NATIONAL NEWS

Naipagkaloob na ng Department of Labor and Employment (DOLE) Zamboanga Sibugay Provincial Field Office ang Kabuhayan Starter Kit (KSK) sa kanilang mga benepisyaryo sa Diplahan, Zamboanga Sibugay.

Kabilang ang sets ng brewing machine na nagkakahalaga ng P30,000.

Ang disposisyon ng KSK ay bahagi ng DOLE Integrated Livelihood Program kung saan layon nito na mabigyan ng mga kagamitan ang mga benepisyaryong nasa informal sector na nagnanais magkaroon ng negosyo.

Samantala, pinangunahan ito mismo ni DOLE Sibugay Provincial Director Elamsalih Ungad kasama ang kanyang mga tauhan.

Hindi kuntento ang mga Pilipino at iba pang dayuhang domestic workers sa Hong Kong sa ibinigay na dagdag sahod at food allowance.

Insulto sa mga foreign domestic workers mula sa Pilipinas, Nepal, Sri Lanka at Indonesia ang inaprubahang 100 Hong Kong dollars na buwanang sahod at 23 dollars na dagdag sa food allowance.

Dahil dito, ipagpapatuloy nila ang pakikipaglaban para sa tamang dagdag na sahod at allowance.

Samantala, ilang Overseas Filipino Workers naman ang nagpasalamat dahil kahit papaano ay makatutulong pa rin ang wage increase at dagdag food allowance sa kanila.

Tiniyak ng Cooperative Development Authority (CDA) na may nakalatag na silang programa para makatulong sa mga magsasaka.

Ito’y kasunod na rin ng hiling ng Marcos administration na i-angat ang agrikultura sa bansa.

Ayon kay CDA Deputy Administrator Ray Elevazo, nakapokus sila sa food security habang binibigyan ng pagkakataon ang mga kooperatiba ng mga basic commodities.

Ipinabatid ni Elevazo na ngayong prayoridad ng presidente ang agrikultura, hindi lamang sa kooperatiba ng pagpapalayan nakatuon ang kanilang atensyon kundi pati na sa iba pang produkto gaya ng niyog at pangingisda.

Samantala, handa aniya ang CDA na maghatid ng tulong at mabigyan ng suporta  ang mga kooperatiba ng mga magniniyog at mayroon na silang pakikipag-ugnayan na ginagawa sa Philippine Coconut Authority hinggil dito.

Isinusulong sa kamara ang House Bill No. 1084 o ang pag-apruba sa prangkisa ng Bicol Light and Power Corporation upang bumuo, magpatakbo at magpanatili ng isang sistema ng distribusyon ng kuryente sa Rinconada o ang ika-limang distrito ng Camarines Sur.

Sa ilalim ng panukala na inihain ng apat na mambabatas sa kamara, nakasaad na ito’y bilang solusyon sa madalas na pagkawala ng kuryente sa Iriga City at mga bayan ng Baao, Balatan, Bato Buhi, Bula at Nabua sa CamSur.

Gayundin upang makapaghatid ng mas mahusay na serbisyo at murang kuryente sa mga konsyumer.

Nakasaad din sa panukala ang hindi dapat na pagsali sa naturang korporasyon sa anumang aktibidad na hahantong sa market power abuse.

Nabatid na sa ngayon ang Camarines Sur Electric Cooperative Inc. (CASURECO III) ang nagsusuplay ng kuryente sa Rinconada area. —sa ulat ni Tina Nolasco (Patrol 11)

Papalo na sa 46,000 katao ang wala pa ring matuluyan, isang linggo matapos ang pananalasa ni Bagyong Karding.

Ayon sa National Disaster Risk Reduction and Management Council (NDRRMC), nasa 300,000 na pamilya ang naapektuhan ng bagyo.

Sa 46,000 nasa 3,098 ang kasalukuyan pa ring nasa evacuation centers.

Habang 58,944 namang kabahayan ang napaulat na nasira dahil sa bagyo.

Samantala, tinatayang nasa mahigit tatlong bilyong piso na ang nawasak sa sektor ng agrikultura.

Nakatakdang i-deport ng Bureau of Immigration (BI) ang 372 foreign nationals na nasa bansa matapos maaresto sa magkakahiwalay na operasyon na isinagawa ng mga otoridad.

Sa kabuuang tala, 43 na ang naturn over sa BI habang ang natitira ay nasa kustodiya pa ng pulisya.

Samantala, mayorya sa mga nahuli ay mga Chinese nationals. —sa ulat ni Aya Yupangco (Patrol 5)

Sumampa na sa mahigit 80 ang bilang ng mga nasawi sa Southeastern United States dahil sa pananalasa ng Hurricane Ian at inaasahang tataas pa ito dahil sa nagpapatuloy na Search and Rescue Operations ng mga otoridad.

Nasa 85 storm-related deaths ang nakumpirma mula nang mag-landfall sa gulf coast ng Florida ang Hurricane Ian, na inilagay sa Category 4.

Daan-dang katao naman ang nasagip ng emergency workers mula sa mga bahay at gusali na tinamaan ng kalamidad.

Inaasahang aabot sa bilyon-bilyong dolyar ang pinsala na idinulot ng Hurricane Ian sa mga residente ng Florida at Carolinas, habang kwinestyon naman ang ilang opisyal sa naging pagtugon ng mga ito sa kalamidad.

Nananatili pa rin sa 25 evacuation centers ang 756 na pamilya o 3,521 katao na naapektuhan ng Bagyong Karding.

Sa datos ng Department of Social Welfare and Development (DSWD) Disaster Response Operations Monitoring and Information Center, nasa 275,631 pamilya o 983,532 na mga indibidwal ang naapektuhan ng bagyo mula sa 1,932 barangays sa Regions I, II, III, CALABARZON, V at CAR.

Aabot naman sa 38,609 na kabahayan ang partially damaged habang 7,422 ang totally damaged.

Sa ngayon ay umabot na sa mahigit P53 million ang naibigay na tulong sa mga naapektuhan ng Bagyong Karding.