Nag-negatibo sa drug test si Senator Robin Padilla matapos boluntaryong sumailalim sa testing sa Philippine Drug Enforcement Agency (PDEA).
Ginawa ito ni Padilla kasunod ng mungkahi ni Congressman Ace Barbers na dumaan sa mandatory drug test ang mga celebrities bilang sila ay iniidolo ng publiko.
Ayon kay Padilla, ginawa niya ang hakbang para suportahan ang PDEA sa kanilang war on drugs kasabay ng panawagan sa sambayanan na suportahan ang laban na ito.
Iginiit naman ni padilla na mas mainam na mag-voluntary drug test sa halip na mandatory drug test, dahil maaaring lumabag sa karapatang pantao kapag ginawang mandatory ang drug test.
Inihambing naman ng senador ang banta ng iligal na droga sa terorismo, kung saan malaki ang epekto nito sa publiko.
Samantala, inihayag naman ni PDEA Director-General Wilkins Villanueva na kayang ma-detect ng drug test ng pdea ang lahat na dangerous drugs na declared ng united nations.
Bukas din ang pdea para sa mga sibilyan, kasama ang mga artista, na magpapasailalim sa drug test. - sa ulat ni Cely Ortega-Bueno