HOT STORIES OF THE WEEK

Nagpatupad ng curfew hour ang Cavite City kasunod na rin ng insidente ng pagsabog noong Miyerkules kung saan, tatlo sa pitong mga biktima ang naitalang nasawi habang apat naman sa kanila ang patuloy pang nagpapagaling sa ospital.

Ayon kay Mayor Denver Chua, ikinasa ang curfew sa mga kabataang edad 18 pababa na sinimulan alas-10:00 kagabi at natapos alas-4:00 kaninang madaling araw.

Sinabi ni Chua na mahalaga ang kaligtasan ng mga kabataan laban sa iba’t-ibang uri ng mga banta, kaya dapat mas higpitan ang seguridad sa kanilang lugar.

Matatandaang naaktuhan ng mga tanod ang dalawang grupo ng mga kabataang lalaki na nagkakagulo sa bahagi ng Sta. Cruz, Cavite City kung saan, isang suspek na may hawak na granada ang nagbanta na kaniyang tatanggalin ang firing pin kung siya ay huhulihin ng mga tanod.

Nataranta pa umano ang suspek na nagmitsa para kaniyang mabitawan ang hawak na granada at agad na sumabog.

Kabilang sa mga nasawi sina Julius Tindoc; Joseph Barrera; at Mark Gio Layug; habang nagpapagaling pa sa ospital sina Erickson Valenzuela; Alejandro Dizon; Reymart Patricio; at ang suspek na si Arjay Camacho habang ipinadala na sa City Social Welfare and Development Office ang isa pang suspek na kinilala namang si alias Daniel.

Samantala, nagpaalala naman si Chua sa mga kabataan na iwasang masangkot sa kaparehong uri ng kaguluhan para maiwasan ang anumang insidente at mapanatili ang kaligtasan ng bawat isa.

Mabibili na sa Calasiao Public Market sa probinsya ng Pangasinan ang mura at bagsak presyo ng mga sibuyas.

Ibinebenta ng mga vegetable vendor sa halagang P50 ang kada kilo ng sibuyas na nagpagaan sa mga mamimili matapos pumalo ang presyo nito sa P500 hanggang P700 per kilo sa ilang pamilihan lalo na sa Metro Manila.

Ayon sa mga mamimili, sinamantala na nila ang mababa at abot-kayang halaga ng sibuyas dahil sa pangamba na baka muling sumirit ang presyo nito sa merkado.

Sa pahayag naman ng mga magsisibuyas, ibinagsak presyo nila ang kanilang produkto dahil sa takot na baka malugi bunsod ng pag-angkat ng mga imported na sibuyas sa bansa.

Muling binigyang diin ni Pang. Ferdinand Marcos Jr. ang kahalagahan ng digitalization sa mga government transactions, partikular sa Bureau of Customs (BOC), upang masugpo ang talamak na smuggling.

Bukod dito, sinabi ni PBBM na makakatulong sa paglago ng ekonomiya ang mas modernisadong data at transaction handling sa gobyerno.

Iginiit ni Pangulong Marcos na importanteng masolusyunan ang isyu ng walang humpay na smuggling kung saan halos lahat na ng mga produkto ay iligal nang naipupuslit sa bansa.

Dapat aniyang gamitin sa Pilipinas ang mga proseso na matagal nang umiiral sa ibayong dagat.

Nanawagan din ang Presidente ng drastic bureaucratic reforms laban sa smuggling na nagiging banta na sa mga lokal na industriya at nakakaapekto sa tax collection ng pamahalaan.

Nagsimula nang tumaas ang presyo ng mga bulaklak sa Dangwa Flower Market sa lungsod ng Maynila, ilang linggo bago ang araw ng mga puso.

Mula sa P300 kada bundle o P30 kada stem, pumalo na sa P700 ang isang bundle ng local roses habang P30 naman ang kada piraso.

Mula P100 hanggang P120, ngayon ay nasa P300 hanggang P350 na ang isang bundle ng short-stem roses.

Sumirit naman sa P1,500 ang presyo ng isang bundle ng imported roses mula sa dating P1,000 habang P100 naman ang kada piraso nito na dating nasa P80 lamang.

Nasa P800 naman mula P500 ang kada bundle ng sunflower habang pumalo sa P80 ang kada piraso nito mula sa dating P50

Mabibili naman sa halagang P300 ang kada kilo ng baby’s breath mula P150.

Ayon sa mga manininda, ang naturang pagtaas ng presyo ay dahil sa kakulangan sa suplay bunsod ng malamig na klima.

Samantala, para sa mga mamimili na nagtitipid makakabili naman ng dried flowers sa halagang P70 kada piraso habang P700 ang customized bouquet, habang ang wooden flowers ay nasa P50 kada piraso habang P500 hanggang P700 naman ang customized bouquet nito. —sa panulat ni Hannah Oledan

Idineklara nang COVID-19-free ang Lucena City na kabisera ng Quezon Province habang bumaba naman sa 14 ang bilang ng aktibong kaso sa lalawigan.

