HOT STORIES OF THE WEEK

Nakatutok na ang Land Transportation Office (LTO) sa pagbabalik ng libu-libong motorista sa Metro Manila pagkatapos ng Undas.

Ito ang tiniyak ni LTO – National Capital Region West Director Roque Verzosa.

Inabisuhan na ni Versoza ang mga motorista na asahan ang mabigat na daloy ng trapiko, lalo’t inaasahang marami ang magbabalik-trabaho at eskwela, simula ngayong araw.

Simula pa anya noong isang linggo ay puspusan ang trabaho ng LTO bilang bahagi ng Oplan Undas at Oplan Isnabero laban naman sa mga isnaberong tsuper. —sa panulat ni Jenn Patrolla

Pumalo na sa 121 million pesos ang halaga ang iniwang pinsala sa imprastratukra ng bagyong Paeng sa Zamboanga City.

Batay sa inisyal na ulat ng City Engineer’s Office, karamihan sa mga nasira ay mga tulay at slope protection facilities.

Nag-iwan din ng 1.8 million pesos na halaga ng pinsala ang bagyo sa sektor ng agrikultura.

Maglalaan naman ng pondo ang lokal na pamahalaan para sa mga naapektuhan ng baha sa lungsod na kasalukuyang nasa ilalim ng state of calamity. —sa panulat ni Jenn Patrolla

Mahigit 62,000 pasahero na ang dumagsa sa Parañaque Integrated Terminal Exchange (PITX) ngayong Undas 2022.

Ayon kay PITX Spokesperson Jason Salvador, naging maayos ang daloy ng mga biyahe papasok at palabas ng Metro Manila at iba’t ibang probinsya.

Nitong weekend ay kinansela ang maraming biyahe dahil sa pananalasa ng bagyong Paeng.

Bilang bahagi naman ng Oplan Biyaheng Ayos, naglagayang Department of Transporation ng Malasakit Help Desk sa main entrance ng PITX.

Samantala, 24 oras ding nag-inspeksyon ang PNP bilang bahagi ng security protocols sa paligid ng mga terminal. —sa panulat ni Jenn Patrolla

Patuloy na pinaghahanap ng Philippine Coast Guard (PCG) ang lima pang indibidwal sa Datu Odin Sinsuat, Maguindanao matapos ang pananalasa ng bagyong Paeng.

Nagsagawa rin ng aerial survey sa lugar bilang bahagi ng search and rescue operations kasabay ng paghahatid ng relief supplies sa Cotobato Airport para sa mga residenteng naapektuhan ng bagyo.

Naging abala rin ang PCG sa pamamahagi ng relief goods sa mga pamilyang apektado sa lalawigan ng Capiz.

Samantala, pinapurihan naman ni Pangulong  Bongbong Marcos ang mahalagang papel ng Coast Guard sa pagtiyak sa seguridad at kaligtasan ng mga nasalantang pamilya. —sa panulat ni Jenn Patrolla

Bagsak-presyo na ang mga bulaklak sa Dangwa Market sa Sampaloc, Maynila, ngayong Undas.

Ayon sa mga nagtitinda, bumaba ang presyo lalo na ang mga flower arrangement na ibinebenta sa presyong 150 pesos kada dalawa.

Tila nilangaw anila ang Dangwa dahil nagsarado ang ilang tindahan.

Isa sa mga dahilan ng matumal na bentahan ang epekto ng Bagyong Paeng, lalo’t nag-online na lamang ang mga nagtitinda ng bulaklak. —sa panulat ni Jenn Patrolla

Pinatitiyak ni Pangulong Ferdinand ‘Bongbong’ Marcos ang sapat na suplay ng mga gamot sa evacuation centers.

Sa isinagawang situation briefing sa Maguindanao, sinabi ng pangulo na dapat gawin ng polisiya ang pagsasama ng gamot sa mga ipinamamahaging relief goods, lalo na para sa mga senior citizen tuwing may kalamidad.

Maliban dito, pinasisiguro rin ng punong ehekutibo na dapat magkaroon ng mga gamot na hindi na kailangan ng prescription tulad ng para sa ubo, sipon, lagnat at iba pa.

Ipinag-utos naman ng pangulo ang pagpapadala ng mga doktor matapos mapaulat na ilang bakwit na ang nagkakasakit. —sa panulat ni Jenn Patrolla

Umabot na sa 400,000 katao ang dumagsa sa Manila North at South cemeteries.

Naitala ang nasabing bilang hanggang ala-5:30 kahapon o sa mismong oras ng pagsasara sa publiko ng mga naturang sementeryo.

Batay sa datos ng Manila Police District (MPD), pinaka marami sa Norte na umabot sa 226,000 habang 204,000 naman sa South.

Ayon kay MPD – Station 3 Commander, Lt. Col. Ramon Solas, kahit kaunti na lang ang mga bumibisita sa mga sementeryo, mananatili silang naka-alerto hanggang ngayong araw, Nobyembre 2.

Wala naman anya silang naitalang untoward incidents sa mga nabanggit na lugar maliban sa mga ipinagbabawal na gamit na nakumpiska, gaya ng alak at matutulis na bagay. —sa panulat ni Jenn Patrolla 

Kanselado ngayong araw ang klase sa ilang lugar sa bansa bunsod ng pananalasa ng Bagyong Paeng.

Kabilang sa mga lugar na kanselado ang klase ang:

• Cavite: All levels na tatagal hanggang Nov. 5.
• Tuguegarao City: All levels, public and private na tatagal hanggang bukas.
• Antique: All levels, public and private na tatagal hanggang Biyernes at magbabalik sa November 7.
• Laguna: All levels, public and private hanggang Nov. 5.
• Cotabato City: All levels, public and private hanggang Nov. 5.
• at ang Vigan City: All levels sa pampublikong paaralan.

Samantala, kinansela narin ngayong araw ang pasok sa ilang lugar sa Cagayan kabilang na ang:

• Solana
• Enrile
• Gattaran
• Lal-lo
• Amulung: Elementary to Senior High School, public and private na tatagal hanggang bukas.
• Tuguegarao City: All levels, public and private hanggang bukas,
  at ang Aparri: All levels sa mga pampublikong paaralan.

Aabot sa 100 sako ng bigas ang ipinamahagi ng Office of the Vice President Disaster Operation Center (OVP-DOC) sa mga naapektuhan ng Bagyong Paeng sa Laguna.

Katuwang ng OVP sa paghatid ng tulong ang mga tauhan ng Philippine National Police (PNP) at mga tauhan ng Philippine Air Force (PAF).

Batay sa datos ng City Social Welfare and Development Office (CSWDO), nasa 1,211 na indibidwal ang lumikas sa anim na evacuation centers dahil sa Bagyong Paeng.

Nagpasalamat naman ang pamahalaang lokal ng lalawigan at nangako na kanilang sisiguraduhin na makakarating sa mga apektadong pamilya ang bawat butil ng bigas na ipinagkaloob ng OVP.