HOT STORIES OF THE WEEK

Nangako ang China na kanilang tutulungan ang Pilipinas sa pag-crackdown ng Philippine Off-Shore Gaming Operators Related Crimes o mga krimen na may kinalaman sa operasyon ng POGO.

Ito ay kasunod ng balita na ang gambling o pagsusugal, online man o overseas na ginagawa ng mga Chinese citizens ay ilegal.

Ayon kay Chinese Ambassador to the Philippines Huang Xilian, handa ang kanilang gobyerno na paigtingin ang kanilang law enforcement cooperation sa Pilipinas upang maiwasang masangkot ang interest ng bansa.

Bukod pa dito, layunin din nitong maprotektahan ang seguridad, karapatan at interests ng mga Chinese citizens na naninirahan sa Pilipinas.

Sa ngayon, patuloy pa rin na nakikipag-ugnayan ang Chinese Embassy sa Philippine Law Enforcement Agencies, para matugunan ang naturang usapin.

Inihayag ng Department of Social Welfare and Development (DSWD) na lumagpas na sa kanilang target na bilang ang mga nakatanggap ng cash assistance.

Ayon kay DSWD Spokesperson, Assistant Secretary Romel Lopez, pumalo na sa halos P1.3 billion o katumbas ng 520,000 students, na lampas sa kanilang initial goal na 400,000 benepisyaryo.

Sinabi ni Lopez, na nasa P200-M pa ang natitira sa kanilang pondo para sa indigent students mula sa elementary hanggang College o Vocational Level sa pamamagitan ng One-Time Cash Aid.

Iginiit ni Lopez na posible pang makatanggap ng cash assistance ang nasa 100k estudyante sa huling round ng distribution bukas, September 24.

Matatandaang sinabi ng DSWD na kanilang ikinukonsidera ang One-Time Extension ng assistance program, pero nakadepende parin ito sa availability ng kanilang pondo.

Umarangkada na ang 64 na mga bagong bagon o Light Rail Vehicles (LRVs) ng Metro Rail Transit Line 3  o MRT-3.

Ayon sa MRT-3 Management, pinalitan ng mga bagong piyesa ang mga bagon sa tulong narin ng maintenance provider nito na Sumitomo-MHI-TESP.

Bukod pa dito, isinailalim din sa quality tests at simulation runs ang mga bagong bagon upang masigurong maayos itong tumatakbo sa riles ng tren.

Layunin din ng pamunuan ng MRT-3, na ligtas ibiyahe sa revenue line ang mga ito para sa kapakanan ng mga train commuters.

Tinutulan ni dating Commission on Elections (COMELEC) Commissioner Luie Guia ang pagpapaliban ng Barangay at Sangguniang Kabataan (BSK) Elections sa darating na Disyembre.

Ayon kay Guia, hindi dapat ipinagkakait ang pagkakataong suriin ang performance ng mga elected barangay officials dahil matagal nang pinaghandaan ng COMELEC ang naturang eleksiyon.

Iginiit ng dating poll body na malaking sagabal lamang sa paghahanda ng comelec ang mungkahing ipagpaliban o iurong muna pansamantala ang halalan.

Mahihirapan ding makapag-desisyon ang ahensya kung kanilang ipagpapatuloy ang paggastos para sa paghahanda para sa botohan kung itutuloy ang pagpapaliban dito.

Sinabi pa ni Guia na kung mayroong planong ipagpaliban ang BSK Elections, dapat noon pa ito ginawa o ipinatupad.

Matatandaang noong Martes, inaprubahan na ng mga kongresista ang panukalang i-postponed ang eleksyon ngayong taon.

Umabot na sa 1.46 million na turista sa Pilipinas ang naitala ng Department of Tourism (DOT) ngayong taon.

Ayon sa DOT, mas mataas ito kung ikukumpara sa naitala bago magsimula ang COVID-19 pandemic noong 2020.

Nabatid na mula noong February hanggang nitong September 20, lumagpas na sa inaasahang target na bilang ng DOT ang dumating na mga turista sa bansa.

Sinabi ng DOT, na malayo ito sa 164,000 na mga turista na dumating sa Pilipinas noong nakalipas na taon, dahil sa pagpapatupad ng mahigpit na restriksiyon.

Dahil dito, target ng DOT na malagpasan ang 8.3 million tourist arrival na naitala naman noong taong 2019.

Aminado ang grupo ng magba-baboy na nalulugi na ang kanilang paninda dahil sa pagpasok ng mga imported meat products sa Pilipinas.

Ayon sa National Federation of Hog Farmers (NFHF), nagtitiis nalang ang mga meat vendor kung saan, below-cost price na o mas mababa sa halaga ng produksiyon ang kanilang ibinebentang karne ng baboy.

