NATIONAL NEWS

Bahagyang tumaas ang seven-day positivity rate ng COVID-19 sa National Capital Region (NCR).

Batay sa datos ng OCTA Research Group, sinabi ni Dr. Guido David na ito ay tumaas sa 19% noong October 3 mula sa 18.7% noong September 26.

Pero mas mababa ito ng kaunti kumpara sa 19.1% positivity rate na naitala noong October 2.

Ang positivity rate ay tumutukoy sa porsyento ng bilang ng mga nagpositibo sa COVID-19 mula sa kabuuang bilang ng mga nagpa-test.

Sumampa na sa kabuuang 450 measles o tigdas at rubella cases ang naitala sa bansa mula January 1 hanggang September 17, 2022, mas mataas ito ng 153% kumpara sa kaparehong panahon noong nakaraang taon.

Base sa pinakahuling National Measles and Rubella data ng Department of Health (DOH), nasa 178 cases ang kanilang naitala noong January 1 hanggang September 17, 2021.

Karamihan sa kaso ay mula sa CALABARZON, sinundan ng Central Visayas at National Capital Region (NCR).

Samantala, sinabi ng World Health Organization (WHO) na isang “highly contagious” o nakakahawang sakit ang measles dahil sa virus na naipapasa sa pamamagitan ng direct contact at ng hangin.

Kabilang sa sintomas nito ang mataas na lagnat, ubo, sipon, mapula at maluha-luhang mata, at rashes.

Pinatitiyak ni Albay 2nd District Representative Joey Salceda na mapapaigting ng pamahalaan ang pagbabakuna kontra tigdas o measles.

Kasabay ito ng babala na maaaring magdulot ng outbreak ng tigdas ang napipintong pagpapatupad ng 100% face-to-face classes sa Nobyembre.

Tinukoy pa ng kongresista na base sa datos ng Department of Health (DOH), 63% pa lang ng mga bata at mga sanggol ang bakunado laban sa measles mula sa target na 95%.

Mungkahi naman ng kongresista na samantalahin ang face-to-face classes para mapaigting ang bakunahan sa nasabing sakit at upang maipaliwanag sa mga magulang ang protesksyong dulot nito.

Dapat din aniyang palakasin pa ng DOH, Department of Education (DepEd), at mga lokal na pamahalaan ang kanilang ugnayan upang mas maraming bata ang mabakunahan at maprotektahan mula sa tigdas.

Halos 80% nang handa ang Commission on Elections (COMELEC) para sa pagdaraos ng Barangay at Sangguniang Kabataan Elections (BSKE) kung ito ay matutuloy sa December 5, 2022.

Ito ang inihayag ni COMELEC Spokesperson John Rex Laudiangco sa gitna ng hinihintay na paglagda o maaaring pag-veto ni Pangulong Bongbong Marcos Jr. sa panukalang pagpapaliban sa BSKE at sa halip ay idaos na lamang sa October 2023.

Sinabi ni Laudiangco na batid ng komisyon na nasa kamay na ng presidente ang panukala na aprubado na ng mataas at mababang kapulungan ng kongreso.

Aniya, lahat ng procurement o yung pagbili ng gamit mula sa ballot papers, indelible ink, ballpens at ballot secrecy folder ay idedeliver na sa mga darating na linggo.

Pagdating sa printing, ani Laudiangco umaarangkada na ang National Printing Office (NPO) at ito ay 24 oras na o tuloy-tuloy.

Natunton ng mga militar ang dalawang kampo Bangsamoro Islamic Freedom Fighters (BIFF) -Karialan Faction sa Maguindanao Del Sur.

Sinabi ni 601^st Brigade Commander Colonel Oriel Pangcog na nakontrol nila ang dalawang lungga ng BIFF sa Sitio Pedtad, Barangay Pagatin 1 at Sitio Talitay, Barangay Inaladan sa Shariff Saydona Mustapha.

Nabatid na nagsitakas ang mga terorista na sinasabing pinamumunuan nina Kumander Yusa Ganoy, Abdulkarim Lumbatan Hashim alyas Boy Jacket, Ben Harris, Emarudin Kulaw at alyas Alpha King nang matunugan ang pagdating ng mga miyembro ng Joint Task Force Central sa kanilang mga kampo matapos ang ilang oras na bakbakan.

Aniya, posibleng may nasugatan o nasawi sa panig ng BIFF dahil sa mga patak ng dugo na nakita sa kampo ng mga ito.

Maliban dito, may mga nadiskubre ding materyales sa paggawa ng bomba ang mga militar sa mga nasabing lugar. —sa ulat ni Gilbert Perdez (Patrol 13)