HOT STORIES OF THE WEEK

Aminado si Pangulong Bongbong Marcos na kakayaning ibaba sa P20 ang kada kilo ng bigas pero hindi ito magiging madali at maaaring abutin pa ng mahabang panahon bago maipatupad.

Ayon kay Pangulong Marcos, mayroong mga hakbang na dapat pang isagawa bago maibaba ang presyo ng bigas, na isa sa kanyang pangako noong presidential campaign.

Ilan sa mga hakbang anya na dapat gawin ay ibalik ang National Food Authority sa dati nitong papel, bawasan ang importasyon at bumili sa mga local farmer.

Idinagdag ng pangulo na dapat ibenta ang buffer stock ng NFA pero hindi naman ito makatotohanan sa ngayon dahil talagang kailangang ibaba ang aktuwal na presyo sa pamamagitan ng pagpapalakas ng produksyon.

Bagaman binigyang-diin pa ng punong ehekutibo ang kahalagahan ng pagkakaroon ng value chain, marami pang dapat isaayos at hindi magiging madali ang target na ibaba ang presyo ng bigas.

Nakikita na ng World Health Organization (WHO) ang pagwawakas ng covid-19 pandemic.

Ito ay matapos bumagsak ang naitatalang bilang ng nahahawa sa virus sa buong mundo.

Ayon kay WHO Chief Tedros Adhanom Ghebreyesus, mula sa milyong-milyong nagpopositibo sa covid-19 simula noong March 2020 ay bumagsak ito sa pinakamababang bilang na 4.2 million noong September 4.

Gayunman, nilinaw ni Ghebreyesus na hindi pa rin dapat magpaka-kampante ang publiko at patuloy na sumunod sa health protocols at magpabakuna.

Pinayuhan naman ng opisyal ang lahat ng bansa na samantalahin ang pagkakataong mababa ang naitatalang kaso, upang mapigilan na ang pag-usbong ng mga bagong variants.

Aabot sa 31% ng mga pilipino ang nagsabing humirap ang kanilang pamumuhay sa nakalipas na isang taon.

Batay ito sa survey ng Social Weather Stations mula Hunyo bente-sais hanggang bente-nueve ngayong taon.

Sa naturang survey, 29% naman ang nasabing naging maayos ang kanilang pamumuhay at 39% ang nagsabing walang pinagkaiba noong 2021.

Nagmula sa Metro Manila at Luzon ang mayorya ng nagsabing humirap ang kanilang pamumuhay, mula naman sa Mindanao at Visayas ang nagsabing walang nagbago.

Tinanong sa naturang survey ang nasa 1,500 respondents na pawang edad disi-otso pataas sa pamamagitan ng face-to-face interview.

Walang inilaang pondo sa 2023 national expenditure program ang Department of Education (DepEd), para sa pag-aaral ng mga special children.

Natuklasan ito sa gitna ng deliberasyon ng 2022 budget kahapon nang tanungin ni Albay Rep. Edcel Lagman ang kagawaran kaugnay ng pag-aaral ng mga special children o learners with disabilities (LWDS).

Pag-amin ni Education Undersecretary Ernesto Gaviola, pinagkakasya lang nila ang nakakalap nilang pondo kaya hindi napagtutuunan ang ibang bagay.

Gayunman, tiniyak ng opisyal na tinututukan pa rin nila na makapagturo nang maayos sa mga LWDS at mahikayat ang mga itong mag-aral.

Tila “undecided” pa si Pangulong Ferdinand “Bongbong” Marcos Jr., kung ibabalik o hindi ang parusang kamatayan.

Sa isang taped interview na ipinalabas sa kanyang 65^th birthday kahapon, inamin ni Pangulong Marcos na isang mabigat na issue ang death penalty dahil mayroong practical at moral issue na bumabalot dito.

Isa anya sa mga dapat mabatid ay kung may karapatan ba ang lipunan na kumitil ng sarili nitong mamamayan.

Ayon kay PBBM, dapat ding maglabas ng datos hindi lamang sa Pilipinas kundi maging sa ibang bansa, na napipigilan ng death penalty ang sinuman na gumawa ng mga karumal-dumal na krimen.

Sa issue naman ng War on Drugs, nilinaw ng Pangulo na nais muna niyang ma-plantsa ang lahat ng polisiya kaya’t hindi niya masyadong binabanggit ang issue sa publiko.

Naniniwala ang punong ehekutibo na bagaman isang internal matter ang War on Drugs, magpapatuloy ito pero sa iba at bagong paraan bagay na binabalangkas pa ng kanyang administrasyon.

Pabor si Health Reform Advocate at dating Philippine College of Physician President, Dr. Tony Leachon sa hirit ng Department of Health na patawan ng dagdag-buwis o isama sa sin tax law ang mga junk food at matatamis na inumin.

Ayon kay Leachon, dapat munang tukuyin ang mga partikular na junk food at sweetened beverages na dapat patawan ng additional tax upang mapataas ang revenue na gagamitin naman sa Universal Health Care Program.

Kailangan anya ng DOH ang tulong ng Pangulo, mga mambabatas at private sector dahil tiyak na maraming malaking kumpanya ang aalma.

Gayunman, naniniwala rin si Leachon na mahabang panahon ang gugugulin sa pagpapatupad ng dagdag-buwis sa mga nasabing produkto gaya ng sinapit ng Sin Tax at hindi pa ito napapanahon dahil may mga dapat ikunsidera, tulad ng epekto sa ekonomiya ng inflation.

