow ng limangdaang metro o kalahating kilometro mula sa tuktok ng bulkan na binubuo ng mga abo at tubig.

Paliwanag niya, hindi ito bagong materyales kundi bahagi ito ng dating ibinuga ng bulkan nang pumutok ito noong 2018.

Babala ni Alanis, posible itong masundan hindi lamang sa nabanggit na channel kundi sa iba pa dahil sa mga pag-ulan at pagpasok ng masamang panahon.

Pina-iiwas naman ang publiko sa pagpasok sa 6-kilometer radius permanent danger zone ng bulkan at mga river channels nito dahil sa posibleng panganib.

Nagtutulungan na ang National Commission on Indigenous Peoples (NCIP) at Department of Health upang matugunan ang vaccine hesitancy sa Indigenous People (IP) Communities.

Ayon kay Pablito Gonzales ng National Committee on Central Cultural Communities (NCCC), iniisip ng ilang IP members na ang pagpapaturok ng COVID-19 vaccine ay kabaligtaran sa kanilang kultura at espiritwalidad.

Batay aniya sa pagtaya, nasa 40% hanggang 50% ng IPs sa buong bansa ang nakatanggap na ng bakuna.

Kaugnay nito, sinabi ni Gonzales na patuloy nilang hinihikayat ang IP communities na magpabakuna na upang magkaroon ng proteksyon laban sa COVID-19.

Pinangunahan ni Pangulong Ferdinand Marcos Jr., ang oathtaking ng kanyang reappointed Cabinet officials.

Isinagawa ang panunumpa kaninang umaga sa palasyo ng Malacañang.

Nanguna sa listahan ng Cabinet officials si dating chief Justice Lucas Bersamin na nanumpa bilang bagong Executive secretary ng Administrasyon, kung saan pinalitan niya si Atty. Victor Rodriguez.

Kabilang naman sa mga reappointed cabinet members sina DPWH sec. Manuel Bonoan, DOST sec. Renato Solidum Jr., DSWD sec. Erwin Tulfo, DTI sec. Alredo Pascual, DOTr sec. Jaime Bautista, Finance sec. Benjamin Diokno, Department of Energy sec. Raphael Lotilla, Department of Migrant Workers sec. Maria Susana Vasquez Ople, NEDA sec. Arsenio Balisacan, at Department of Human Settlements and Urban Development sec. Jose Acuzar.

Ilang opisyal naman ng pamahalaan ang wala sa listahan ng mga reappointed Cabinet official at hindi nakasama sa ginanap na oathtaking.

Una nang inihayag ni Senate president Juan Miguel Zubiri na kinakailangang muling maitalaga ni Pangulong Marcos ang ilang miyembro ng gabinete makaraang ma-bypass ng Commission on Appointments. —ulat mula kay Jopel Pelenio (Patrol 17)

Binigyan ng 24 oras na ultimatum ni National Capital Region Police Office (NCRPO) Acting Regional Director PBGen. Jonnel Estomo ang mga imbestigador at si Las Piñas Chief of Police PCol. Jaime Santos para magpaliwanag at resolbahin ang kasong pagpatay sa brodkaster na si Percival Mabasa o Percy Lapid.

“I am deeply saddened and we condemn this crime resulting in the death of [Mabasa] aka Percy Lapid, DWBL radio commentator, who was shot dead on October 3, 2022 at the gate of BF Resort Village in Talon Dos, Las Piñas,” ayon kay Estomo.

Kinumpirma rin ni Estomo ang pagkakabuo ng Special Investigation Task Group o “SITG Lapid” upang agad na maigawad ang hustisya sa biktima at sa kanyang pamilya.

“Likewise, I have given the investigator and the Chief of Police PCOL Jaime Santos, 24 hours to shed light on the matter and solve the case. We assure to provide an update as soon as available,” aniya.

Kabilang aniya sa mga miyembro ng task group ang Criminal Investigation and Detection Group (CIDG-NCR) at Philippine National Police-Intelligence Group (PNP-IG).

