HOT STORIES OF THE WEEK

Masyado pang maaga para alisin ang outdoor mask mandate dahil mababa pa rin ang bilang ng mga Pilipinong nagpaturok ng booster dose laban sa Covid-19.

Ayon kay Private Hospitals Association of the Philipines, Inc. (PHAPI), nananatiling banta ang COVID-19 sa bansa, na may dalawang libo hanggang tatlong libong kasong naitatala kada araw.

Itinanggi rin ni de Grano na meron ng “wall of immunity” dahil malamang aniya’y halos wala nang epekto ang primary series ng COVID-19 vaccine.

Batay sa datos ng Department of Health (DOH), nasa 18.5 million pa lamang ang nakatanggap ng booster shot noong September 11.

Matagumpay na nailunsad ng pamahalaan ang librong naglalaman umano ng mga hakbang para sa Food Crisis agenda ni Pangulong Ferdinand “Bongbong” Marcos Jr., na siya ring tumatayong kalihim ng Department of Agriculture (DA).

Ang paglunsad ng libro ay may titulong “Leave Nobody Hungry” na isinulat ni Virginia R. Rodriguez na dating reporter ng Manila Bulletin kung saan, ginanap ang paglunsad sa Manila Ballroom ng Manila Hotel kahapon.

Sa naging pahayag ni Press secretary Trixie Cruz-Angeles, nakapaloob sa naturang libro ang mga makabagong teknolohiya at organikong pamamaraan sa pagsasaka bilang sagot sa kagutuman ng taumbayan.

Ayon kay sec. Angeles na malaki ang maitutulong ng nilalaman ng naturang libro kabilang na ang “Masaganang 150” para mapataas ang ani ng milyun-milyong magsasaka sa bansa.

Samantala, sinabi naman ni Rodriguez na nais niya umanong makatulong sa kasalukuyang administrasyon na masolusyonan ang problema sa kagutuman kaya siya gumawa ng aklat na magiging gabay para mga magsasaka.

Bukod sa “food security”, nakapaloob din sa libro ang paglikha ng maraming trabaho na matagal nang ninanais ng bawat isa upang mapataas ang ekonomiya ng bansa.

Nananatili paring nakabinbin sa tanggapan ng Food and Drug Administration o FDA ang aplikasyon sa paggamit ng COVID-19 vaccines para sa mga batang apat na taong gulang pababa.

Ito ang inihayag ni Department of Health (DOH) Officer-In-Charge Undersecretary Maria Rosario Vergeire, na hanggang sa ngayon ay hindi pa naiisyuhan ng Emergency Use Authorization (EUA) ang naturang mga bakuna para sa nasabing age group.

Ayon kay Vergeire, patuloy pang tinatalakay ng Health Technology Assessment Council (HTAC) ang isinumiteng aplikasyon sa FDA.

Nabatid na marami na sa naturang age group ang dinapuan ng virus kaya dapat na agad desisyonan ang pag-apruba sa pagbibigay ng EUA para agad na mabakunahan ang mga bata lalo na ang mga nasa lugar na may mataas na kaso ng COVID-19.

Matatandaan na sa Estados Unidos, ang mga batang wala pang limang taong gulang ay tinuturukan na ng Pfizer at Moderna COVID-19 vaccines bilang proteksiyon laban sa COVID-19 at iba pang kumakalat na virus.

Muling magpapatupad ng panibagong tapyas-presyo sa produktong petrolyo ang mga kumpanya ng langis.

Ayon sa Caltex, Shell, at Seaoil, magkakaroon ng rollback na P0.45 sa kada litro ng gasolina, P1.45 sa kada litro ng diesel at P1.70 naman sa kerosene.

Ipatutupad din ng Cleanfuel at Petrogazz ang kaparehong price adjustment maliban sa kerosene.

Nabatid na ang rollback ay bunsod ng pangamba sa recession sa Europe at Estados Unidos, at lockdown sa China dahil sa Covid-19.

Batay sa pinakahuling datos mula sa Department of Energy hanggang nitong August 23, ang year-to-date total adjustments ay may net increase na P18.15 sa kada litro ng gasolina; P31.70 sa kada litro ng diesel; at P27.10 naman sa kada litro ng kerosene.

Umabot na sa alarming rate ang mga kaso ng pagmamaneho ng lasing.

Batay sa datos ng Land Transportation Office (LTO), naitala mula Enero hanggang Agosto ngayong taon ang nasa 402 road crash incidents, kung saan 353 na drayber ang nagpositibo sa impluwensya ng alcohol.

Sa nasabing bilang, 15 katao ang nasawi habang 232 ang sugatan.

Sinuspinde naman ng LTO sa loob ng 90 araw ang drivers license ng mga nasabing indibidwal habang nakabinbin ang pagpapalabas ng isang resolusyon na magpapataw ng mga kaukulang parusa.

Sa ilalim ng Republic Act 10856 o ang Anti-Drunk and Drugged Driving Act of 2013, dapat na 0.05% lamang ang alcohol sa katawan habang nagmamaneho para maiwasan ang mga kaso kaugnay rito.

Pinaalalahanan naman ng LTO ang publiko na ang pagmamaneho sa ilalim ng impluwensya ng alcohol o ilegal na droga ay napapailalim sa civil and administrative sanctions and penalties.