Hindi umano patas at maraming butas ang inilabas na Committee report ng Senate Blue Ribbon sa Sugar importation fiasco.

Ito ang inihayag nina Senate Minority Leader Koko Pimentel at Deputy Minority Leader Risa Hontiveros makaraang ilabas ang kanilang sariling report.

Nakasaad sa kanilang report na walang sapat na factual at legal basis upang kasuhan ng kriminal at administratibo ang mga lumagda sa kontrobersyal na Sugar order number 4.

Ito ay sina Suspended Agriculture Undersecretary Leocadio Sebastian, dating Sugar Regulatory Administration Administrator Hermenegildo Serafica at SRA board members, Atty. Roland Beltran at Gerardo Valderrama.

Ayon kay Pimentel, maging ang direktiba sa Bureau of Immigration na ilagay sa “Look out Bulletin sina Sebastian ay wala ring factual at ligal na batayan.

Tinukoy sa kanilang Committee report na ‘In good faith’ ang paglagda nina Sebastian sa S.O 4 bunsod na rin ng memorandum na nagbibigay kapangyarihan kay Sebastian na lumagda sa ngalan ng Pangulo.

Para anya makasuhan ng paglabag sa Anti-Graft and Corrupt Practices Act at Anti-Agricultural Smuggling Act, kailangang napatunayan sa imbestigasyon na ‘In bad faith’ ang ginawa ng mga opisyal.

Samantala, kinuwestyun naman ni Hontiveros ang pananahimik ng Kumite sa accountability ni Executive secreary Vic Rodriguez.

Nakalulungkot anya na bigo o sadyang iniwasan ng Blue Ribbon na talakayin ang naging papel ni Rodriguez sa kontrobersya gayong malinaw naman na agad na-i-communicate sa Palace official ang pag-iisyu ng Sugar order 4.  —ulat mula kay Cely Ortega Bueno (Patrol 19)

Aprubado na sa ikalawang pagbasa sa Kamara ang House Bill 4673, na layuning ipagpaliban sa Disyembre ang Barangay at Sangguniang Kabataan Elections.

Isinumite ang Bill at Committee Report 33 nito sa plenary session para sa deliberasyon.

Layunin ng panukala na itakda sa unang Lunes ng December 2023 ang nasabing halalan sa halip na sa Disyembre a– 5 ngayong taon.

Ito’y upang lubusang makapaghandaan ng Comelec at Local Government Units at magpatupad ng corrective adjustments sa honoraria ng poll workers.

Nakasaad din sa Bill, na dapat magsimula sa tanghali ng January 1 ang termino ng mga mahahalal na Barangay at SK officials sa December 2023.  —ulat mula kay Tina Nolasco (Patrol 11)

Hindi pa napapanahon na gawing Optional ang pagsusuot ng face mask sa indoor spaces.

Binigyang-diin ito ni DOH OIC, Undersecretary Maria Rosario Vergeire sa gitna ng inilabas na Executive Order 3 ni Pangulong Bongbong Marcos na nagpahintulot na gawin na lamang boluntaryo ang pagsusuot ng face mask sa outdoor areas.

Ayon kay Vergeire, hindi nila inirerekomenda sa publiko na magtanggal ng face mask sa mga indoor space o mga crowded area.

Marami na anyang scientific evidence na malaki ang posibilidad nang hawaan ng sakit, tulad ng COVID-19 sa mga siksikang lugar.

Hinimok naman ni Vergeire ang mga vulnerable individual, partikular ang mga hindi pa bakunado kontra COVID-19, senior citizen at immunocompromised na magsuot pa rin ng face mask.

Ibinabala rin ng DOH official kahit nasa open spaces ay “Advisable” lamang ang paghuhubad ng face mask sa low-risk setting na may low-risk individuals.

Mas tumindi pa ang lakas at naging isa nang Tropical Storm ang dating Tropical Depression na may international name na Nanmadol na minomonitor ng PAGASA sa labas ng Philippine Area of Responsibility (PAR).

Ayon sa PAGASA Weather Bureau, namataan ang tropical storm kaninang alas-3 ng madaling araw sa layong 1,910 kilometers silangan ng extreme Northern Luzon.

Ang Tropical Storm ay may lakas ng hanging aabot sa 65 kilometers per hour malapit sa sentro at pagbugsong aabot naman sa 80 kilometers per hour na kumikilos patungong silangan-hilagang-silangan sa bilis na 10 kilometers per hour.

Mabagal itong kikilos pahilagang-silangan per lilihis ito patungong hilagang kanluran at posibleng pumasok ng Philippine Area of Responsibility (PAR) bukas ng umaga o Biyernes ng gabi.

Sakaling pumasok ng par ang Tropical Storm, maari pa itong lumakas at posibleng itaas ang tropical cyclone at maging isang typhoon category at papangalanan bilang bagyong Josie.

Ayon kay PAGASA weather specialist Grace Catañeda, nananatili itong malayo sa kalupaan at hindi din ito direktang makakaapekto sa anumang bahagi ng bansa maliban na lamang kung hahatakin nito ang Southwest Monsoon o Hanging Habagat na magdudulot ng mga pag-ulan lalo na sa western section ng southern Luzon at Visayas sa mga susunod na araw.