Ayon kay Estomo, patuloy ang malalimang imbestigasyon sa krimen at pakikipag-koordinasyon sa mga opisyal ng BF Homes para sa agarang ikalulutas ng kaso.

“Presently, a thorough investigation is underway. Looking on all possibilities, we are conducting coordination with the officers of village and a Special Investigation Task Force was also created by Las Piñas City Station,” sabi pa ng NCRPO chief.

Muling kinilala ang Pilipinas bilang magandang puntahan ng mga Turista.

Nominado ang ating bansa bilang Most Desirable Country sa 21st annual Wanderlust Reader Travel Awards na isang UK Travel Magazine na kumakilatis sa mga tourist destination sa pamamagitan ng survey.

Hinikayat naman ng Department of Tourism (DOT) na magbigay suporta at bumoto sa survey.

Bukod dito, nominado din ang Cebu na Most Desirable Region habang ang Palawan naman ay Most Desirable Island. —sa panulat ni Jenn Patrolla

Inihayag ng Philippine National Police (PNP) na bumuo na ng Special Investigation Task Force (SITG) ang National Capital Region Police Office (NCRPO) para resolbahin ang malagim na pagpatay sa mamamahayag na si Percival Mabasa o Percy Lapid.

Pahayag ni PNP Public Information Office (PIO) Chief Police Brig. General Roderick Augustus Alba, kasama ang SITG, ay tututukan ng Las Piñas City Police Station ang imbestigasyon.

Kasabay nito, nangako ang PNP na mabibigyan ng hustisya ang pagpatay kay Lapid.

Ayon kay Alba, sinisilip ng pulisya ang lahat ng anggulo upang matukoy kung ano ang motibo at kung sinu-sino ang may kagagawan nito para mapanagot sila sa batas.

“The PNP vows to bring justice to an attack against a member of the media industry. Investigation is underway to determine the culprits and motive of this case. A Special Investigation Task Force was already created by Las Piñas City Station of NCRPO to spearhead and coordinate the investigative and prosecutorial efforts of the PNP,” wika ni Alba.

Magugunitang nasawi si Lapid matapos tambangan ng hindi pa nakikilalang mga salarin sa Aria St., Brgy. Talon 2, Las Piñas City kagabi.

Pinaigting na ng Philippine Embassy sa Libya ang registration at mapping ng mga Pilipino dahil sa kaguluhan sa ilang bahagi ng Libya.

Layunin nitong matunton ang mga Pinoy sa Libya sakaling maipit sa nagpapatuloy na kaguluhan.

Sa ilalim ng nasabing hakbang, magpaparehistro ang mga OFW para sa Global Positioning System ng kanilang cellphone.

Naglabas na rin ng abiso ang embahada kung saan pinag-iingat ang mga Pinoy sa Zawiya District at mga karatig na lugar dahil sa kaguluhan.

Samantala, pinaghahandaan na rin na ng Philippine Embassy ang pamamahagi ng Registration ID sa mga naunang nag-apply. —sa panulat ni Jenn Patrolla

Kinumpirma ng Department of Education (DepEd) na hindi pa sila naglalabas ng ulat ng kaso ng Covid-19 sa ilang paaralan sa gitna nang pagpapatuloy ng face-to-face classes.

Ayon kay DepEd spokesman Micheal Poa, inasahan na nilang may magpopositibo dahil sa face-to-face na ang klase ng mga mag-aaral at guro.

Sa kabila nito, mahigpit na ipinapatupad ng mga paaralan ang minimum public health standards, gaya sa Batasan Hills National High School sa Quezon City na may 8k estudyante ang naka-enroll.

Sa ilalim ng DepEd order no. 34, hindi makapapasok sa paaralan ang estudyante kung may sintomas ng COVID-19 sa halip ay ililipat sa modular class.

Samantala, sa ilalim ng DepEd order no. 39, inaatasan ang mga paaralan na palakasin ang community monitoring measures at referral system sa Local Government Unit (LGU) at health centers.  —sa panulat ni Jenn Patrolla