HOT STORIES OF THE WEEK

Nilinaw ng Southern Police District na hindi pa maituturing na “case closed” ang ginawang pagpatay sa batikang radio brodkaster-commentator na si Percival Mabasa o mas kilala bilang si Percy Lapid.

Ito’y matapos sampahan ng kaso ng Philippine National Police (PNP) at National Bureau of Investigation (NBI) ang ilang Persons Deprived of Liberty (PDLs) na itinuturong sangkot sa pagpatay kay ka-Percy at sa pagkasawi ng ‘middleman’ na si Jun Villamor.

Kasama rin sa sinampahan sina Bureau of Corrections (BuCor) deputy security officer Ricardo Zulueta at suspended BuCor chief Gerald Bantag.

Ayon kay Southern Police District Dir. Brig. Gen. Kirby John Kraft, nagpapatuloy pa rin ang isinasagawang imbestigasyon ng kanilang mga tauhan hinggil sa naturang usapin.

Posibleng magtaas ang pamasahe sa MRT-3 ilang taon mula ngayon kung isasa-pribado ang operasyon nito.

Ayon sa Department of Transportation, layunin ng planong privatization ng operations at maintenance na  isaayos ang serbisyo ng MRT-3.

Inihayag ni DOTr Undersecretary Cesar Chavez na kabilang ito sa tinitingnan nilang opsyon bunsod nang napipintong pagtatapos ng build-lease-transfer contract ng MRT-3 sa taong 2025.

Gayunman, gobyerno pa rin naman anya ang magmamay-ari ng nasabing rail transit system at daraan pa sa konsultasyon bago maisakatuparan ang planong privatization.

Batay sa datos ng dotr, mas malaki ang ginagastos ng gobyerno kaysa kinikita nito sa pagpapatakbo ng MRT-3.

Aabot sa P9-B ang operational at maintenance costs kada taon ng MRT-3 sa nakalipas na 22 taon o simula pa noong taong 2000.

Pero nasa P1.7-B lamang ang annual revenue mula sa fare collection o 19% lamang ng annual expenses kaya’t lumalabas na nalulugi ang pamahalaan sa pag-o-operate ng MRT-3.

Maaari nang makabiyahe muli nang walang pangamba na huhulihin ng Land Transportation Office ang mga driver ng mga lumang Public Utility Jeep sa Bacolod City matapos magtigil-operasyon, kamakailan.

Tiniyak ito ni Vice Mayor El Cid Familiaran matapos tugunan ng LTO-Western Visayas ang hiling ni Bacolod Mayor Alfred Benitez na payagang pumasada sa loob ng 15 araw ang mga jeep kahit walang prangkisa o walang kumpletong mga dokumento.

Ayon kay Familiaran, papayagang makabiyahe muli ang mga jeepney driver basta’t magpapa-miyembro sila sa mga transport cooperative alinsunod sa National Program o PUJ Modernization.

Pinangunahan ng bise Alkalde ang dayalogo sa PUJ driver kasama sina City Administrator, Atty. Pacifico Maghari III; Secretary to the Mayor, Atty. Joseph Karol Chui at LTO-Bacolod head Renato Novero.

Nito lamang Lunes nang magpasya ang mga tsuper na magtigil-pasada dahil sa inilargang operasyon ng LTO at Land Transportation and Franchising Regulatory Board laban sa mga luma at kakarag-karag na jeep.

Nilinaw ng Southern Police District (SPD) na hindi kabilang si dating Pangulong Rodrigo Duterte sa 160 Persons of Interest (POI) sa pagpatay sa brodkaster na si Percival Mabasa o Percy Lapid.

Sa kabila ito ng pagtataka ng kapatid ni ka Percy na si Roy Mabasa, kung nasilip ng PNP ang paglitaw ng pangalan ni Duterte sa mga pinuna o tinalakay ng kanyang kuya sa dami ng episode ng programa nito.

Ayon kay SPD Director, Brig. Gen. John Kirby Kraft, batay sa imbestigasyon wala ang pangalan ni dating Pangulong Duterte sa mga nabanggit o binanatan ni Lapid.

Kinatigan naman ito ni Justice secretary Jesus Crispin Remulla at binigyang-diin na imposible at maituturing na political issue kung mapabilang ang dating Pangulo sa mga POI.

Nito lamang Lunes ay naghain ng kasong Murder ang PNP at NBI  laban kina suspended Bureau of Corrections director general Gerald Bantag at iba pa umano nitong kasabwat sa pagpatay umano kay Lapid.

