HOT STORIES OF THE WEEK

Pinamamadali na ni Senator Bong Revilla, Jr. sa Department of Public Works and Highways ang pagkumpuni sa mga nasirang imprastruktura, gaya ng mga tulay at dike dahil sa hagupit ng Bagyong Paeng.

Si Revilla ang Chairman ng Senate Committee on Public Works at kabilang siya at kanyang pamilya na pawang taga-Cavite na matinding nasalanta ng bagyo.

Sa kanyang sulat kay DPWH Secretary Manuel Bonoan, tinanong ng Senador kung kakayanin ba ang repair sa loob ng anim na araw.

Inihalimbawa naman ng Senador ang nangyaring magnitude 9.1 na lindol sa Japan noong March 2011, na umabot lang umano ng anim na araw ang pag-repair sa mga kalsada.

Pinagsusumite rin ng mambabatas si Bonoan ng report sa kabuuang pinsala ng mga pampublikong imprastruktura kabilang ang mga tulay, dike, flood control structures.

Tiniyak naman ni Revilla na hihingin niya sa Senate Committee on Finance na isama sa 2023 National Budget ang pondo para sa repair ng mga imprastruktura. —ulat mula kay Cely Ortega Bueno (Patrol 19)

Tiniyak ng Department of Trade and Industry na sapat ang suplay ng mga pangunahing produkto sa kabila ng epekto ng Bagyong Paeng.

Ayon sa DTI, nakikipagtulungan na sila sa Philippine Chamber of Food Manufacturers upang masiguro na patuloy na nasusuportahan ang suplay ng basic necessities at prime commodities.

Muli namang pina-alalahanan ni DTI Secretary Alfredo Pascual ang mga negosyante na tumalima sa price freeze sa basic necessities sa mga lugar na nasa ilalim ng State of Calamity.

Sa ilalim ng Price Act, otomatikong hindi gagalaw ang presyo ng mga bilihin sa mga lugar na nasa State of Calamity maliban na lamang kung aalisin ito ng Pangulo.

Kahapon ay isinailalim na ni Pangulong Bongbong Marcos sa State of Calamity sa bisa ng Proclamation 84 ang CALABARZON, Bicol, Western Visayas at Bangsamoro Autonomous Region in Muslim Mindanao.

Dumating na sa Maynila mula Puerto Princesa City, Palawan ang isa pang Person of Interest (POI) sa pagpatay sa brodkaster na si Percival Mabasa o Percy Lapid.

Dakong ala-7 kagabi nang dumating sa Ninoy Aquino International Airport-Terminal 3, Pasay City sakay ng Cebu Pacific Flight ang mga tauhan ng National Bureau of Investigation bitbit ang POI.

Muntik pang magkagirian ang mga tauhan ng NBI at Aviation Security Police dahil umano sa kawalan ng koordinasyon.

Armado ang mga tauhan ng NBI na ikina-alarma naman ng Aviation Police pero kalauna’y naayos din ang sigalot at humingi ng paumanhin ang mga taga-NBI.

Bagaman hindi pa pina-pangalan ang Person of Interest at matukoy ang naging partisipasyon nito sa pagpatay kay Lapid, inaasahang iimbestigahan naman ito sa pagkamatay ng ‘‘middleman’’ na si Jun Villamor. —ulat mula kay Raoul Esperas (Patrol 45)

Mahigit 7,000 lata ng beer, P50,000 cash, iba’t ibang uri ng armas at iligal na droga ang narekober sa inilargang “Oplan Galugad” sa New Bilibid Prison, Muntinlupa City.

Bukod sa mga alak na nagkakahalaga ng P1,000 bawat isa, nakasabat din ang mga prison guard ng mga baraha, cellphone at laptop.

Ayon kay Bureau of Corrections Officer-in-Charge Gregoio Catapang Jr., ang mga kontrabando ay isinuko ng mga gang leader matapos ang isang dayalogo.

Magugunitang nag-take over si Catapang bilang BuCor Director matapos ipag-utos ni Pangulong Bongbong Marcos ang suspensyon kay Director General Gerald Bantag.

Kaugnay ito sa pagkamatay ng bilanggong si Jun Villamor, na nagsilbi umanong ‘‘middleman’’ na nag-hire ng gunmen upang patayin ang brodkaster na si Percival “ka-Percy Lapid” Mabasa noong Oktubre.

Itinuro ng ilang witness si Suspended Bureau of Corrections Director Gerald Bantag bilang isa sa mastermind sa pagpatay sa brodkaster na si Percival “Percy Lapid” Mabasa.

Ito ang kinumpirma ni Danilo Pelagio, Legal Counsel ng kapatid ni ka Percy na si Roy Mabasa.

