HOT STORIES OF THE WEEK

Nakapagtala ang National Electrification Administration (NEA) ng mahigit 109 million pesos na halaga ng pinsala sa electric cooperatives matapos ang pananalasa ng bagyong Paeng.

Sa assessment ng NEA Disaster Risk Reduction and Management Department, naapektuhan ng bagyo ang 25 electric cooperatives sa bansa.

Pinaka-napuruhan ng kalamidad ang Oriental Mindoro Electric Cooperative (ORMECO) na nakapagtala ng 57 million pesos na halaga ng pinsala.

Samantala, nasa ilalim pa rin ng partial power interruption ang 13 electric cooperatives.

Ilang foreign ambassadors ang nag-courtesy visit sa tanggapan ni Vice President at Education Secretary Sara Duterte kahapon.

Kabilang sa bumisita kay VP Sara si Bangladeshi ambassador F.M. Borhan Uddin na nagbigay ng update kaugnay sa developments ng kanilang ekonomiya, trade at investment gayundin ang sektor ng edukasyon.

Tinalakay naman ng Pangalawang Pangulo at ni Egyptian ambassador Ahmed Shehabeldin ang basic education development plan 2030.

Ipinabatid naman ni Israeli ambassador Ilan Fluss kay VP Sara ang mga inisyatibo ng kanilang gobyerno sa iba’t ibang sektor, kabilang ang agrikultura, water management, technology at innovation.

Naging panauhin din ng Bise Presidente si Australian ambassador Hae Kyong Yu, PSM na nagpahiwatig ng interes sa pakikipagtulungan sa Pilipinas sa larangan kung saan kapwa makatutulong sa dalawang bansa.

Ikinokonsidera pa rin ng National Bureau of Investigation (NBI) na mayroong mas makapangayarihang mastermind sa pagpatay sa brodkaster na si Percy Lapid, maliban sa nasuspindeng hepe ng Bureau of Correction na si Gerald Bantag.

Ayon kay Atty. Eugene Javier, supervising agent ng NBI, hindi nila isinasantabi ang palagay lalo’t malaking kaso ang pagpatay.

Idinagdag naman ni Javier na may natatanggap pa silang impormasyon kaugnay sa iba pang mastermind pero hindi pa ito maaaring isapubliko hangga’t hindi pa beripikado.

Kahapon opisyal nang sinampahan ng kasong murder si Bantag ng Philipine National Police at NBI, maging ang Persons Deprived of Liberty na sangkot sa pagpatay kay Mabasa.

Kinabibilangan ang mga ito Nina Mario Alvarez, Joseph Georfo, Christam Ramac, Ricky Salgado, Ronnie Dela Cruz, at Joel Reyes.

Lumarga na kaninang alas-8 ng umaga ang tatlong aktibidad ni Pangulong Ferdinand “Bongbong” Marcos Jr.

Nagsimula ito nang magsagawa ng aerial inspection ang Pangulo sa mga lugar na hinagupit ng bagyong Paeng.

Matapos nito, namahagi ng tulong ang pamahalaan kung saan nasa 1,200 na benepisyaryo ang nakatanggap ng hygiene kits, food packs, at cash assistance mula sa DWSD na pinangunahan mismo ni Pangulong Marcos sa San Jose, Antique.

Pagkagaling ng Antique, tutungo ang Pangulo sa Leyte para pangunahan ang ika-siyam na paggunita ng typhoon Yolanda na gagawin sa Holy Cross Memorial Gardens, Tacloban City na susundan ng pamamahagi ng tulong sa Academic Center Gymnasium, Palo, Leyte.

Mula Antique at Leyte ay agad na tatahakin ng Pangulo ang Region 3 partikular ang Floridablanca, lalawigan ng Pampanga.

Sa nasabing lugar mangunguna ang Pangulo sa pagtanggap, turnover, at pagbabasbas ng ground based air defense system at ng C-295 medium lift aircraft.

Bumaba sa 2.50M nitong Setyembre ang bilang ng mga Pilipinong walang trabaho sa bansa.

Ayon sa Philippine Statistics Authority (PSA), mas mababa ang datos kumpara sa 2.68 milyong Pilipinong walang trabaho noong Agosto.

Katumbas din ito ng 5% na national unemployment rate sa bansa.

