NATIONAL NEWS

Itinuturing ng karamihan sa mga Pilipino ang pagkontrol ng inflation bilang pangunahing problema sa bansa na kailangang agaran na tugunan ng pamahalaan.

Batay sa pinakahuling resulta ng Pulse Asia Survey na ginanap noong September 17 hanggang 21 sa 1,200 respondents, 66% ang nagsabing most urgent national concern sa gitna ng patuloy na pagtaas ng presyo ng mga bilihin ang pagkontrol sa inflation.

44% naman ang nagbanggit ng pagtataas ng sahod ng mga manggagawa, 35% ang job creation habang 34% ang nagsabing poverty reduction ang pangunahing problema ng bansa.

Samantala, kabilang sa iba pang nabanggit na urgent national concern ang pagbabawas ng ibinabayad na tax, pagkontrol sa hawaan ng COVID-19, proteksyon ng mga OFWs at paghahanda sa pagharap sa anumang uri ng terorismo.

Umarangkada na ang National Housing Priority Program sa iba’t ibang bahagi ng bansa.

Sinabi ni Department of Human Settlements and Urban Development (DHSUD) Secretary Jose Rizalino Acuzar na naisagawa ang Pambansang Pabahay para sa Pilipino Program sa pakikipagtulungan sa mga lokal na pamahalaan.

Layon ng naturang programa na makapagtayo ng isang milyong housing units kada taon o anim na milyong housing units sa ilalim ng administrasyon ni Pangulong Ferdinand Marcos, Jr.

Ayon sa DHSUD, opisyal na nagsimula ang naturang programa noong Setyembre kung saan nagdaos ng ground breaking ceremonies sa Quezon City, Bacolod City, Roxas City, Iloilo City at Mariveles, Bataan.

Umaasa ang Teachers’ Dignity Coalition (TDC) na tutulungan sila ng Department of Education sa kanilang hirit na taas-sahod ng mga guro.

Sa panayam ng DWIZ, iginiit ni TDC Chairperson Benjo Basas na malaki ang maitutulong ni Vice President at Education Secretary Sara Duterte sa pagsusulong ng umento sa sweldo ng mga guro sa bansa.

Mababatid na hiniling rin ng ilang grupo ng mga guro na maitaas sa salary grade 15 ang entry-level salaries mula sa kasalukuyang salary grade 11.

Hinimok naman ni Basas ang mga guro na huwag mawalan nang pag-asa at huwag sumuko sa pagtuturo sa kabila ng mga kinakaharap nilang mga hamon.

Sisimulan na ng Commission on Elections (COMELEC) ang pilot testing ng “Register Anywhere” System nito sa Metro Manila.

Ayon kay COMELEC Spokesperson John Rex Laudiangco, sa pamamagitan ng naturang sistema ay mapapadali na ang pagpapatala ng publiko, kung saan bubuksan ito sa ilang piling malls.

Dalawang sets ng registration booths ang ilalagay sa satellite COMELEC sites, kung saan isa rito ay para sa mga aplikante na residente ng siyudad o munisipalidad habang ang isa naman ay para sa non-residents.

Ipapaskil ang pangalan ng mgaregistrant sa Office of the Election Officer na may hurisdiksyon sa siyudad o munisipalidad na kanilang tinitirhan, at maging sa kanilang mga barangay alinsunod sa public notice requirement.

Nasa 692 pamilya o 3,170 indibidwal na naapektuhan ng pananalasa ng Bagyong Karding ang nananatili pa rin sa 20 evacuation centers.

Batay sa DSWD Disaster Response Operations Monitoring and Information Center Report, umabot sa 8,784 families o 43,254 persons ang nanunuluyan sa ibang mga lugar.

Nasa 279,304 pamilya o 998,487 indibidwal ang naapektuhan ng bagyo sa 1,951 barangays sa Regions I, II, III, CALABARZON, V at CAR.

Napinsala ng Bagyong Karding ang ilang mga kabahayan kung saan 7,824 ang totally damaged habang 45,889 ang partially damaged.

Sumampa naman sa P138,539,388.51 na halaga ng tulong ang naipamahagi ng Department of Social Welfare and Development, mga lokal na pamahalaan at iba pang partners, sa mga naapektuhan ng kalamidad.

Umabot na sa 163.03 milyong pisong halaga ng medical assistance ang naipalabas ng Philippine Charity Sweepstakes Office (PCSO) sa 23,039 eligible beneficiaries sa buong bansa nitong Setyembre.

Ayon sa state lottery agency, ang naturang pondo ay naipamahagi sa mga benepisyaryo sa pamamagitan ng medical access program ng ahensya.

Umabot sa 33.9 million pesos na halaga ng tulong ang naibigay sa 2,559 benepisyaryo sa National Capital Region; habang 4,962 individuals naman mula sa Northern at Central Luzon ang nakatanggap ng P36.5 million na tulong; at 6,871 benepisyaryo mula sa Southern Tagalog at Bicol Region ang nabigyan ng assistance na nagkakahalaga ng P37.6 million.

Sa visayas, nasa 3,800 indibidwal ang napagkalooban ng P25.7 million na medical aid habang 44,847 individuals naman ang nakatanggap ng P29.1 million na tulong sa Mindanao.

Nakiisa na rin ang Estados Unidos sa paghingi ng hustisya kaugnay sa pagpaslang kay brodkaster Percy Lapid.

Ito ay matapos i-welcome ng US Embassy ang pagtiyak ng mga otoridad hinggil sa puspusang imbestigasyon sa nasabing krimen.

Binigyang diin ng US Embassy na mahalaga ang freedom of expression sa pagbuo ng magandang bukas para sa mga Pilipino kayat tiwala silang maibibigay ang hustisya sa pagpatay kay Lapid.

Una nang kinundena ng Canada at The Netherlands ang pananambang kay Lapid.