NATIONAL NEWS

Umapela ang Department of Migrant Workers ng dagdag-pondo para sa kanilang capital outlay sa susunod na taon.

Sa pagdinig ng Senado sa 2023 budget NG DMW, tinukoy ni Undersecretary for Finance and Internal Affairs Atty. Maria Anthonette Velasco-Allones na malaki ang binawas ng Department of Budget and Management sa kanilang orihinal na budget proposal.

Mula sa P7.938 billion na ipinanukala ng DMW, aabot lamang sa P3.509 billion ang inaprubahan ng DBM.

Ayon naman kay Migrant Workers Secretary Susan “Toots” Ople, kailangan ng dagdag-pondo lalo na sa capital outlay ng ahensya dahil magtatayo pa sila ng mga regional offices.

Bukod pa anya ito sa mga ospital para sa mga ofw at kanilang mga pamilya at surveillance laban sa mga illegal recruiter.

Nasa P460.4 million ang hirit na pondo ng DMW sa kanilang capital outlay pero P50.5 million lang ang ibinigay ng DBM o 89% ang ibinaba mula sa original proposal.

Kukulangin din ang nasabing pondo dahil plano ng ahensya na maglunsad ng ‘digitalization’ upang masawata ang korapsyon at mapadali ang proseso ng pag-a-apply ng mga ofw. —- Mula sa ulat ni Cely Ortega-Bueno (Patrol 19)

May hawak ng lead ang Southern Police District (SPD) sa kaso ng pananambang at pagpatay sa beteranong broadcaster na si Percival Mabasa o Percy Lapid.

Ito ang kuhang video sa dashcam ng sasakyan ni Mabasa at cellphone na itinurn-over ng pamilya ng biktima.

Ayon kay Roy Mabasa, nakababatang kapatid ni ka Percy at dati ring mamamahayag ng Manila Bulletin, inaasahan nila na magkakaroon na ng resulta ang imbestigayon ng pulisya.

Pinag-aaralan na rin anya ng SPD ang c.c.t.v. footage na galing naman sa barangay na nakasasakop sa BF Resort Subdivision, Las Piñas City na pinangyarihan ng krimen.

Batay sa inisyal na report, ang lalaki na nakita sa footage ang pinaniniwalaang bumaril at pumatay kay Lapid.

Samantala, inihayag naman ni Las Piñas Police Chief, Col. Jaime Santos na hinihintay pa rin nila ang resulta ng digital forensic test sa cellphone ni ka Percy upang matukoy ang huling nakausap nito o kung nakatanggap ng death threat.

Lumarga na ang tulong kabuhayan sa balik probinsya program ng gobyerno makaraang simulan ang inisyal na distribusyon ng mga alagang baboy para sa balik probinsya, bagong pag-asa program beneficiaries.

Ayon sa Department of Agriculture, ang mga principal beneficiaries sa lalawigan ng Isabela ay nakatanggap ng tig-apat na alagang baboy habang dalawa ang natanggap ng iba pang mga benepisyaryo.

Nasa 116 heads na baboy ang naipamahagi sa mga benepisyaryo sa mga bayan ng Tumauini, Roxas at Sta. Maria simula Setyembre a – 28.

Una nang naantala ang pamamahagi ng mga alagang baboy dahil sa kakulangan ng supply bunsod ng pagkalat ng african swine fever na lubhang naka-apekto sa mga hog raiser sa Cagayan Valley Region.

Mamamahagi rin ng libreng feeds sa mga benepisyaryo para sa tatlong buwan na pagkain ng kanilang mga alagang baboy.

Inihayag ng Philippine National Police (PNP) na wala pa silang hawak sa ngayon na persons of interest kaugnay sa nangyaring pananambang sa radio broadcaster-commentator ng DWBL na si Percival Mabasa o mas kilala bilang si Percy Lapid.

Ayon kay PNP Chief Gen. Rodolfo Azurin Jr., hindi pa sapat ang hawak nilang ebidensiya at maraming posibleng maging persons of interest kaya hindi pa nila ito matukoy.

Matatandaang una ng sinabi ng Presidential Task Force on Media Security (PTFOMS) na posibleng work related ang dahilan ng pagpatay sa biktima dahil sa pagiging hard hitting radio commentator nito.

Sa kabila nito, tiniyak ni Azurin na kanilang maibibigay ang hustisya sa pagkamatay ni ka-Percy.

Nilinaw ng Philippine Air Force (PAF) na maaaring gamitin ni Pangulo Ferdinand “Bongbong” Marcos Jr., ang gulfstream g280 executive jet ng Pilipinas saan man ang kanyang destinasyon.

Ito ay makaraang kwestyunin ng mga kritiko si PBBM, dahil ginamit umano nito ang naturang eroplano papuntang Singapore noong weekend para manood ng Formula One Grand Prix.

Ayon kay PAF Spokesperson Col. Ma. Consuelo Castillo, ang executive jet ay isang command and control aircraft na nagpapahintulot kay PBBM na gampanan ang kanyang tungkulin bilang commander in chief saan mang bansa ito magpunta.

Iginiit pa ni Col. Castillo na mandato ng 250th Airlift Wing na mabigyan ng ligtas na air transportation ang pangulo maging ang kaniyang pamilya.

Inihayag ni Political Analyst Prof. Jean Franco, na malaking tulong sa pagsasaayos ng bagong adinistrasyon ang maagang pagbibitiw sa puwesto ng mga gabinete.

Ayon kay Franco, posibleng nais lamang ng mga opisyal na manatili sa unang isandaang araw ni PBBM bago umalis sa kanilang serbisyo.

Sinabi pa ni Franco, na magandang oportunidad at malaking tulong ito sakaling maaprubahan na ng Commission on Appointments (CA) ang pagtatalaga sa mga bagong opisyal na papalit kina dating Press Secretary Atty. Trixie Cruz-Angeles; dating Commission on Audit (COA) Chairman Jose Calida; at dating Executive Secretary Atty. Vic Rodriguez.

Sinabi din ng opisyal na matagal nang umiiral ang isyung faction sa loob ng malakanyang noon pang panahon ni dating Pangulong Benigno Aquino III pero hindi na ito dapat makaapekto sa pagbubuo ng desisyon sa malakanyang, hinggil sa mga bagong nabanggit na puwesto.