Tiniyak ng Department of Social Welfare and Development  na kanilang tutulungan ang mga mag-aaral na hindi na-accomodate at walang kakayahan na makapag-register online sa Educational Assistance Program ng ahensya.

Sa panayam ng DWIZ, sinabi ni DSWD sec. Erwin Tulfo na makikipagtulungan sila sa mga lokal na pamahalaan at mga mambabatas para sa maayos na distribusyon.

Una nang sinabi ng DSWD na wala nang extension ang pamamahagi ng educational aid na nakatakdang magtapos sa Setyembre 24.

Nabatid na umabot na sa mahigit 935 milyong halaga ng educational assistance ang naipamahagi ng ahensya sa mahigit 370,000 student beneficiaries.

After September 24 yung last saturday po natin sa online ay ibababa po natin ‘yan per district sa tulong po ng ating mga mambabatas, sa mga distrito ibababa po natin ‘yan, so inaayos lamang ho natin  at ko-coordinate po kami sa mga Law makers natin kasi sila ho identified nila yung mga constituents po nila yung mga mahihirap.  —- Tinig ni DSWD sec. Erwin Tulfo sa panayam ng DWIZ.

Nagsimula nang mamahagi si Senator Imee Marcos ng nutribun para sa mga bata at kani-kanilang pamilya sa Tanay, Rizal.

Nasa 3,000 batang edad tatlo hanggang lima ang nakatanggap ng nutribun bilang bahagi ng tatlong buwang feeding program.

Ayon kay Marcos, ang mga nasabing tinapay ay siksik sa protina at vitamin A, B1 at C at maaaring makatulong sa pag-iwas sa undernourishment.

Matatandaang mula noong maging senadora si Marcos noong 2019, ay isinusulong niya na ang muling pagbuhay sa programang sinimulan ng kanyang yumaong ama na si President Ferdinand Marcos Sr.

May iba’t iba din itong flavor tulad ng ube, tsokolate, mungo at keso, nagbigay din sila ng lugaw at masustansyang powder drinks para sa mga bata. —sa panulat ni Hannah Oledan

Suportado ng National Telecommunications Commission (NTC) ang pagsasabatas ng National Telecommunications Bill na muling inihain sa 19^th Congress.

Sa gitna ito nang naglipanang mga text scam at spam na pumuputakte sa milyun-milyong mobile phone user sa bansa.

Aminado si NTC deputy commissioner Edgardo Cabarios na malakas ang loob ng mga nasa likod ng text scam dahil hirap ang gobyerno na matunton o ma-trace at maparusahan sila.

Hangga’t wala anyang batas na susugpo sa mga scammer ay asahang lalaganap pa rin ang modus ng mga ito at maraming posibleng ma-biktima.

Bahagya pang lumakas ang Bagyong Inday habang nasa karagatan na huling namataan kaninang alas-4 ng umaga sa layong 425 kilometers northeast ng Itbayat, Batanes.

Ang bagyong #Inday ay may lakas ng hanging aabot sa 155 kilometers per hour at pagbugsong aabot sa 190 kilometers habang patungong Yaeyama Islands na sakop ng Japan.

Ayon kay PAGASA weather specialist na si Aldczar Aurelio, kumikilos ang bagyo pa hilaga-hilagang-kanluran sa bilis na 10 kilometers per hour.

Samantala, namataan din ang isang Low Pressure Area (LPA) na nasa labas ng Philippine Area of Responsibility (PAR) sa layong 1,995 kilometers, silangan-hilagang-silangan ng extreme Northern Luzon pero mababa ang tiyansa nito na makapasok ng bansa habang kumikilos pa-north westward patungong Japan.

Magiging maayos naman ang panahon sa bansa ngayong araw, maliban lang sa mga isolated rainshowers dahil narin sa thunderstorm.

Asahan din ang malalakas na hangin sa extreme Northern Luzon dahil sa Bagyong Inday pero sakaling hindi magbago ang galaw ng nito, inaasahan na lalabas ito mamayang gabi o bukas ng madaling araw.

Mataas din ang tiyansa na humina ang bagyo dahil sa malamig na panahon mula sa karagatan at malakas na hangin na dala naman ng bagyo.

Sa ngayon, nakataas ang gale warning ng pagasa sa Batanes at Babuyan Islands dahil sa nararanasang malalaking alon sa dagat na aabot sa 4 meters kaya pinagbabawalan munang pumalaot ang mga kababayan nating mangingisda at maliliit na sasakyang pandagat.

Pinaigting na ng National Capital Region Police ang police visibility sa gitna ng mga napapaulat na insidente ng pagdukot.

Ito ang tiniyak ni NCRPO spokesman, Lt. Col. Dexter Versola matapos maglabas ang Philippine Chinese Chamber of Commerce and Industry Incorporated (PCCCII) ng datos na umabot na sa 56 ang insidente ng pagdukot.

Ayon kay Versola, nakipag-ugnayan na rin sila sa PCCCII upang matutukan ang datos at maresolba ang mga kaso ng pagdukot, partikular sa ilang Chinese na may kaugnayan sa operasyon ng Philippine Offshore Gaming Operator.

Muli namang inabisuhan ng PNP official ang publiko, lalo ang mga netizen na iwasang mag-post o mag-share ng mga hindi beripikadong impormasyon ng mga umano’y kidnapping incident.