HOT STORIES OF THE WEEK

Namemeligro pang mag-mahal ang lokal at imported na baboy bago mag-Disyembre.

Aabot sa P20 ang posibleng itaas ng presyo ng kada kilo ng baboy dahil sa pagmahal ng raw materials ng feeds at patuloy na paghina ng piso kontra dolyar.

Ayon kay Agricultural Sector Alliance of the Philippines president Nick Briones, naka-apekto rin ang African Swine Fever (ASF) na hanggang ngayo’y dama ng mga hog raiser sa bansa.

Marami pa anyang rehiyon ang may mga kaso ng ASF at nasa 22 bayan sa 12 lalawigan ang may mga aktibong kaso.

Iginiit ni Briones na hindi pa nakababawi ang mga magbababoy dahil hindi pa tuluyang nasosolusyonan ang kanilang problema.

Inaasahang tataas pa ang demand sa baboy at manok habang papalapit ang holiday season.

Nagsanib puwersa na ang Department of Social Welfare and Development (DSWD) at Public Attorneys Office (PAO) laban sa mga tatay na ayaw magbigay ng sustento sa kanilang mga anak.

Ito ay matapos lagdaan ni DSWD secretary Erwin Tulfo at PAO chief Atty. Persida Acosta, ang isang Memorandum of Agreement (MOA) kung saan, kanilang hahabulin ang mga amang nakalimot ng obligasyon sa kanilang mga anak mula sa kanilang ex-wife, dating kinakasama, o girlfriend na naanakan.

Ayon kay Tulfo, posibleng maharap sa kaso ang mga tatay na hindi nagbibigay ng suporta para sa kanilang mga anak na 18 years old pababa.

Sinabi ni Tulfo, sa una at panagalawa ay padadalhan lamang ang mga ito ng letter bilang warning, pero sakaling magmatigas at umayaw ang mga tatay na gampanan ang kanilang tungkulin sa kanilang mga anak, papasok na ang PAO para tulungan ang mga ina ng bata na magsampa ng kaso sa Korte.

Samantala, iginiit naman ni Acosta na walang dahilan upang hindi sustentuhan ng mga tatay ang kaniyang anak lalo na kung mayroon naman itong hanapbuhay o pinagkakakitaan dahil ito ay nakasaad sa batas.

Paglabag sa Article 194 at 195 ng Family Code of the Philippines at Republic Act 9262 o ang Anti-Violence Against Women and their Children Act of 2004, ang isasampang kaso sa mga tatay na pabaya sa kanilang pamilya o mga anak.

Maaring magmulta ang mga pabayang ama ng P100-K hanggang P300-K o pagkakakulong ng hanggang 20 taon.

Isinusulong sa Kamara ng isang mambabatas ang pagkakaroon ng Rice allowance sa mga manggagawa.

Ayon kay Agri party-list Rep. Wilbert Lee, dapat nang masimulan ng Kamara ang deliberasyon sa panukalang magbibigay ng “rice allowance” sa mga empleyado ng pribadong sektor upang matugunan ang tumataas na presyo ng bilihin sa bansa.

Nauna nang inihain ni Lee ang House Bill no. 1296 o ang batas na nagtataguyod ng corporative farming at nagbibigay ng mga insentibo para sa epektibong pagpapatupad nito.

Layunin nitong mahikayat ang “corporative farming” na siyang magbibigay-daan upang magpatupad ng panukala na mapapakinabangan hindi lamang ng mga empleyado sa pribadong sektor, kundi pati na rin ng mga magsasaka.

Bukod pa dito, nais din ng naturang panukala na magkaroon ng pakikipagtulungan sa pagitan ng mga organisasyon ng pagsasaka at mga komunidad na may mga domestic corporation.

Patuloy na makakaranas ng pag-ulan, pagkulog at pagkidlat ang ilang lugar sa Luzon partikular na ang northern portion ng Occidental Mindoro; northern Palawan kasama na ang Calamian at Cuyo Group of Island.

Ayon kay PAGASA weather specialist Ana Clauren, bunsod parin ito ng Southwest monsoon o Hanging Habagat at Low Pressure Area (LPA) na namataan sa layong 715 kilometers East of Baler Aurora at kasalukuyang binabantayan sa labas ng Philippine Area of responsibility (PAR).

Mababa naman ang tiyansa nito na maging isang bagyo at inaasahang kikilos ito patungong silangang at papalayo ng PAR.

Asahan naman na makararanas ng maulap na kalangitan na may pagbugso ng pag-ulan sa Metro Manila, Zambales, Bataan, CALABARZON, at MIMAROPA bunsod parin ng Hanging Habagat.

Magiging maaliwalas naman ang panahon sa nalalabing bahagi ng Luzon pero mataas parin ang tiyansa ng pag-ulan sa hapon hanggang sa gabi dahil sa thunderstorms.

Wala namang inaasahang malawakang pag-ulan sa Visayas at Mindanao maliban nalang sa mga isolated rain showers lalo na sa hapon hanggang sa gabi.

Agwat ng temperatura sa Metro Manila ay maglalaro sa 25°C hanggang 30 °C habang sisikat naman ang haring araw mamayang 5:45 ng umaga at lulubog naman ito mamayang 5:53 ng hapon.

Sa kauna-unahang pagkakataon, humarap na sa 77^th United Nations General Assembly si Pangulong Ferdinand “Bongbong” Marcos Jr., sa New York, USA.

Ipinagmalaki ni Pangulong Marcos ang naging tagumpay ng Pilipinas sa “peace building” lalo sa Mindanao.

Ito, anya, ang dahilan kaya’t nanawagan siya ng suporta para sa kandidatura ng bansa upang mapabilang sa U.N. Security council.

