NATIONAL NEWS

Umabot sa 16,375 na mga mag-aaral ang nakatanggap ng 20% discount sa pamasahe sa Metro Rail Transit-3 (MRT-3).

Naitala ito mula Agosto 22 hanggang Setyembre 29.

Sa nasabing bilang, 3,509 na mga estudyante ang nakinabang sa naturang diskwento sa buwan ng Agosto habang 12,866 naman sa buwan ng Setyembre.

Maaaring ma-avail ng mga mag-aaral ang nasabing discount sa MRT-3 mula Lunes hanggang Linggo, sa buong oras ng mga operasyon ng tren.

Kinakailangan lamang na magprisinta ng valid student ID o orihinal na kopya ng enrollment o registration form sa pagbili ng single journey ticket sa ticketing booth.

Gumulong na ang bilateral military exercise ng Pilipinas at Amerika ngayong araw na ito.

Ayon sa Philippine Marine Corps sinimulan na ang 6th iteration ng kanilang Kamandag exercises katuwang ang US Armed Forces sa Philippine Navy Officers Club sa Taguig City at ito ay tatagal hanggang October 14.

Sinabi ng PMC na ito ang kauna-unahang pagkakataon na makikiisa bilang observers ang military personnel mula Japan at South Korea.

Layunin ng exercises na pagtibayin pa ang bilateral cooperation at interoperability ng mga troop sa pagsasagawa ng combined tactical operations para mapaganda ang kapasidad sa special operations, coastal defense capability, humanitarian assistance at disaster response.

Bukod pa ito sa chemical, biological, radiological at nuclear operations.

Tiwala naman ang pmc na makakasama nila sa ganitong exercise ang iba pang foreign military allies para mapaigting pa ang iba’t ibang military operations.

Mas palalakasin ng Department of agriculture (DA) ang MASAGANA 99 o ‘’Kadiwa’’ program ng pamahalaan.

Ayon kay DA Undersecretary Kristine Evangelista, layunin ng kanilang ahensya na magkaroon ng alternatibong produksiyon ng mga gulay na pagkukuhanan ng mga magsasaka na siya namang pakikinabangan ng mga consumer.

Aminado si Evangelista, na hirap ang kanilang ahensya na rendahan ang mataas na presyo ng mga gulay hindi gaya ng ibang produkto sa mga pamilihan dahil sa epektong idinulot ng bagyong Karding.

Ito rin umano ang dahilan, kung bakit hindi makapagpatupad ng Suggested Retail Price (SRP) ang kanilang ahensya.

Sinabi pa ni Evangelista, na nakikipag-ugnayan na rin sila sa mga Local Government Units (LGUs) at mga market master o ang namamahala sa production service upang ibahagi ang tamang presyuhan sa mga gulay para maprotektahan ang kanilang mga consumer.

Muling pina-alalahanan ng Department of Health (DOH) ang publiko na maging maingat pa rin sa COVID-19, lalo’t malapit na ang pasko.

Ito, ayon kay DOH officer-in-charge Maria Rosario Vergeire, ay dahil marami pa ring mamamayan ang lantad sa naturang sakit sa gitna ng mga inaasahang kaliwa’t kanang pagdiriwang.

Pinayuhan din ni Vergeire sa kumpanya na gawing ligtas ang mga Christmas gathering at kailangang masunod ang health and safety protocol laban sa virus. —sa panulat ni Jenn Patrolla

Pinalawig na hanggang sa October 31 ang validity nang pagpaparehistro ng mga sasakyan na may plakang nagtatapos sa 8.

Ayon sa Land Transporation Office (LTO), ang mga sasakyan na may plakang nagtatapos sa 8 ay mabibigyan ng pagkakataon hanggang katapusan ng buwan para makapag-parehistro nang walang penalty.

Extended din ang bisa o validity ng driver’s license, student permit, conductor’s license at medical certificate na may na nag-expire noong Agosto at Setyembre.

Gayunman, may bisa pa ang mga holder ng lisensiya at certificate hanggang sa Oktubre a – 31. —sa panulat ni Jenn Patrolla

Ipinanawagan ni Quezon City 5^th District Rep. Alfred Vargas na bigyan ng dagdag na benepisyo ang mga bata at mga solo parents tuwing may sakuna at bagyo.

Ayon kay Vargas, ang mga lokal na pamahalaan ang nangunguna sa pagbibigay ng agarang tulong sa mga sektor na pinaka-lantad sa kalamidad.

Sa panukalang “Rapid Assistance Program for Disaster Victims Ordinance of Quezon City”, nais ni Vargas na gawing bahagi sa isang komprehensibong plano ang mga programa at serbisyo ng QC LGU para sa mga nasalanta ng kalamidad. —sa panulat ni Jenn Patrolla

Pinaalalahanan ng Department of Transportation (DOTr) ang publiko, transport operators at driver na tuloy ang fare hike simula ngayong araw.

Ayon kay Transportation secretary Jaime Bautista, dapat munang ipaskil ng mga PUV ang bagong fare matrix bago magpatupad ng panibagong dagdag pasahe.

Simula ngayong araw, P12 na ang minimum fare sa traditional jeepney habang P14 sa modern jeepney; P13 na ang pamasahe sa ordinary bus habang P15 sa air-conditioned bus;

P45 na ang flagdown rate sa taxi habang P55 sa AUV (TNVS).

Samantala, patuloy na pinag-aaralan ng kagawaran ang hirit ng MRT-3 at LRT-2 na taas-pasahe. —sa panulat ni Jenn Patrolla