HOT STORIES OF THE WEEK

Hindi maka-aapekto sa kampanya ng gobyerno laban sa insurgency ang pagbasura ng korte sa proscription case ng Department of Justice na naglalayong ideklara bilang terrorist group ang CPP-NPA.

Ayon kay Senator Ronald “Bato” Dela Rosa, na dating PNP chief, hindi magiging sagabal sa pagsisikap ng pamahalaan na sugpuin ang naturang grupo na banta o salot sa lipunan.

Bagaman nakalulungkot at nakapang-hihinayang na hindi nagtagumpay ang hangarin na ipadeklarang teroristang grupo ang CPP-NPA, iginagalang anya nila ang desisyon ng Manila Regional Trial Court Branch 19.

Aminado si Dela Rosa na malaking tulong sana sa pagresolba o paglaban sa insurhensiya kung idineklarang teroristang grupo ang CPP-NPA. —ulat mula kay Cely O. Bueno (Patrol 19)

Hindi na umano dapat makipag-peace talks ang Pamahalaan sa National Democratic Front at armed wing nitong Communist Party of the Philippines-New People’s Army.

Ito ang iginiit ni Senador Ronald ‘Bato” Dela Rosa makaraang ibasura ng Manila Regional Trial Court Branch 19 ang proscription case ng Department of Justice na layuning ideklara bilang terrorist group ang CPP-NPA.

Ayon kay Dela Rosa, sa halip na usapang kapayapaan, ipagpatuloy na lamang ang pagtugis at huwag nang pagbalakan pang kausapin muli ang mga nasabing grupo.

Tanging gobyerno anya ang sinsero sa usapang pangkapayapaan pero niloloko lang ito ng CPP-NPA kapag humaharap sa peace talks.

Binigyang-diin ng Senador na kapag mayroong peace talks at ceasefire ay nagpapalakas naman ng hanay, nag-a-armas at nagre-recruit ang NPA dahil libre silang nakapapasok sa mga barangay at kanayunan.

Naniniwala naman si Bato na isa sa paraan laban sa CPP-NPA ay ang pagbubuhos ng infrastructure projects sa mga kanayunan sa pamamagitan ng National Task Force to End Local Communist Armed Conflict (NTF-ELCAC). —ulat mula kay Cely O. Bueno (Patrol 19)

Nagpulong na sa kauna-unahang pagkakataon si Pangulong Ferdinand “Bongbong” Marcos Jr., at U.S. president Joe Biden sa “sidelines” ng 77^th United Nations General Assembly (UN-GA) sa New York.

Sa kanilang paghaharap, pinapurihan ni Biden ang matatag na relasyon ng Pilipinas at Amerika na bagaman nagkakaroon ng kaunting gusot minsan, na-aayos naman anya ito lalo’t napakalalim ng ugnayan ng dalawang bansa.

Ilan anya sa patunay nito ang milyun-milyong Filipino-Americans na naninirahan at may malaki o mahalagang papel na ginagampanan sa U.S.

Umaasa si Biden na magkakaroon pa sila ng malalim na talakayan ni Pangulong Marcos sa ilan pang issue, gaya ng COVID-19 recovery at South China Sea dispute habang nagpasalamat din ang U.S. President sa posisyon ng Pilipinas sa giyera sa pagitan ng Russia at Ukraine.

Bilang tugon, nagpasalamat si PBBM sa pagkakataong makausap si Biden at aminadong marami pa silang mga paksang dapat talakayin.

Partikular na tinukoy ni Pangulong Marcos ang papel ng Amerika sa pagpapanatili ng kapayapaan sa Indo-Pacific bagay na pina-pahalagahan ng Pilipinas at iba pang bansa sa Asya.

Binigyang-diin naman ni PBBM na pagdating sa geopolitical issues, pangunahin anyang konsiderasyon ng Pilipinas at gumagabay na prinsipyo sa foreign policy ng bansa ay panatilihin ang kapayapaan.

Umaasa rin si Presidente Marcos na magkakaroon pa ng mas malalim na pagtalakay sa mga nasabing issue sa kabilang mga kinakaharap na mga hamon simula noong mga nakalipas na buwan.

Tinitingnan na ng Pilipinas ang posibleng investments mula sa American Companies sa pagtatayo ng mga small modular nuclear power plant sa ilang piling lugar sa bansa.

Ito ang kinumpirma ni Trade secretary Alfredo Pascual matapos ang Philippine Economic Briefing sa New York, na dinaluhan nina Pangulong Ferdinand “Bongbong” Marcos Jr., at mga opisyal ng tatlong kumpanyang maaaring mamuhunan sa modular nuclear power plants.