Dahil dito, humihiling ang grupo na maibalik ang mababang presyo nito dahil masyado itong mataas na nagiging dahilan para maapektuhan ang mga consumer sa wet market.

Bukod pa dito, nanawagan din sa gobyerno ang NFHF, na matulungan silang mapababa ang kanilang gastos sa pag-aalaga ng baboy upang mapababa rin ang presyo ng kanilang produkto sa merkado.

Umarangkada na ang programang pabahay ni Pangulong Ferdinand “Bongbong” Marcos Jr., sa Quezon City.

Ito’y makaraan ang Memorandum signing sa pagitan ng Department of Human Settlements and Urban Development (DHSUD) at ng Quezon City Government.

Una nang ipinag-utos ni PBBM sa DHSUD na lutasin ang backlog ng pabahay sa bansa sa pamamagitan ng pagbibigay ng ligtas at disenteng tirahan mahigit anim na milyong pamilya sa loob ng anim na taon.

Ang nasabing kasunduan ay nilagdaan nina DHSUD secretary Jose Rizalino Acuzar at Quezon City Mayor Joy Belmonte para sa proyektong pabahay na malapit nang itayo sa Harmony Hills Terraces sa Barangay Batasan Hills.

Layunin ng naturang programa, na nilikha mismo ni Pangulong Marcos, na makapagtayo ng isang milyong housing units kada taon.

7 sa bawat 10 Pilipino ang namamatay sa Non-Communicable Disease (NCD), kung saan karamiha’y babae.

Batay ito sa bagong pag-aaral mula sa United Nations –World Health Organization (WHO).

Ayon sa WHO, umabot na sa 511,748 NCD deaths ang naitala sa Pilipinas noong 2019 kung saan 72% ay babae habang 68% ay lalaki.

Nangungunang sanhi ng pagkamatay ang cardiovascular diseases gaya ng heart attack at stroke, na may kabuuang halos 250,000 deaths.

Binanggit din sa report na hindi pa nagpapatupad ang Pilipinas ng epektibong guidelines upang pamáhalaan ang cancer, cardiovascular diseases, diabetes at cardio-respiratory diseases, maging ng drug therapy.

Ibinaba ng Department of Health ang target sa PinasLakas Campaign ng gobyerno para sa booster vaccination coverage.

Mula sa 50%, ini-adjust ito sa 30% pagsapit ng Oktubre a – 8 para sa unang isandaang araw sa pwesto ni Pangulong Bongbong Marcos.

Gayunman, nilinaw ni DOH-OIC Undersecretary Maria Rosario Vergeire na nananatili ang kanilang target na makamit ang 50% booster coverage pagsapit ng katapusan ng taon sa ilang rehiyon gaya ng NCR.

Hindi rin anya ito nangangahulugan na magiging maluwag ang kagawaran sa kanilang pagsisikap at makuntento na lamang sa pag-abot sa 30%.

Umapela naman si Vergeire sa publiko na makiisa sa layunin ng gobyerno na protektahan ang sambayanan laban sa COVID-19 at magpa-booster, lalo ang mga hindi pa natuturukan nito.

Ibinasura ng Manila Regional Trial Court Branch 19 ang proscription case ng Department of Justice na naglalayong ideklara ang Communist Party of the Philippines at New People’s Army bilang mga teroristang grupo.

Sa 135 pahinang resolusyon ni presiding Judge Marlo Magdoza-Malagar, sinabi nito na ang pagsusuri sa programa ng CPP-NPA ay nagpapakita na ito ay inorganisa hindi para sa layuning sumali sa terorismo.

Ipinunto ng Korte na bagaman kaakibat na ng armadong pakikibaka ang karahasan, ito lamang ang aprubadong paraan upang makamit ang layunin ng CPP-NPA, at magkaiba anya ang ‘means’ o paraan sa ‘purpose” o layunin.

Ipinaliwanag din sa resolusyon na iba ang terorismo sa rebelyon, na nag-ugat sa pagkadismaya sa umiiral na sistema ng gobyerno na sa tingin ng iba ay hindi patas sa nakararami at pumapabor lamang sa iilan.

Tinukoy ng Korte ang terorismo bilang paghahasik ng malawakan at matinding takot sa nakararami upang mapuwersa ang pamahalaan na paboran ang isang hiling na sa tingin nito’y labag sa batas.

Inihain ng Department of Justice ang proscription case noong 2018 na naglalayong ideklara ang CPP-NPA bilang isang teroristang grupo sa ilalim ng Section 17 ng Human Security Act of 2007.

Samantala, inihayag ni DOJ spokesman Mico Clavano na pag-aaralan muna ng kagawaran ang desisyon. —ulat mula kay Aya Yupangco (Patrol 5)