NATIONAL NEWS

Tinututukan na ng Department of Justice ang kumakalat na balita na mayroon umanong serye ng hawaan ng Sexually Transmitted Disease (STD) sa mga Philippine Offshore Gaming Operators (POGO) workers.

Agad ipinag-utos ng DOJ sa National Bureau of Investigation na magkasa ng imbestigasyon kahit hindi pa man natutukoy ang lawak ng hawaan.

Ayon kay DOJ spokesperson Mico Clavano, batay sa kanilang mga natanggap na ulat ay mayroong 15 hanggang 20 STD cases sa isang POGO Company.

Hindi na anya nila hihintaying paabutin pa sa mga Pilipino ang nasabing sakit.

Umaasa naman ang kagawaran na matitigil na ang iba’t ibang isyung lumalaganap dulot ng POGO.

Malayo pang matapos ang Covid-19 pandemic sa bansa.

Ito, ayon kay Dr. Jomar Rabajante ng U.P. COVID-19 pandemic response team, ay dahil inaasahang mananatili sa 2,000 ang cases kada araw hanggang katapusan ng taon.

Gayunman, nilinaw ni Rabajante na kaya ng pamahalaan ang Healthcare Utilization kahit mataas ang naitatalang arawang kaso sa bansa.

Umapela naman si Rabajante sa gobyerno na suriing mabuti ang mga pagluluwag sa restriksyon lalo na ang paglabas-masok ng mga dayuhan at Pilipino sa bansa kasabay ng panawagan sa publiko na patuloy na magsuot ng face mask.

Mahigpit na binabantayan ng PNP ang galaw ng mga pinaghihinalaang miyembro ng Communist Party of the Philippines-New People’s Army (CPP-NPA).

Ito ay kasunod ng naging kautusan ng Korte na nagbabasura sa petisyon ng gobyerno na ideklarang terorista ang naturang grupo.

Ayon kay Philippine National Police (PNP) chief Gen. Rodolfo Azurin Jr., magpapatuloy ang kanilang pagbabantay sa mga aktibidad ng mga suspected CPP-NPA, upang maiwasan ang ibat-ibang uri ng krimen sa bansa.

Iginiit ni Azurin na handa ang kapulisan na arestohin at kasuhan ang mga CPP-NPA member na masasangkot sa krimen at iba pang kaguluhan.

Nasa 20 million electronic version ng National ID ang ipapamahagi ng Philippine Statistics Authority (PSA) bago matapos ang taong 2022.

Ayon kay PSA Undersecretary Dennis Mapa, ang nasabing bilang ng Electronic version ng ID o “EPHIL-ID” ay idadagdag sa target na 30 milyong ID cards na planong ipamahagi bago sumapit ang taong 2023.

Sa datos ng PSA, umabot na sa P70 milyong ang nakapagparehistro na upang makakuha ng EPHIL-ID na maaari ding mai-laminate pero makukuha lamang ito sa mga PhilSys Registration Center.

Nauna nang nakapamahagi ang ahensya ng mga ID cards sa 1K indibidwal sa ilang lugar sa bansa partikular na sa National Capital Region (NCR), Bulacan, at Pampanga.

Binigyang pagkilala ng Manila City Government si Pole vaulter EJ Obiena dahil sa ibinigay nitong karangalan sa bansa.

Matatandaang dumalo si Obiena sa isang flag raising ceremony na pinangunahan nina Manila mayor Honey Lacuna at Vice mayor Yul Servo-Nieto, kasama ng iba pang opisyal sa Bulwagang Villegas sa Manila City Hall.

Nakatanggap si Obiena ng P300,000 cash incentives dahil sa nasungkit na 12 gold medals, dalawang silver medals, at tatlong bronze medals sa loob lamang ng walong buwan sa kanyang nilahukang European at Asian competitions.

Ayon sa Alkalde, hindi nasusukat ang galing at tapang na ipinakita ni Obiena sa laban kaya dapat itong parangalan at tularan.

Bukas ang Philippine Charity Sweepstakes Office (PCSO) sakaling imbestigahan sa Senado ang pagkakapanalo ng 433 bettor na maghahati-hati sa P236-M pesos na Jackpot prize sa Grand Lotto 6/55.

Ayon kay PCSO General Manager Mel Robles, kanilang kukumbinsihin ang mga nanalong bettor na kung maaari ay magpa-interview at lumabas sa publiko para mapatunayang walang naging daya at anomalya sa resulta ng Lotto draw.

Iginiit ni Robles na nagkataon lang na maraming tumaya sa nabolang kombinasyon at maging sila ay aminadong “kakaiba’” ang nangyari sa pagkakapanalo ng mahigit 400 mananaya.

Ibinunyag ng mga Pilipinong mangingisda mula sa Puerto Princesa na may ilang aktibidad na ginagawa ang mga Chinese vessel malapit sa spratly islands.

Ayon sa mga mangingisda, posibleng bumubuo ang mga ito ng artificial island dahil gabi-gabi nilang nakikitang nagbubuhos ng mga bato ang mga Chinese kung saan, namataan sa nasabing lugar ang tinatayang 30 vessel na may bandila ng China sakay ang ilang mga materyales.

Iginiit ng mga mangingisda na nangangamba sila sa kanilang nasaksihan dahil wala rin silang nakitang presensya ng Philippine Coastguard.

Matatandaang, una nang kinumpirma ng AFP na kamakailan ay may presensya ng hindi mabilang na Chinese vessels sa Julian Felipe Reef sa West Philippine Sea (WPS).