Batay sa pinakahuling datos, inanunsyo ng Integrated Provincial Health Office (IAPH) na ang natitirang COVID-19 patient sa lungsod ay nakarekober na.

Napag-alaman din na 30 mula sa 41 munisipalidad sa lalawigan ay wala nang naitalang kaso ng COVID-19.

Sa 30 munisipalidad ay siyam na lamang ang may tig-iisang aktibong kaso ng nasabing virus.

Samantala, nakapagtala ang IPHO ngayong buwan ng 84 na bagong kaso ng COVID-19 at limang nasawi. —sa panulat ni Hannah Oledan

Arestado ang walong lalaki matapos mahuli sa aktong kinakatay ang 15 pawikan sa Sulu.

Kabilang sa mga kinatay ay ang isang hawksbill sea turtle na kasalukuyang critically endangered.

Nakatakda umanong ibenta ng grupo ang mga kinatay na pawikan sa Chinese buyer sa pagitan ng Taw-Tawi at Palawan.

Nakumpiska rin mula sa grupo ang limang motorized banca at ilang kagamitan sa panghuhuli ng pawikan.

Samantala, nahaharap ang mga ito sa kasong paglabag sa Wildlife Resources Conservation and Protection Act. —sa panulat ni Hannah Oledan

Inihain sa senado ang panukalang batas na magkakaloob ng libreng pagpapalibing sa mahihirap na pamilya.

Ito ay partikular sa mga Pilipinong P15,000 lamang ang sinasahod kada buwan, walang sariling bahay at sasakyan.

Ito ang Senate Bill No. 1695 ni Senador Raffy Tulfo na nais tuldukan ang problema ng maraming Pilipino na hindi kayang tugunan ang malaking gastusin sa burol at pagpapalibing.

Bagamat nagbibigay ng burial assistance na P10,000 ang Department of Social Welfare and Development (DSWD), ay pinagdadalamhatian pa rin ang malaking gastos sa pagpapalibing.

Ito ay dahil sa aabot sa P10,000 hanggang daan-libong piso ang magagastos sa burol at pagpapalibing ng mga yumaong kaanak.

Kasama naman sa sasagutin ng gobyerno ang paghahanda ng funeral documents, pagpapa-embalsamo, burol, pagpapalibing, cremation at tatlong araw na burol sa bahay o barangay hall hanggang sa mailibing.

Samantala, tig-isang miyembro lamang ng pamilya kada buwan ang maaaring mabigyan ng libreng serbisyo kada mortuary branch. —sa ulat ni Cely Ortega-Bueno (Patrol 19), sa panulat ni Hannah Oledan

Nakibahagi si Vice President Sara Duterte sa paggunita ng Israel sa pandaigdigang pag-alala sa mga biktima ng holocaust.

Hinimok din ni Duterte ang mga paaralan na gunitain ng makasaysayang pangyayari dahil maraming leksyon ang mapupulot mula rito.

Nakiisa rin sa pagdiriwang si Israeli Ambassador to the Philippines Ilan Fluss, na isa rin sa mga naging biktima ng holocaust.

Pinasalamatan ni Fluss si Duterte dahil sa pakikipagtulungan nito sa pag-oorganisa at pagmemorya sa holocaust sa lahat ng paaralan at pasilidad ng Department of Education.

Kaugnay nito, nagpasalamat din si Fluss kay dating Pangulong Manuel L. Quezon sa pagtanggap nito sa mahigit 1,300 Jewish refugees sa Pilipinas noong 1939. —sa panulat ni Hannah Oledan

Palalakasin pa ng Department of Education (DepEd) ang mga programa nito na tumutugon sa mental health issues ng mga mag-aaral, maging ang pagpapaigting ng security measures sa mga paaralan kasunod ng mga naiulat na on-campus violence.

Ayon sa DepEd, makikipag-ugnayan sila sa mga mental health experts at advocates sa pagbuo ng mga programa upang matugunan ang nasabing isyu.

Inatasan na rin ni Vice President at Education secretary Sara Duterte ang mga Regional at Schools Division Offices na makipag-ugnayan sa mga local police sa pagtukoy sa mga paaralan na kinakailangan ng spot inspection ng mga armas.

Kasunod ito ng insidente nitong Huwebes sa Benito Nieto Elementary School sa San Jose Del Monte, Bulacan kung saan aksidenteng nabaril ng isang 12-anyos na estudyante ang kaniyang sarili.

Noong nakaraang linggo naman ay nasawi ang isang 13-anyos na estudyante sa Culiat High School sa Quezon City, matapos saksakin ng kanyang kamag-aral.