Ayon kay Pascual, kabilang sa mga nakausap ni Pangulong Marcos ang US-based Nuscale Power Company.

Tinatanya pa anya nila ang posibilidad na maaaring ilagay ang isang modular reactor sa isa sa mga Isla, Tulad sa Palawan.

Aminado naman ang Kalihim na nakikipag-usap din sila sa iba pang kumpanya na hindi lamang gumagawa ng modular reactors, kundi maging ng mas malalaking Nuclear Power Plant.

Posibleng lalong mabawasan ang mga pasahero ng mga taxi dahil sa inihihirit ng grupo ng mga taxi operator na 60 pesos na flag-down rate.

Ito’y ayon kay Atty. Ariel Inton, founder ng  Lawyers for Commuters Safety and Protection, dahil maaari rin silang matalo ng mga motorcycle taxi at Transport Network Vehicle Service (TNVS).

Mataas aniya ang 60 pesos na flag-down rate, kaya’t dapat itong pag-aralang mabuti.

Una nang iginiit ng Philippine National Taxi Operators Association na kinakailangan nilang magtaas ng flag-down rate dahil nahihirapan nang kumita ang mga driver at operator sa gitna ng pagsirit ng presyo ng produktong petrolyo.

Ang aming pakiusap kung may increase ay increase sa mga driver, tanungin niyo ang mga driver, ‘Iyon bang increase sa inyo ba napupunta o tumataas ba ang inyong boundary?’, So iyon ang mga issue na underground hindi niyo makikita sa  desisyon no?.” -Tinig ni Lawyers for Commuters Safety and Protection president Atty. Ariel Inton, sa panayam ng DWIZ.

Naniniwala si University of the Philippines-Philippine General Hospital UP-PGH Emergency Medicine chairperson at dating adviser ng National Task Force against COVID-19 Dr. Ted Herbosa na posibleng makapasok ng Pilipinas ang iba pang variants ng COVID-19 sakaling ipatupad ang mas maluwag na border restrictions.

Kasunod ito ng pahayag ni Department of Health officer-in-charge at Undersecretary Maria Rosario Vergeire na kanilang pinag-aaralan ang suhestiyon kasama ang Inter-Agency Task Force (IATF) hinggil sa naturang usapin.

Ayon kay Dr. Herbosa, masiyado pang ‘risky’ kung magluluwag ng mga restriksyon sa mga entry at exit points sa bansa.

Kumpiyansa si Herbosa na mas mataas ang tiyansa na ma-infect ang isang indibidwal lalo na kung hindi pa ito nahahawaan ng variant ng COVID-19.

Binabalangkas na ng Department of Health (DOH) ang rekomendasyong mas luwagan ang border restrictions sa bansa.

Ayon kay Health officer-in-charge Undersecretary Maria Rosario Vergeire, malaking tulong at mas mabilis aangat ang eknomiya ng bansa kung magluluwag ng restriction sa mga dayuhang biyahero na nais magpunta sa Pilipinas.

Iginiit ni Vergeire na may mga bansa narin ang nagluwag at nag-alis ng restrictions kahit nahaharap pa rin sa banta ng COVID-19 pandemic ang buong mundo.

Sinabi pa ni Vergeire na kanilang pag-uusapan sa linggo kasama ng Inter-Agency Task Force (IATF) kung dapat nabang alisin ang border restriction dahil kailangang makabawi ang bumagsak na ekonomiya ng bansa.

Muling ipinanawagan ng rice watch group na Bantay Bigas ang pagbasura sa Republic Act 11203 o Rice Tariffication Law sa kabila ng hindi maawat na pagtaas ng presyo ng pagkain, lalo ng bigas.

Ayon kay Bantay Bigas spokesperson Cathy Estabillo, malaki na masyado ang lugi ng mga magsasaka kaya’t hindi na nila kakayaning tiisin pa ng anim na taon ang implementasyon ng nasabing batas.

Dahil anya sa Rice Tariffication Law ay mas naging prayoridad ang importasyon sa halip na tutukan ang produksyon na siya namang tunay na solusyon upang makamit ang self-sufficiency sa pagkain.

Inihayag ni Estabillo na sa katunayan ay umabot na sa 50,000 signatures ang kanilang nalikom para ibasura ang R.A. 11203 at sa halip ay palitan ito ng mas angkop na panukalang mas pakikinabangan ng mga magsasaka.

Sa ilalim ng House Bill 405 o Rice Industry Development Act, ibabalik ang regulatory powers ng national food authority na tiyakin ang sapat na supply ng pagkain, lalo ng bigas.