NATIONAL NEWS

Inaasahang mananatiling mataas ang presyo ng mga bilihin sa mga nalalabing buwan ng taong 2022.

Bunsod ito ng mataas na transport at food costs, na dala ng humihinang halaga ng piso at pinsalang dulot ng Bagyong Karding sa sektor ng agrikultura.

Nito lamang Setyembre, bumilis sa 6.9% ang inflation rate kumpara sa 6.3% noong Agosto dahil sa mas mahal na pagkain at utilities sa gitna ng mataas na presyo ng oil products.

Ayon kay National Statistician Dennis Mapa, pinaka-lantad sa inflation ang pagkain na inaasahang magmamahal sa Nobyembre hanggang Disyembre.

Inihayag naman ng Department of Finance na isa sa mga paraan upang mapabagal ang inflation ay tutukan ang domestic supply ng pagkain at iba pang commodity prices.

Kabilang na rito ang pagpapaigting na tulong ng gobyerno sa mga magsasaka, gaya ng pamamahagi ng fertilizer at libreng binhi.

Tiniyak ng power unit ng San Miguel Corporation (SMC) na sapat ang energy supply, lalo para sa mga customer ng Meralco.

Sa kabila ito ng pasya ng Energy Regulatory Commission (ERC) na ibasura ang hirit ng SMC Global Power at Meralco na dagdag-singil dahil sa mahal na panggatong na ginagamit ng mga planta ng San Miguel.

Ayon sa SMC Global Power (SMCGP), ang desisyon ng ERC na ibasura ang power rate hike petition ay hindi lamang pipilay sa kumpanya, kundi magiging dagdag-pasanin din sa consumers na maaaring kaharapin ang mas mataas na singil.

Gayunman, makatitiyak anila ang mga consumer na hindi mababalam ang i-sinu-supply nilang kuryente sa Meralco.

Patuloy din umanong hahanap at gagawa ng mga paraan ang San Miguel upang maresolba ang issue.

Ipinanawagan na ni Bayan Muna Partylist Rep. Carlos Zarate ang pagrepaso sa Electric Power Industry Reform Act (ERIRA) Law.

Sa harap ito ng bantang dagdag-singil ng Meralco at power units ng San Miguel Corporation makaraang ibasura ng Energy Regulatory Commission ang kanilang hirit na power rate hike.

Ayon kay Zarate, hindi dapat ipinapasa sa taumbayan ang lugi ng mga kumpanya.

Dapat lamang anyang repasuhin ng kongreso ang EPIRA dahil hindi naman naibaba ng nasabing batas ang presyo ng kuryente sa bansa.

Nanganganib na muling tumaas ang singil sa kuryente ng Meralco.

Aminado ang Energy Regulatory Commission na kahit ibinasura ang hirit na power rate hike ng Meralco at power units ng San Miguel Corporation, hindi nila matiyak na hindi tataas ang singil sa mga susunod na buwan.

Maaari namang kumuha ng kuryente sa ibang source ang Meralco sakaling umatras na sa power supply contracts ang mga planta ng SMC matapos ibasura ang kanilang hiling na nag-ugat sa pagsirit ng presyo ng panggatong.

Gayunman, iginiit ni Department of Energy Spokesman Wimpy Fuentebella na dapat igalang ng power distributor at SMC ang pasya ng ERC.

Inisnab naman ni ERC Chairperson, Atty. Monalisa Dimalanta ang kalkulasyon ng San Miguel na 30 centavos per kilowatt hour lang ang itataas ng singil kung pinagbigyan ang hiling.

Samantala, nagbanta naman si Meralco Regulatory Management Head, Atty. Romulo Valles na maniningil sila ng sangkaterbang multa kung kakalas sa kontrata at tumigil ang mga planta sa pagsu-supply ng kuryente sa kanila.

Malaki pa rin ang ginagastos ng mga Filipino sa pagpapa-ospital kahit mayroong expanded healthcare sa ilalim ng universal health care o UHC Law.

Inamin ito ng Philippine Health Insurance Corporation o PhilHealth sa hearing ng Senate Committee on Government Corporations, kahapon.

Sa katunayan, ayon kay PhilHealth Officer-In-Charge Eli Dino Santos, ay 34% ng hospital bill ay mula mismo sa sariling bulsa ng mga pinoy batay sa isinagawang pag-aaral ng nasabing health insurer noong 2019.

Nangangahulugan anya ito na sa bawat pisong gastos ay trenta’y kwatro sentimos ang out-of-pocket expense.

Mayroon ding pag-aaral ang Philippine National Health accounts ng Philippine Statistics Authority na 44.7% ng hospital bill ay mula sa bulsa ng mga pasyente.

Dahil dito, umaasa si Senator Joel Villanueva na babalangkas ng mekanismo ang PhilHealth upang mapababa ang out-of-pocket hospital expenses ng mga pinoy.

Gayunman, inihayag ni Senator Alan Peter Cayetano, chairman ng kumite, na base sa OCTA Research survey, 57% ang hindi mga miyembro ng PhilHealth.

Idinagdag ni Cayetano na sa katunayan ay mas maraming mayaman at may-kayang pasyente ang gumagamit ng PhilHealth benefits kumpara sa mga indigent, dahil hindi alam ng mga mahirap na otomatikong miyembro sila ng PhilHealth.