HOT STORIES OF THE WEEK

Tiniyak ng Land Transportation Office at German Information Technology Provider nitong Dermalog na reresolbahin ang mga problemang kinakaharap ng publiko sa pakikipag-transaksyon sa ahensya.

Kabilang sa mga solusyong ilalatag ang Activation ng Motor Vehicle Registration Information System, na pinaniniwalaan ng LTO at Dermalog na makatutulong upang mabawasan ang mahabang pila sa mga LTO office.

Ito’y makaraang ibasura ng Supreme Court ang petisyon ng isang Anti-Corruption Watchdog na humihirit na ipatigil ang implementasyon ng P836 million na kontrata ng LTO sa Dermalog para sa delivery ng mga lisensya.

Ayon kay LTO chief Teofilo Guadiz, suportado nila ang Motor Vehicle Registration Information System sa Public Portal ng Land Transportation Management System para sa renewal ng mga sasakyan upang mabawasan ang mahabang pila.

Sa oras anya na i-activate, maaaring makapag-renew ng mga sasakyan nang hindi na kailangang magtungo sa mga tanggapan ng ahensya sa iba’t ibang panig ng bansa.

Hati ang mga Local Government Unit sa bagong polisiya ng Pamahalaan na luwagan ang paggamit sa face mask sa outdoor settings sa gitna ng COVID-19 pandemic.

Ito ang naobserbahan ng Department of Health sa maagang pagpapatupad ng Executive Order number 3 ni Pangulong Bongbong Marcos na nagpapahintulot sa boluntaryong pagsusuot ng face masks sa pampublikong lugar, maliban sa mga crowded area.

Ayon kay DOH Officer-In-Charge, Undersecretary Maria Rosario Vergeire, sa unang araw pa lamang ng implementasyon ay marami ng mga LGU ang nagtatanong kung maaari na nilang ipatupad ang polisiya.

Mayroon din naman anyang ibang LGU na nais manatili ang umiiral na restriksyon at hindi pa rin papayag na walang face masks ang mga tao, lalo sa labas ng bahay.

Bagaman naglabas ng kautusan, napansin din ng DOH na marami pa rin namang naka-facemask sa mga pampublikong lugar.

Ipinag-utos na ng Sugar Regulatory Administration (SRA) na ilaan ang lahat ng locally produced na asukal ngayong taon at sa taong 2023 para sa domestic consumption.

Alinsunod sa Sugar Order 1, ang 100% ng raw sugar production na naani ngayong taon ay dapat na  i-classify bilang “B” o domestic sugar market.

Ang crop year 2022-2023 ay nagsimula ngayon lamang Setyembre at magtatapos sa Agosto a – 31 ng susunod na taon.

Sa pagtaya ng ahensya, halos 1.9 million metric tons ang domestic raw sugar production para sa 2022-2023 crop year.

Nilagdaan ang sugar order ni Pangulong Ferdinand “Bongbong” Marcos Jr., na kasalukuyang kalihim ng Department of Agriculture.

Lumagda rin sa nasabing kautusan sina Agriculture undersecretary Domingo Panganiban, acting SRA administrator David John Thaddeus Alba, SRA acting board members ma. Mitzi Mangwag at Pablo Luis Azcona.

Pinagpapaliwanag ng National Privacy Commission (NPC) ang ilang websites ng online gambling at cryptocurrency ang kanilang posibleng kaugnayan sa pagkalat ng mga text scam messages sa bansa.

Batay sa imbestigasyon ay idini-diretso ng ilang link at Uniform Resource Locators (URL), na kinabibilangan ng personalized spam messages, ang mga user sa gambling at cryptocurrency sites.

Hindi naman tinukoy ng NPC ang mga website na may direct link sa mga spam messages.

Ayon kay NPC Public Info and Assistance chief Roren Marie Chin, hindi mabatid kung saan gagamitin ang mga personal na impormasyon na nakalap ng mga gambling at cryptocurrency sites.

Gayunman, maaari anyang gamitin ang mga naturang impormasyon upang gumawa ng isa pang account at makakuha ng pera sa mga bank account ng isang partikular na user.

Nakikipag-ugnayan naman ang ahensya sa telecommunication companies at iba pang government agencies, gaya ng National Bureau of Investigation para sa “Intelligence Sharing” upang maresolba ang problema sa scam messages.

Sakaling mapatunayan na may kaugnayan sa paglipana ng text scams, mahaharap sa kasong paglabag sa Section 25 ng Data Privacy Act o Unauthorized Processing ang mga administrator ng website, pagmumultahin ng hanggang P5 million at makukulong ng hanggang tatlong taon.

Walang inilaang pondo ang Department of Transportation (DOTr) sa ilalim ng panukalang 2023 National Budget para sa mga driver at operator na nais bumili ng modernong Jeepney.

Sa deliberasyon ng 167 billion pesos na budget ng DOTr, natanong ni Kabataan Party-list Rep. Raoul Manuel kung magkano ang inilaan nito para sa subsidy program ng mga tsuper at operators.

Inihayag ni Transportation undersecretary Mark Steven Pastor na P778 million ang mungkahi pero hindi ito napabilang sa National Expenditure Program.

Gayunman, hindi ito nagustuhan ni Manuel at iginiit ang pangangailangan na malagyan ng pondo ang nasabing programa.

Hindi naman nabanggit ni Pastor ang dahilan nang kabiguang isama sa 2023 budget ng DOTr ang pondo para sa Modernization at Libreng Sakay Program.

Sa kasalukuyan, mayroong 5,300 modern Jeepney units at 300 Electric Vehicles na bumibiyahe sa iba’t ibang bahagi ng bansa.

