NATIONAL NEWS

Binigyang-pagkilala ni US President Joe Biden ang kontribusyon ng mga Filipino-Americans sa World War 2 at sa pagkakasa ng permanenteng pagbabago na nagpabuti sa farm labor conditions sa Amerika.

Ipinaabot ito ni Biden kasabay ng pagdiriwang ng Filipino American History Month (FAHM).

Sa nasabing event, ikinasa ng Filipino American National Historical Society (FANHS) na may temang “Celebrating our History and Legacies: 50 years of Filipino-American Studies, 40 years of the Filipino American National Historical Society, and 30 years of Filipino-American History Month”.

Kasalukuyan namang naghahanda ang FAHNS ng ilang aktibidad para sa isang buwang selebrasyon ng FAHM. - sa panulat ni Hannah Oledan

Kalaboso ang isang “most wanted person” sa Malabon na nakuhanan ng droga at armas.

Kinilala ng Malabon Police ang suspek na si Hennry Gasoso alyas Badiano.

Inisyuhan ang suspek ng warrant of arrest sa pamamagitan ni Malabon Regional Trial Court (RTC) presiding Judge Hon. Jimmy Edmund Gaoiran Batara.

Sa ngayon, nakakulong na si Badiano dahil sa kasong paglabag sa RA 9165 o Comprehensive Dangerous Drugs Act of 2002 at RA 10591 o Comprehensive Firearms and Ammunition Regulation Act.

Kasado na sa Oktubre a-26 ang virtual oathtaking ng mga pumasa sa nurse’s licensure examination.

Ito ang inanunsiyo ng Professional Regulation Commissions (PRC) kung saan gaganapin ang naturang seremonyas dakong alas dos ng hapon sa pangunguna ng PRC-Iloilo sa Microsoft teams o Zoom.

Ayon sa komisyon, required na suotin ng mga inductees ang kanilang gala uniform at cap na gagamit ng white backdrop.

Required ding kumuha ng online appointment schedule at piliin ang e-oath bilang transaksyon.

Magsasara ang registration period limang araw bago ang oathtaking ceremony. –  sa panulat ni Hannah Oledan

Umabot na sa 1.3 milyong residente sa Ilocos Norte ang nakatanggap na ng unang dose ng COVID-19 booster shot.

Ayon sa Department of Health – Regional Office, hiwalay pa ito sa 229,562 residenteng nakatanggap ng ikalawang booster.

Nasa 745,137 indibidwal ang target ng Ilocos region na mabakunahan ng booster.

Sa huling datos, pumalo na sa 3,814,343 ang fully vaccinated sa Ilocos region na 88% ng kanilang target.

Inaprubahan na ng Senate Committee on Finance ang panukalang 30.6 billion pesos na panukalang budget ng Department of Finance (DOF) para sa taong 2023.

Dahil dito, inaasahang ipapasa na sa plenaryo ng senate panel na pinangungunahan ni Senator Sonny Angara ang budget para sa final approval.

Nabatid na batay sa presenatasyon ni Finance Secretary Benjamin Diokno, kasama sa 2023 budget ang 4 billion pesos na alokasyon para sa modernisasyon ng Bureau of Internal Revenue (BIR) at Bureau of Customs (BOC).

Mas mataas ang panukalang budget ng DOF sa susunod na taon kumpara sa 26.7 billion pesos noong 2021.

Pormal nang nagsagawa ng groundbreaking ceremony ang Isuzu Philippines Corp. (IPC) para sa kanilang bagong sangay sa Laguna.

Kabilang si Gencars Dealer Group Chairman Edgard Cabangon sa mga nanguna sa ceremonial installation ng time capsule sa lote na pagtatayuan ng Isuzu San Pablo sa Maharlika Highway, Brgy. San Ignacio sa naturang lungsod.

Kasama rin sa mga naging kinatawan ng Gencars ang kanilang presidente na si Ms. Lerma Nacnac, Nina Cabangon, Danica Cabangon at iba pang mga opisyal ng kompanya.

Ang Gencars, Inc. ay isa sa mga nangungunang franchised dealership ng IPC sa kanilang operasyon sa Pilipinas.