Ayon kay Pelagio, 3 Gang Leader sa New Bilibid Prison ang nagbunyag na isa si Bantag isa sa mga utak sa krimen.

Matapos anya ang pag-amin ng umano’y gunman na si Joel Escorial at pagpatay sa hinihinalang ‘‘middleman’’ na si Jun Villamor, ilan pang testigo at bilanggo ang lumutang upang ituro ang suspendidong BuCor Director.

Mayroon din umanong ebidensya ang mga testigo laban kay Bantag, kabilang na ang perang ibinayad sa gunman na naberipika naman sa pamamagitan ng bank deposits.

Isa rin anyang hindi pa pina-pangalanang tao ang nagbigay umano ng pera bilang kabayaran sa pagpatay kay ka-Percy.

Samantala, ibinunyag din ni Pelagio na ilan pang bagong suspek ang tinukoy ng mga imbestigador bilang mga kasabwat.

Umakyat na sa 122 ang patay sa Bagyong Paeng.

Pinaka-marami ang naitala sa Bangsamoro Autonomous Region in Muslim Mindanao na 61.

Ayon sa National Disaster Risk Reduction and Management Council (NDRRMC), 103 katao ang nasugatan habang 36 ang nawawala.

Umabot naman sa mahigit 3.3 milyong indibidwal ang naapektuhan ng kalamidad sa tinatayang 7,000 barangay.

Kabilang na rito ang halos 177,000 kataong nasa evacuation centers.

Umabot na sa P110,852,943.98 ang halaga ng assistance ang naipamahagi ng Department of Social Welfare and Development (DSWD), LGU’s, NGO’s at iba pang partners nito sa mga naapektuhan ng Bagyong Paeng.

Sa datos mula sa DSWD Disaster Response Operations Monitoring and Information Center, nasa 1,037,915 pamilya ang naapektuhan ng bagyo sa 8,242 barangays.

Mula ito sa Regions I, II, III, CALABARZON, MIMAROPA, National Capital Region, V hanggang XII, CARAGA at BARMM.

Nananatili sa 1,595 evacuation centers ang 49,815 pamilya o katumbas ng 195,163 indibidwal habang 140,255 families naman ang nanunuluyan sa ibang mga lugar.

Nasira ng Bagyong Paeng ang ilang mga kabahayan sa nasabing mga lugar kung saan, 1,928 ang totally damaged habang 11,768 ang partially damaged.

Dapat pag-aralan ng mabuti ng National Disaster Risk Reduction and Management Council (NDRRMC) ang pagdedeklara ng State of Calamity sa buong bansa.

Sinabi ni House Deputy Majority Leader at Iloilo Representative Janette Garin na mayroong advantages at disadvantages ang pagsasailalim ng bansa sa National State of Calamity bunsod ng Bagyong Paeng.

Ayon kay Garin, isa sa malaking tulong nito ay pagpapatupad ng automatic price freeze sa basic goods at maaaring magkaroon ng reprogramming sa pondo para sa pagpapaayos ng mga nasirang imprastraktura

Magagamit din aniya ang Quick Response Funds, ang NDRRMC Funds at President’s Contingent Fund upang mapabilis ang pagbangon ng mga nasalantala ng bagyo.

Babala naman ni Garin, kung ideklara ang national calamity sa buong bansa ay maaaring maabuso ang paggamit ng pondo maging sa mga lugar na hindi lubos na tinamaan ng Bagyong Paeng.

Halos anim na araw nang stranded ang mga pasahero patungo sa Bacolod at Zamboanga sa Manila North Harbor Terminal.

Ito’y matapos makansela ang kanilang mga biyahe dahil sa sama ng panahon dulot ng bagyong Paeng.

Habang ang ilan naman sa mga na-stranded ay nakasakay sa special trip matapos magdagdag ng 1,300 hanggang 2,200 pesos sa kanilang pamasahe.

Samantala ang mga naiwan naman na walang pandagdag sa pamasahe ay maaaring maghintay hanggang sa Biyernes, November 4.

Isang technical working group na ang binuo para tutukan ang isyu ng deployment cap sa Filipino nurses na ipapadala sa ibang bansa.

Sinabi ni Department of Migrant Workers secretary Susan Ople na hindi dapat tanggalin at sa halip ay luwagan pa ang pagpapadala ng Pinoy nurses sa ibayong dagat.

Tiniyak ni Ople na kumikilos na ang gobyerno upang matugunan ang mataas na demand ng health care workers sa ibang bansa.

Kabilang dito aniya ang posibleng pagbibigay ng Scholarship Fund ng DOH na suportado ng ibang bansa na kumukuha ng Pinoy Nurses.