Makatatanggap ng 18 buwang tulong sa pag-upa ang mga Informal Settler Families (ISF) na mawawalan ng bahay dahil sa North-South Commuter Railway Project.

Ito ang tiniyak ni Transportation undersecretary for Railways Cesar Chavez sa gitna ng presentasyon ng panukalang pondo ng kagawaran para sa 2023 na nagkakahalaga ng P167 billion.

Ipinaliwanag ni Chavez na nagmula ang pondo sa inutang ng Pilipinas sa Asian Development Bank (ADB).

Bibigyan anya ng P3,000 hanggang P10,000 rental subsidy ang mga maaapektuhang pamilya bukod pa sa bayad sa mga bahay na gigibain dahil sa proyekto.

Ang 777 billion peso Railway Project ay pinondohan ng ADB at Japan International Cooperation Agency na inaasahang matatapos sa 2028.

Inihirit ng isang miyembro ng OCTA research team na huwag nang pagsuotin ng face mask ang mga mag-aaral habang nasa loob ng paaralan.

Iginiit ito ni OCTA research fellow, Father Nicanor Austriaco, sa gitna ng boluntaryo nang pagsusuot ng face mask sa outdoor at open spaces settings.

Dalawang taon na anyang nahihirapan ang mga mag-aaral sa pagsusuot ng face mask na naka-aapekto sa kanilang pananalita.

Ginawa namang patunay ni Austriaco ang pagsusuri ng US-Based Health Policy Expert na si Dr. Leana Wen na nagsabing ‘Disadvantageous’ ang paggamit ng face mask sa mga bata.

Samantala, agad kinontra ni Health Officer-In-Charge Maria Rosario Vergeire ang pagsusuri ni Wen at iginiit na imbes na panganib ay proteksyon ang idinudulot ng face mask sa mga bata.

Sa kabila nito, hinimok ni Vergeire ang mga magulang, guro at mga estudyante na magsuot pa rin ng face mask sa loob ng mga silid-aralan at maaari lamang itong alisin kapag nasa open spaces.

Napanatili ang lakas ng tropical depression na nasa labas ng Philippine Area of Responsibility (PAR) habang patungong silangan-hilagang silangan ng bansa.

Ayon sa PAGASA Weather Bureau, huling namataan ang tropical depression sa layong 1,865 kilometers east of extreme northern sa labas ng PAR na may lakas ng hanging aabot sa 55 kilometers per hour at pagbugsong aabot sa 70 kilometers per hour.

Kumikilos ang bagyong Josie pa-east northeastward sa bilis na 10 kilometers per hour.

Nabatid na bumabagal ang pagkilos nito patungo sa hilagang-silangan at posibleng biglang lumiko pakanluran hilagang-kanluran ngayong araw o bukas patungo sa hilagang-silangan ng Philippine Area of ​​Responsibility (PAR).

Hinahatak ng bagyong Josie ang Southwest Monsoon o Hanging Habagat na patuloy na lumalakas at nakakaapekto sa ilang lugar sa bansa partikular na sa Luzon at Visayas.

Nagpaalala naman sa ang PAGASA na panatilihing maging alerto at makinig sa mga abiso ng lokal na pamahalaan at ng iba pang ahensya para sa kaligtasan ng bawat isa.

Ibinasura ng Supreme Court ang petisyon ng isang Anti-Corruption Watchdog kontra sa pagpapatupad ng P836 million peso contract ng Land Transportation Office sa isang German Technology Company para sa delivery ng mga lisensya.

Ang nasabing petisyon ay inihain ng Anti-Trapo Movement upang ipatigil ang 2017 deal ng LTO sa Dermalog para sa pagbili ng mahigit walong milyong plastic license cards na mayroong five-year validity.

Sa 25 pahinang desisyon matapos ang promulgasyon, inihayag ng S.C. na ang kawalan ng legal standing ng petitioner na dumulog sa Korte ang  dahilan nang pagkakabasura ng petisyon.

Ipinunto ng Korte Suprema na nabigo rin ang petitioner na patunayan na binaliwala ng LTO ang constitutional at statutory prohibitions sa pag-award sa kontrata sa Dermalog.

Nag-ugat ang kaso sa 2017 deal sa pagitan ng LTO at private firms na NEXTIX, Dermalog Identification Systems at CFP strategic transaction advisors para sa pagbili ng plastic license cards.

Kinuwestyon ng Anti-Trapo Movement ang kontrata sa S.C. at iginiit na nilabag ng ahensya ang umiiral na Procurement Laws pero ipinunto ng Korte Suprema na walang Grave Abuse of Discretion sa panig ng LTO nang i-award nito ang kontrata.

Ang Dermalog ang kasalukuyang information technology system provider ng LTO.

Ang nasabing kumpanya ang sinisi ng ilang LTO official sa pagkaka-delay ng renewal ng mga lisensya bunsod ng mga aberya at nagdulot ng kaliwa’t kanang perwisyo sa mga vehicle owners.

Posibleng abutin ng anim na buwan hanggang isang taon bago ma-stabilize ang administrasyon ni Pangulong Ferdinand “Bongbong” Marcos Jr.

Ito ang paliwanag ni Philippine National Police (PNP) Police General Rodolfo Azurin Jr. sa mga kritiko ng pangulo sa gitna ng viral videos sa social media ng mga insidente ng krimen.

Ayon kay Azurin, aabutin ng nasabing panahon para magiging matatag ang administrasyong Marcos dahil nagkaroon ng pagbabago sa liderato kung paano reresolbahin ang mga problema.

Ito aniya ang dahilan kung bakit hindi natutuwa ang mga kritiko ng pangulo.

Samantala, umapela si Azurin sa mga nagpopost ng dating videos na huwag itong gawin sa halip ay tumulong na lamang sa gobyerno para mapabuti pa ang ekonomiya.