Walang Pilipinong nasaktan sa pananalasa ng bagyong Nanmadol sa Japan.
Ayon sa Department of Foreign Affairs, bago pa mag-landfall ang bagyo ay lumikas na ang maraming residente sa mga lugar na apektado ng kalamidad.
Inihayag naman ng Philippine Consulate General sa Osaka na ligtas na sa mga evacuation center ang ilang Pinoy na naninirahan sa Kagoshima prefecture.
Patuloy na mino-monitor ng konsulada ang sitwasyon ng Pinoy community sa Southwestern Japan.
Umakyat sa 15.6% ang weekly COVID-19 positivity rate sa National Capital Region.
Kumpara ito sa 13.3% noong September 10 at 14.5% noong September 14.
Ayon kay OCTA research fellow, Dr. Guido David, nag-peak na ang cases noong August 7 pero bumaba sa karamihan ng mga lalawigan, gaya ng Cebu at Davao.
Gayunman, nilinaw ni David na sa ilang lugar lamang sa Metro Manila tumaas ang positivity rate kasabay nang pagsisimula ng face-to-face classes.
Bukod sa NCR, tumaas din ang positivity rate sa mga karatig lalawigan ng Bulacan, Cavite, Rizal at Laguna.
Isa anya marahil sa dahilan nang pagtaas nito ang pagdami ng mga taong lumalabas at pagiging kampante ng publiko.
Ang positivity rate ay bilang ng mga taong nag-positibo sa COVID-19 mula sa kabuuang bilang ng mga indibidwal na sumailalim sa test.
Mainit na sinalubong ng Filipino community sa New Jersey Performing Arts Center si Pangulong Ferdinand Marcos Jr.
Ito ang unang aktibidad ng punong ehekutibo, kung saan pinaunlakan din nito ang mga Pilipinong humingi ng autograph sa kaniya.
Sa kanyang talumpati, hinimok ng pangulo ang mga Pilipino na suportahan ang turismo at mag-invest sa Pilipinas.
Pinasalamatan din nito ang mga Pinoy sa US dahil sa remittances na ipinasok ng mga ito sa bansa, na malaking tulong sa ekonomiya.
Kinilala rin ng punong ehekutibo ang kabayanihan ng medical front liners sa gitna ng COVID-19 pandemic, gayundin ang kontribusyon at sakripisyo ng mga guro, emergency response at service employees.
Bukas na umano si Pangulong Ferdinand “Bongbong” Marcos Jr. sa hirit na ipatigil na ang operasyon ng mga Philippine Offshore Gaming Operators (POGO) sa bansa.
Ito ang kinumpirma ni Senador Imee Marcos makaraang makausap niya ang kapatid nang magtungo sa pagdiriwang ng kaarawan nito sa Palasyo noong Martes.
Aminado ang senador na isa sa kanilang mainit na napag-usapan ang POGO.
Kanya umanong binanggit sa Pangulo na kung hindi kayang ipatupad ang task force na tututok sa mga ilegal na aktibidad ng POGO, dapat na lamang itigil ang operasyon nito.
Naniniwala ang mambabatas na mas malaki ang kita ng “under the table” kaysa sa ibinabayad na buwis ng POGO sa pamahalaan.
Gayunman, wala pa anyang pinal na desisyon si Pangulong Marcos kung dapat nang buwagin ang POGO at kahit ipasara ay hindi ito maka-aapekto sa relasyon ng Pilipinas at Tsina.
Ibinagsak presyo na ng mga magsasaka ang presyo ng kanilang inaning luya sa Cutar, Aritao, Nueva Vizcaya.
Nabatid na nasa P100 kada 5 kilo nalang o maglalaro sa P20 ang presyo sa kada kilo ng luya para lamang maubos at hindi mabulok.
Ayon sa mga magsasaka sa nabanggit na lugar, mas pipiliin nalang nilang ibagsak-presyo ang kanilang inaning luya kaysa masayang at tuluyang hindi mapakinabangan ang kanilang pinagpaguran.
Sinabi pa ng mga magsasaka na ang isa pa sa mga dahilan kung bakit nila ibinagsak presyo ang halaga ng mga luya ay dahil nagkasabay-sabay ang pag-aani ng mga kapwa nila magsasaka sa bayan ng kasibu kaya’t dumami ang produksiyon nito.
Dahil dito, maraming netizen ang naawa at nanawagan na suportahan ang mga magsasaka at bilhin nalang umano ng mga mall at supermarkets ang sobrang ani na luya ng mga magsasaka sa nasabing lugar.
Samantala, umaasa naman ang mga magsasaka na matutulungan sila ng Department of Agriculture (DA) na masolusyonan ang sobrang ani ng mga luya sa kanilang lugar.
Balik na sa normal ang operasyon ng Ninoy Aquino International Airport Terminal 3 o NAIA T3 matapos ang nangyaring power outage kanina.
Inabisuhan naman ng Cebu Pacific ang kanilang mga pasahero na naibalik na ang suplay ng kuryente sa paliparan.
Bagama’t bumabalik na sa normal ang sitwasyon, kanselado naman ang ilang flights ng CebuPac ngayong araw na kinabibilangan ng 5J 573/574 Manila-Cebu-Manila, 5J 919/920 Manila-Caticlan-Manila, 5J 272/273 Manila-Hong Kong-Manila at 5J 279/280 Manila-Bali-Manila.