Dumalo rin sa aktibidad sina Isuzu Phils. President Noboru Murakami, Exec. Vice Pres. Shojiro Sakoda, Vice Pres. for Sales Yoshiki Sato, at iba pa.

Sa kanyang mensahe, sinabi naman ni Marukami na kumpiyansa sila na sapat ang kanilang pasilidad para maserbisyuhan ang mga negosyo at kustomer sa lugar.

Sa panig naman ni Chairman Cabangon, nangako ito na patuloy na magkakaloob ang IPC at Gencars ng transport solutions sa mga Pinoy at ang pagpapalawak ng kanilang operasyon tulad ng bagong sangay sa San Pablo na isa sa mga paraan nila upang mabigyan ng de-kalidad na produkto at serbisyo ang kanilang mga kustomer.

Samantala, maging sina architect Rafael Dalmacio Tecson at Glenn Mansanares ay naimbitahan din sa event bilang mga contractor ng Isuzu San Pablo.

Nabatid na kasama sa itatayong gusali ang kanilang showroom kung saan ide-display ang mga light at commercial vehicles.

Nanguna si Pangulong Ferdinand “Bongbong” Marcos Jr. sa groundbreaking ceremony ng dalawang istasyon ng Mega Manila Subway Project (MMSP).

 Sa nasabing event, sinabi ni Pangulong Marcos Jr. na senyales ang MMSP sa buong mundo na handa ang administrasyon na manguna sa pagkilala, pagpupursige, at pagpapatupad ng mga proyekto na mabibigay ng kaginhawaan at kaunlaran para sa mga Pilipino.

 Umaasa naman ang pangulo na sa pamamagitan ng MMSP ay maiibsan ang kalbaryo sa pagbiyahe ng mga mananakay.

 Pinuri din ng pangulo ang husay at galing ng Tokyu-Tobishima-Megawide Joint Venture (TTM-JV), na katuwang ng pamahalaan sa kauna-unahang subway project sa bansa.

 Kasama ni PBBM sa event sina Department of Transportation (DOTR) Secretary Jaime Bautista na nagsimula kaninang alas-nueve ng umaga.

 Dumalo rin dito si Japanese Ambassador to the Philippines Kazuhiko Koshikawa at Pasig City Mayor Vico Sotto.

 Ngayon araw sisimulang isarado ang bahagi ng Meralco Avenue sa kanto ng Shaw Boulevard sa tapat ng Capitol Commons na magtatagal hanggang sa 2028.

Pangungunahan ng Department of Education – Cordillera Administrative Region (DEPED – CAR) ang selebrasyon ngayong taon ng National at World Teachers’ Day na magaganap sa October 5.

 Ito ang inihayag ni DEPED Undersecretary at Chief of Staff Epimaco Densing III sa memorandum na inilabas nitong September 30.

 May tema ang pagdiriwang na “gurong pilipino: dangal ng sambayanang pilipino (filipino teachers: pride of the filipino nation) na nagsimula noong september 5.

 Required na lumahok ang lahat ng regional directors, schools’ division superintendents, district supervisors, at school heads.A

Pumalo na sa 3.12 billion pesos ang pinsalang idinulot ng pananalasa ng bagyong Karding sa sektor ng agrikultura.

 Sa huling datos ng Department of Agriculture (DA) mas mataas ito kumpara sa 2.95 billion pesos na naitala noong Biyernes.

Apektado ng bagyo ang 170,762 ektarya ng pananim sa Cordillera Administrative Region (CAR), Ilocos region, Cagayan Valley, Central Luzon, CALABARZON, Bicol region, at Western Visayas.

 Ang bigas ang pinakanasira ng bagyo na umaabot sa 2.02 billion pesos matapos masira ang 163,162 ektaryang pananim nito.

 Sumunod sa pinaka-napinsala ang mga high-value crops na umaabot sa 831.29 million pesos.

 Sa ngayon, umabot na sa 500 million pesos ang inihandang quick response fund ng DA para sa mga lugar na nasalanta ng bagyo.