Tinitignang dahilan ng pagbaba ng bilang ng mga Pilipinong walang trabaho ay ang pagluluwag ng COVID-19 restrictions at pagbabalik ng full implementation ng face-to-face classes.

Lumago ng 44% ang inangkat na bigas ng Pilipinas nitong Oktubre.

Sa huling datos ng Bureau of Plant Industry, katumbas ang tala ng 3.234 million metric tons, na 3.2 milyong mas mataas kumpara sa 2.242 MMT na naitala sa kaparehong buwan noong nakaraang taon.

Nahigitan naman ng bagong datos ang record-high na 3.122 MMT na naitala noong 2019.

Ang Pilipinas ang ikalawang bansa sa buong mundo na kumokonsumo ng bigas sumunod sa China.

Nakapagtala ang Department of Health (DOH) ng 1,553 na bagong kaso ng COVID-19 virus sa bansa, kahapon.

Sinabi ng kagawaran na mula October 31 hanggang November 6, aabot sa 6,436 ang bagong kaso.

Nasa 907 ang average na bilang ng bagong kaso kada araw ngayong linggo na mas mababa ng 30% kumpara sa mga kaso noong October 24 hanggang 30.

Aabot naman sa 3,929,981 ang gumaling sa sakit habang 64,291 ang nasawi.

Nananatili ang National Capital Region sa may pinakamaraming kaso sa nakalipas na dalawang linggo na may 3,106, sinundan naman ng Calabarzon na may 1,942, Region 6 na may 1,352 at Region 9 na may 906. —mula sa panulat ni Jenn Patrolla

Nakatakda nang lagdaan ni Pangulong Ferdinand “Bongbong” Marcos Jr. ang Executive Order na magpapatupad sa section 24 ng Republic Act No. 11201.

Ito ang magbibigay-daan sa mga ahensya ng pamahalaan na tukuyin at gamitin ang idle government lands o mga nakatenggang lupain para sa mga proyektong pabahay.

Makikipagpulong naman ang Pangulo sa mga leader ng banking at financial institutions upang tulungan ang Department of Human Settlements and Urban Development (DHSUD) na maisakatuparan ang layunin nitong magtayo ng 1 million housing units.

Target ng DHSUD na makapagpatayo ng isang milyong bahay kada taon o hanggang sa matapos ang termino ni PBBM sa 2028.

Inatasan na rin ng Punong Ehekutibo ang DHSUD, Departments of Agrarian Reform, Agriculture at iba pang ahensya na tukuyin ang mga lupain ng pamahalaan na maaaring isama sa programa.—mula sa panulat ni Jenn Patrolla

Mina-madali na ng Department of Health ang pagbabakuna sa mahigit 100K sanggol na hindi pa nakatatanggap ng bakuna laban sa mga sakit, tulad ng Polio at Tigdas.

Kaugnay nito, inilunsad kahapon ng DOH-Metro Manila Center for Health Development ang Vax-Baby-Vax Routine Catch-up Immunization Campaign sa Lakeshore Hall, sa Taguig City.

Layunin nitong makahabol sa pagbabakuna sa mga sanggol makaraang matengga ang immunization bunsod ng iba’t ibang dahilan, gaya ng kakulangan sa suplay ng bakuna at mga restriksyon dulot ng COVID-19.

Sa datos ng DOH, nasa 137K sanggol na edad hanggang 23 buwang gulang ang hindi pa nababakunahan laban sa mga tinatawag na vaccine-preventable diseases, tulad ng polio, tigdas, beke, rubella, diphtheria at Hepatitis B.

Aabot sa 29 na mapanganib na paputok ang tinukoy sa isinagawang dayalogo ng PNP sa fireworks manufacturer sa camp Alejo Santos, Malolos City, Bulacan.

Kabilang pa rin sa mga ipinagbabawal ang watusi, piccolo, five star, pla-pla at goodbye bading.

Ayon kay Bulacan provincial police director, Col. Relly Arnedo, posibleng makalason, makapinsala at makapatay ang mga nabanggit na paputok.

Magsasagawa anya sila ng inspeksyon sa mga pagawaan ng paputok upang mahuli ang mga ilegal at paiigtingin din ang pag-i-issue ng permit.

Nanawagan naman si Arnedo sa publiko na i-report sa kanila ang mga ilegal na pagawaan ng paputok upang mahinto ang operasyon ng mga ito. —mula sa panulat ni Jenn Patrolla