NATIONAL NEWS

Handa ang Armed Forces of the Philippines (AFP) na makipagtulungan sa Philippine National Police (PNP) para sa pagpapatrolya sa National Capital Region (NCR) ngayong Christmas season.

Ito ay kasunod ng naging pahayag ni AFP chief of Staff Lt. Gen. Bartolome Vicente Bacarro, hinggil sa Augmentation forces sa PNP sakaling kulangin ang kanilang tauhan ngayong nalalapit na ang pasko.

Matatandaang inihayag ni PNP chief Pol. Gen. Rodolfo Azurin Jr., na mas dadami pa ang bilang ng tao ngayong Ber months kaya dapat na mas palakasin pa ang presensya ng mga pulis sa ilang lugar sa bansa partikular na sa Metro Manila, Central Luzon, Baguio City, Calabarzon, Cebu, at Davao.

Sinabi pa ni Azurin na noong panahon ni dating PNP chief Ping Lacson, nakagawa ang ahensya ng buddy-buddy system sa pagitan ng PNP at AFP kaya posible itong maibalik sakaling kailanganin.

Nagtapos ng Junior High School sa ilalim ng Alternative Learning System (ALS) ang 340 na Persons Deprived of Liberty (PDLs) sa Medium Security Compound ng New Bilibid Prison sa Muntinlupa City.

Ayon kay Bureau of Corrections Technical chief Supt. Maria Fe Marquez, binibigyan ng tiyansa ang mga bilanggo na makapagtapos ng pag-aaral kung saan, hindi sapilitan ang pagsali sa ALS.

Sinabi ni Marquez na mayroong insentibo ang mga lalahok at maaaring mapaiksi ang kanilang sintensya sa ilalim ng Good Conduct Time Allowance (GCTA).

Sa tulong ng GCTA, mababawasan ng 15 araw kada buwan ang sintensya ng mga lumalahok sa naturang programa.

Patuloy pa ring nakikipag-ugnayan ang Department of Health (DOH) sa Department of Budget and Management (DBM) para sa pondo ng mga health worker na hindi pa rin nakakatanggap ng benepisyo mula pa noong July 2021.

Ayon kay DOH officer-in-charge Maria Rosario Vergeire, mayroon pa ring utang na P64 billion ang kanilang ahensya dahil sa retroactive provisions ng Republic Act for Health Emergency Allowance.

Sinabi ni Vergeire na hinihintay pa nila ang pondo na matagal na nilang hinihiling sa DBM kung saan, nagpadala na sila ng liham nito lamang ng September 6 at 9 para maibigay ang P12 billion na allowance ng mga health worker.

Umaasa si Vergeire na maiku-konsidera ng DBM ang pagpapalabas ng pondo para sa mga health worker.

Hindi maaaring obligahin ang sinuman na magpa-drug test dahil katumbas ito ng paglabag sa kanilang karapatang-pantao.

Tugon ito ni Senator Robin Padilla sa panukala ni Congressman Ace Barbers na mandatory drug test para sa lahat ng celebrities dahil ini idolo sila ng publiko.

Ayon kay Padilla nakikiisa siya sa layuning maprotektahan ang ating mga kababayan laban sa posibleng kapahamakan dahil sa iligal na droga.

Kasama anya ang mga kapwa nya artista sa hangarin nya na maprotektahan laban sa illegal drugs

Pero mas maganda anya kung boluntaryo at hindi mandatory ang mungkahing pagpapa drug test ng mga celebrities para na rin ito sa kanilang kapakanan at kaligtasan.

Mas mainam din anya na kung sila ay magpapa-drug test ay employer nila ang gagastos para rito.

Pero iginiit ni Padilla na mas nararapat na sumailalim sa drug test ang ating mga opisyal at kawani ng pamahalaan dahil sila ay may tungkuling magbigay ng mabuting halimbawa para sa kapwa nating Pilipino.

Bahagyang bumaba sa 28,111 ang aktibong kaso ng COVID-19 sa bansa kahapon.

Aabot sa 1,967 ang karagdagang daily COVID-19 cases ang naitala ng Department of Health kaya’t lumobo na sa 3,955,758 ang total caseload.

Kabilang dito ang 3,864,605 recoveries at 63,042 deaths.

Ang mga bagong infections ay mababa sa daily average na 2,288 na naitala simula September 26 hanggang October 2.

Nangunguna pa rin sa mga rehiyong may pinaka-maraming kaso sa nakalipas na dalawang linggo ang Metro Manila, 13,855; CALABARZON, 5,650 at Central Luzon, 2,832.

Lumobo na sa P64 billion ang kabuuang halaga ng mga benepisyo ng mga healthcare workers na hindi pa rin naibibigay ng gobyerno simula noong July 2021.