Kumpyansa ang Department of Tourism (DOT) na patuloy na mangunguna ang Pilipinas sa mga nais puntahan ng mga dayuhang turista sa kabila ng mga hamon ng kalamidad na kinahaharap ng bansa.
Sa pagdalo sa World Travel Market (WTM) 2022 sa London, sinabi ni tourism secretary Christina Frasco na napakarami ang maaring maipagmalaki ng ating bansa.
Aniya, sa Pilipinas lamang makikita ang tatlo sa nangungunang 25 isla sa mundo, tulad ng Cebu, Palawan at Siargao.
Bukod dito, nariyan din ang Boracay na nakasama sa 50th places of the year ng TIME magazine.
Ipinagmalaki rin ni Frasco na napili ang bansa bilang Asia’S leading dive at beach destination at Asia’s leading tourist attraction.
Nabatid na ang pagdalo ng bansa sa naturang travel market ay upang hikayatin ang mga malalaking sektor na bisitahin ang Pilipinas.

Lumobo pa sa 3.41 billion pesos ang pinsalang idinulot ng bagyong Paeng sa sektor ng agrikultura ng Pilipinas.

Batay sa huling datos ng Department of Agriculture ngayong araw, sakop nito ang mga pinsala sa Cordillera Administrative Region, Cagayan Valley, Central Luzon, CALABARZON, MIMAROPA, Bicol, Western Visayas, Central Visayas, Eastern Visayas, Zamboanga Peninsula, Central Mindanao, at SOCCSKSARGEN.

Umabot naman sa 89,142 magsasaka at mangingisda ang naapektuhan ng bagyo.

Ang mga apektadong pagkain ng bagyo ay ang mga high-value crops tulad ng prutas at gulay, palaisdaan, manukan, babuyan at mga kagamitan sa pagsasaka at pangingisda.

Masama pa rin ang loob hanggang ngayong araw ni Pangulong Ferdinand Bongbong Marcos sa nangyaring trahedya dala ng nagdaang super typhoon Yolanda nuong 2013.

Sa isang panayam sa pangulo, emosyonal na kinuwestyon muli ni Pangulong Marcos kung bakit ipinatigil nuon ang pagbibilang ng mga nasawi sa lalawigan.

Hindi pa rin kumbinsido si Pangulong Marcos na hanggang 6,000 lamang ang bilang ng mga nasawi nuon sa trahedya.

Sinabi pa ng pangulo na higit pa rito ang namatay at hanggang ngayon hindi pa rin alam kung ilan lahat at kung sinu-sino ang mga ito.

Marami pa rin aniyang pamilya ang hindi pa nakakarekober sa pagkawala ng kanilang mga mahal sa buhay dahil ipinatigil ang paghahanap sa mga ito.

Humingi na ng tulong kay Pangulong Ferdinand Bongbong Marcos Junior ang ama ng nasawing middleman sa pagpatay sa brodkaster na si Percy Lapid.

Ayon sa ama ni Cristito Villamor Palaña, mahirap pa rin tanggapin ng kanilang pamilya ang pagkamatay ni Villamor.

Hustisya pa rin ang panawagan ng kanilang pamilya na posibleng mapabilis kung tutulungan umano sila ng pangulo.

Samantala, nanawagan ng tulong-pinansiyal ang ama ni Villamor para makabisita sa burol ng kaniyang anak sa Leyte.

Bukas, November 9 gaganapin ang libing ng naturang middleman.

Ipinag-utos na ni Justice Secretary Jesus Crispin Remulla ang pagproseso sa precautionary hold departure order laban sa mga suspek sa pagpatay sa brodkaster na si Percival Mabasa o Percy Lapid.

Ayon kay Remulla, layon ng kautusan na mapigilan ang paglabas sa bansa ng mga akusado.

Sinabi naman ni Remulla na hindi na kailangang magpalabas ng Immigration Lookout Bulletin dahil opisyal ng gobyerno ang ilang suspek sa kaso.

Kinabibilangan ito ng dating Bureau of Corrections Director na si Gerald Bantag at Senior Superintendent Ricardo Zulueta.

Samantala, nanawagan naman si Remulla kay Bantag at Zulueta na makipagtulungan sa ginagawang preliminary imbestigation ng DOJ kaugnay sa mga isinampang reklamo laban sa kanila. —sa ulat ni Bert Mozo (Patrol 3)

Nagpaabot ng tulong at pakikiramay ang Department of Education (DepEd) sa pamilya ng isang guro na nasawi sa pagkahulog ng isang bus sa Orani, Bataan.

Ayon kay Michael Poa, tagapagsalita ng DepEd, taos-puso silang nakikiramay sa pamilya ng guro, na nagtuturo sa Payatas B. Elementary School at dinala sa Orani District Hospital pero idineklarang dead-on-arrival.

Pinuntahan naman ng DepEd ang ilang gurong nagpapagaling sa ospital sa Bataan at tiniyak ang pagtustos sa gastusin ng mga ito.

Sa ngayon, 26 na guro na ang nakalabas ng ospital habang dinala sa kanilang bahay ang isang nasawing guro.