Samantala, pinayuhan ang mga apektadong pasahero na i-rebook na lamang ang kanilang ticket sa mga susunod na available flights sa loob ng dalawampu’t apat na oras.
Humingi rin ng paumanhin at pang-unawa ang Cebu Pacific sa mga pasahero.
Good news para sa mga motorista.
Asahan na naman ang tapyas-presyo sa produktong petroleum sa susunod na linggo.
Ayon sa Department of Energy-Oil Industry Management Bureau (DOE-OIMB), posibleng magbawas ng P2.50 hanggang P3.00 sa kada litro ng diesel habang P3.00 naman ang tapyas sa kada litro ng kerosene.
Habang wala pang kasiguruhan kung may tapyas o dagdag sa presyo sa kada litro ng gasolina.
Ito na ang ikatlong sunod na linggong tapyas-presyo sa produktong petrolyo, matapos ang malakihang rollback noong pagtatapos ng Agosto.
Muling humina ang halaga ng piso kontra U.S. dollar makaraang magsara ang palitan sa P57.16 centavos kada dolyar, kahapon.
Kumpara ito sa P56.85 centavos exchange rate noong Miyerkules.
Ito na ang ikatlong beses na sumampa sa 57 level ang halaga ng piso laban sa dolyar ngayong buwan.
Sa kabila nito, bahagyang umakyat ang ofw remittances sa nakalipas na pitong buwan o simula Enero hanggang Hulyo.
Batay sa datos ng Bangko Sentral ng Pilipinas, umabot sa 3.3 billion dollars ang kabuuang ipinadala ng mga ofw nitong Hulyo ngayong taon.
Kumpara ito sa 3.24 billion dollars o 2.3% na mas mataas sa kaparehong panahon noong 2021.
Ito na sa ngayon ang pinaka-mataas na halaga ng remittance sa loob ng pitong buwan.
Nagbabala si Senador Ronald Dela Rosa na maaaring magkagulo kung hindi daragdagan ang P1 billion na pondo para sa kumpensasyon ng mga biktima ng marawi siege dahil hindi sapat ito sa bilang ng benepisaryo.
ito ang pangamba ni Dela Rosa, Vice Chairman ng Senate Finance Committee, matapos ang briefing sa Senado ng Development Budget Coordinating Committee para sa 2023 proposed National Expenditure Program (NEP).
Si Bato rin ang chairman ng Special Committee on Marawi City rehabilitation and victims’ compensation.
Nakasaad sa 2023 NEP, tanging P1 billion ang inilaan para sa Marawi siege compensation fund na gagamitin para sa ligal na may-ari ng kabahayan, cultural at commercial structure at iba pang ari-arian sa main affected area o labis na mga nasira sa naganap na giyera noong 2017.
Iginiit ng senador na maaaring samantalahin ng mga terorista ang P1 billion budget sa taong 2023 upang lumikha ng galit sa pamahalaan.
Bago anya lagdaan ang Republic Act 11696 o Marawi Siege Victims Compensation Act bilang batas ni dating Pangulong Rodrigo Duterte, tinaya ng Kongreso sa naganap na deliberasyon na aabot sa P30 billion ang pondong inilaan para sa naturang batas.
Samantala, bilang tugon, sinabi ni Budget Secretary Amenah Pangandaman na maaaring magdagdag ng pondo ang kumite para sa compensation budget.
Pinaiimbestigahan ni Senator Alan Peter Cayetano sa Development Budget Coordination Committee (DBCC) ang posibleng sindikato sa DPWH na sangkot sa pagre-align ng bilyung piso sa ilalim ng 2023 budget.
Bilang dating house speaker, ibinunyag ni Senator Cayetano na maraming nagsabi sa kanya na mayroong grupo sa DPWH na kumo-kontrol sa alokasyon ng mga proyekto sa iba’t-ibang congressional district.
Ang mas nakababahala anya ay ang posiblidad na may nangyayaring manipulasyon ng pondo bago pa isumite sa kongreso ang panukalang pambansang budget.
Iginiit ng senador na kung dati ang pag-park ng pondo ay nangyayari lang sa Bicameral Conference Committee at maliit na pera lang ang pinag-uusapan, ngayon ay bilyong piso na ang sangkot kaya tila naging pandemic na ang kurapasyon kung totoo ang report.
Ang sumbong anya kay Cayetano ay binabawasan ang budget ng mga distrito, pagkatapos ay kakausapin at sasabihin nila sa mga kongresista na pwede nilang ibalik ang pondo pero sila ang mamimili ng proyekto at kontratista nila ang gagawa nito.
Tinawag naman ito ng mambabatas na isang uri ng pang-ho-holdup.
Sa ilalim ng 2023 national budget, maraming distrito ang natapyasan ng pondo ng mula 21.41% hanggang 93.12%.
Dahil dito, nanawagan si Cayetano kay Finance Secretary Benjamin Diokno, bilang head ng DBCC, na imbestigahan at alamin ang katotohanan sa sinasabing sindikato sa DPWH. — Sa ulat ni Cely Ortega-Bueno (Patrol 19)