Inamin ito mismo ng Department of Health sa kanilang budget deliberation sa Senado.

Ayon kay DOH-OIC, Undersecretary Maria Rosario Vergeire, patuloy silang nakikipag-ugnayan sa Department of Budget and Management upang maibigay ang benepisyo ng mga healthcare worker.

Sa katunayan anya ay sumulat na sila sa DBM noong Septmeber 6 at 9 upang i-release ang P12 billion na allowance ng mga healthcare workers.

Gayunman, aminado si Vergeire na kulang pa rin ito at kailangan talagang mapondohan ang ibang benepisyo na nasa ilalim ng batas.

Nang tanungin naman ni Senator Raffy Tulfo kung bago magpasko ay matatanggap ng healthcare workers ang kanilang hazard pay, inihayag ng DOH official na ginagawa nila ang lahat upang maipalabas at maipadala na sa DOH ang pondo.

Hinamon ni Senador Jinggoy Estrada ang Bureau of Immigration na tiyaking idedeport ang mahigit 48K POGO workers na kinansela ang Visa.

Ayon kay Estrada, ang aksyon ng B.I. laban sa Illegal POGO workers ay tumutugon din sa kanyang panawagang magsagawa ng crackdown laban sa Illegal o Unlicensed Offshore Gaming Operators sa bansa.

Binigyang-diin ng Senador na walang nakukuhang economic gains ang gobyerno sa pagpapatuloy ng operasyon ng mga hindi lisensyadong POGO at kanilang mga manggagawa.

Hindi rin anya patas sa 34 na PAGCOR-approved POGOs at kanilang mga empleyado na nagbabayad ng 5% gross gaming revenue at 25% Withholding Tax sa gross income kung hahayaang manatili sa bansa ang mga Illegal POGOs.

Ipinaliwanag pa ng mambabatas na ang kanselasyon sa lisensya ng mga POGO ay mangangahulugan din ng kanselasyon ng Visa ng mga worker nito kaya wala nang dahilan para manatili sila sa bansa.

Ipinunto ni Estrada na sa loob ng 59 na araw ay dapat ipadeport na ang Illegal Aliens at hindi na dapat hayaan ang anumang iligal na transaksyon para manatili o magtagal sa bansa. —ulat mula kay Cely Ortega Bueno (Patrol 19)

Aminado ang Bureau of Immigration na hindi pa nila batid ang kinaroroonan ng mahigit 40K pogo workers na nakatakdang ipadeport ng gobyerno.

Ito ang inamin ni B.I. Deputy Commissioner Fortunato Manahan Jr., nang tanungin ni Senador Grace Poe sa pagdinig ng Senate Committee on Ways and Means.

Ayon kay Manahan, ang nasabing bilang ay tantsa pa lamang kung mayroong 200 manggagawa ang mahigit 200 POGO firms na may terminated licenses.

Gayunman, pinuna ni Poe ang B.I. official at iginiit na wala naman palang katiyakan ang 40,000 POGO worker o hindi aktuwal na bilang at pinaka-mahirap pa anya ay hindi rin masabi kung nasaan ang mga ito.

Kahapon nagsimula ang hearing ng Kumite na layuning timbangin ang benepisyo ng mga POGO at epekto nito sa lipunan.

Dagsa pa rin ang mga nagkukumahog na PUV operator sa mga tanggapan ng Land Transportation Franchising and Regulatory Board upang kumuha ng fare matrix, matapos ang unang araw ng implementasyon ng dagdag-pasahe.

Ang fare matrix o taripa ay requirement ng LTFRB para sa mga PUV bago maningil ng sobrang-pasahe sa mga mananakay.

Gayunman, 10% lamang ng 260,000 units sa buong bansa ang nakakuha ng taripa.

Hindi naman basta-basta ang pagkuha ng fare matrix para sa mga operator dahil kailangan nilang maghanda ng Official Certificate of Certificate of Registration;

Kopya ng Provisional Authority o Certificate of Public Convenience o (CPC), patunay na dumaan sa verification process ang CPC at lahat ng ito ay isasagawa sa mga tanggapan ng LTFRB.

Nanindigan si LTFRB chairperson Cheloy Garafil na mahigpit sila sa requirement bilang proteksyon sa mga pasahero at upang matiyak na hindi colorum ang mag-o-operate sa kalsada.

Noon pa anyang Setyembre nila inabisuhan ang mga operator na kumuha na ng fare matrix o bago pa man ipatupad ang fare increase at nagbukas na rin ng tanggapan tuwing Sabado upang ma-accommodate ang mga naghahabol na operator.