Ang pangunahing responsibilidad ng U.N. Security Council, na binubuo ng 15 miyembro ay panatilihin ang International Peace at Security.

Mayroon itong limang permanent members na binubuo ng China, France, Russia, United Kingdom at United States.

Pinagpapaliwanag ni Senador Risa Hontiveros ang National Grid Corporation of the Philippines (NGCP) sa palpak umanong serbisyo sa kabila ng bilyun-bilyong pisong kinikita nito.

Tinawag pa ni Hontiveros na unang hakbang para sa accountability ang show cause order ng Energy Regulatory Commission na nag-oobliga sa NGCP na ipaliwanag ang kabiguang sumunod sa mga polisiya upang matiyak ang stability ng power grid.

Ayon sa Senadora, bagaman nakapapagod humingi ng paliwanag sa paulit-ulit na problema, kailangang managot ang NGCP.

Kung hindi anya ito gagawin ay palagi na lamang i-ho-hostage ang gobyerno.

Hinimok din ng mambabatas ang ERC na mag-isyu ng show cause orders sa generation companies na magkakasunod na nag-offline dahilan ng power outages sa Luzon.

Inisyu ang show cause order dahil sa kabiguan ng NGCP na sumunod sa mga patakaran ng Department of Energy noong October 2021.

Kabilang dito ang pagkontrata ng ancillary services na ayon sa ERC ay kailangang suporta para sa transmission ng kuryente mula sa resources patungo sa loads habang pinananatili ang reliable operation ng grid. —ulat mula kay Cely Ortega Bueno (Patrol 19)

Target ng Department of Information and Communications Technology (DICT) na maglagay ng mahigit 9K free Wi-Fi sites sa bansa sa taong 2023 o mahigit doble kumpara ngayong taon.

Ito ang tiniyak ni Undersecretary for ICT Industry Development Jocelle Batapa-Sigue sa kanyang pagharap sa Senate Hearing hinggil sa panukalang budget ng Kagawaran sa susunod na taon.

Ayon kay Batapa-Sigue, karagdagang 3,273 free Wi-Fi sites ang target nilang ilagay sa unang bahagi ng 2023 kumpara sa 3,055 active sites sa mga pampublikong lugar hanggang nitong August 20, 2022.

Kabilang anya sa additional sites ang mahigit tig-isanlibong libreng Wi-Fi sa Luzon at Visayas, habang nasa 500 ang ilalagay sa Mindanao.

Sa ilalim ng National Expenditure Program para sa susunod na taon, aabot sa P7.232 billion ang inilaan para sa DICT.

Handa si National Security adviser Clarita Carlos na baguhin at palitan ang kanyang posisyon kontra institusyonalisasyon ng National Task Force to End Local Communist Armed Conflict (NTF-ELCAC).

Ayon kay Carlos, ikinukonsidera niya ang tugon ni Senador Ronald “Bato” Dela Rosa sa kanyang pangamba hinggil sa na-dobleng tungkulin ng mga ahensiya, maging ng “duration ng existence” nito.

Sa kanyang pagharap sa Senate Hearing ng Committee on National Defense and Security, Peace, Unification and Reconciliation sa ELCAC Act, Sinabi ng NSC adviser na ang panukala ay magiging “contest of jurisdiction’’ at pagsasayang ng pondo.

Una na ring inihayag ni Carlos na hangarin ni Pangulong Bongbong Marcos na i-streamline ang burukrasya at muling ayusin ang gobyerno.

Bilang tugon, ipinunto ni Dela Rosa na layunin ng batas na tiyaking mananatili ang “Anti-Insurgency Efforts” sa gobyerno anuman ang bagong polisiya ng Pangulo.

Magugunitang naging kontrobersiyal ang NTF-ELCAC dahil sa  red-tagging sa mga paaralan, estudyante, organisasyon at kritiko ng pamahalaan.

Nagsuspinde ng klase ang ilang lokal na pamahalaan bunsod nang masamang panahong dala ng Southwest monsoon o habagat.

Kabilang sa mga nagkansela ng klase ang Caloocan City, Las Piñas City sa lahat ng antas sa public at private schools.

Gayundin ang afternoon classes sa lahat ng antas sa Valenzuela, Marikina, Malabon, Pateros, Navotas, Taguig, Pasay, Parañaque at Mandaluyong cities.

Nagdeklara rin ng suspensyon sa face-to-face classes ang pamunuan ng UP Diliman.

Maging ang klase sa lahat ng antas sa public at private schools sa lalawigan ng Rizal ay suspendido at afternoon classes sa Alfonso, Cavite City, Silang, Kawit, Noveleta, Ternate, Magallanes, General Mariano Alvarez, General Trias, Imus, at Maragondon sa Cavite.

Pinag-tuunang pansin ni Pangulong Ferdinand Marcos Jr., sa kanyang talumpati sa harap ng mga Pilipino at American businessman ang pagiging steady partner ng Pilipinas at Estados Unidos.

Sa aktibidad na ginanap sa New York Stock Exchange, sinabi ni Pangulong Marcos na nakahanda ang bansa na ipagpatuloy at panatilihin ang magandang pakikipag-ugnayan sa Amerika, lalo na sa larangan ng pagnenegosyo.

Ibinida rin ng Pangulo ang workforce ng bansa na aniya’y isang asset sa gitna ng patuloy na paghimok sa mga investor na mamuhunan sa Pilipinas.

Tiwala naman ang Punong Ehekutibo na magtutuloy-tuloy ng mahabang panahon ang magandang ugnayan ng Pilipinas at US, at asahan na rin aniya na lalakas pa ang relasyon ng dalawang bansa partikular na sa larangan ng politika at economic diplomatic relations.—mula sa ulat ni Jopel Pelenio (Patrol 17)