HOT STORIES OF THE WEEK

Lumagda na ng Memorandum of Agreement kaninang umaga ang Department of Justice at Philippine General Ospital, para sa otopsiya ng katawan ng 120 inmates na hindi pa rin kinukuha sa Eastern Funeral Services sa Muntinlupa.

Ayon kay Justice Secretary Jesus Crispin Remulla, kabilang ang mga katawan sa 176 na labi na nananatili sa punerarya.

Dahil dito, gumagawa ng paraan ang DOJ para mahanap ang pamilya ng mga nasawi at makakuha ng pahintulot para sa gagawing eksaminasyon.

Maliban sa PGH, nakikipag-ugnayan na rin ang DOJ sa UP College of Medicine.

 tiniyak naman ng DOJ official na ilalabas nila ang pangalan ng mga pumanaw na bilanggo, kasama ang dahilan ng kanilang pagkamatay.

Nananatili pa rin sa 162 evacuation centers ang 8,173 pamilya na naapektuhan ng pananalasa ng bagyong Paeng.

Batay sa Disaster Response Operations Monitoring and Information Center ng DSWD, ang mga apektadong pamilya ay mula sa NCR, CAR, I, II, III, CALABARZON, MIMAROPA, Regions V hanggang XII, CARAGA at BARMM.

Napinsala ng bagyo ang ilang mga kabahayan, kung saan 5,503 ang totally damaged habang 51,563 ang partially damaged.

Umabot naman sa P314,159,495.86 ang naipamahaging tulong ng DSWD, LGUs at NGOs at iba pang partners nito sa mga naapektuhan ng kalamidad.

Pinaiimbestigahan ng isang mambabatas sa San Juan PNP ang nangyaring gulo sa NCAA na kinasangkutan ng mga manlalaro ng College of St. Benilde at Jose Rizal University.

Ayon kay Manila Rep. Joel Chua, ang ginawang panununtok at panunulak ng JRU player na John Amores sa mga atleta ng St. Benilde, ay maituturing na police matter.

Ayon kay Chua na Vice-Chairman ng House Committee on Higher and Technical Education, isang public order and safety concern ang insidente dahil ito’y nangyari sa pampublikong lugar.

Sinabi ni Chua na walang regulasyon at governing police intervention sa basketball games kaya dapat na matugunan ito ng gobyerno.

Sa kabila nito, iginiit ng mambabatas na dapat ay inaresto na ng PNP on duty sa venue si Amores o di kaya ay gumamit ang mga ito ng citizen’s arrest para mas naagapan pa ang insidente.

Lumobo pa sa halos siyam na bilyong piso ang pinsalang idinulot ng bagyong Paeng sa sektor ng agrikultura at imprastruktura sa bansa.

Batay sa huling datos ng National Disaster Risk Reduction and Management Council (NDRRMC) ngayong araw, pumalo na sa 4.27 billion pesos ang pinsala sa agrikultura ng bagyo sa Cagayan Valley, Central Luzon, CALABARZON, MIMAROPA, Bicol, Western Visayas, Zamboanga Peninsula, Northern Mindanao, Bangsamoro Autonomous Region in Muslim Mindanao at Cordillera Administrative Region.

Umabot naman sa halos 110,000 magsasaka at mangingisda ang naapektuhan ng bagyo.

Maliban sa agrikultura, lumobo rin sa 4.67 billion pesos ang pinsala sa imprastruktura ng bagyo sa Ilocos Region, Cagayan Valley, Central Luzon, CALABARZON, MIMAROPA, Bicol, Western Visayas, Central Luzon, Northern Mindanao, BARMM at CAR.

Posibleng isailalim sa Witness Protection Program (WPP) ang nasuspindeng director ng Bureau of Corrections na si Gerald Bantag.

Ito ang sinabi ni Roy Mabasa, kapatid ng pinatay na brodkaster na si Percy Lapid kung makikipagtulungan si Bantag para pangalanan ang iba pang sangkot sa kaso.

Patuloy namang hinikayat ni Mabasa si Bantag na sagutin na ang mga katanungang ibinabato dito, magdagdag ng iba pang impormasyon at linisin ang kaniyang pangalan.

Sa ngayon, nahaharap sa kasong murder si Bantag na isinampa ng PNP at NBI kasunod ng pagkamatay ng brodkaster at umano’y middleman sa pagpatay na si Jun Villamor.

Nakatakdang magsagawa bukas ng Joint Inventory sa mga abandonadong balikbayan boxes ang Bureau of Customs kasama ang Association of Bidders.

Sa panayam ng Dwiz, sinabi ni BOC spokesman at Customs Operations chief Arnaldo dela Torre na karamihan sa mga naturang balikbayan boxes ay galing sa Middle East.

Sinabi pa ni dela Torre na maaaring mailagay sa blacklist ang mga kumpanya na nabigong maideliver ang mga nakatenggang balikbayan boxes.

Maaari rin aniyang makipag-ugnayan ang BOC sa mga kinauukulang ahensya ng gobyerno para sa legal na hakbang laban sa mga ito.

Pinaplano na rin aniya ng BOC at Association of Bidders ang maayos na pagpapadala ng balikbayan boxes.

Sumampa pa sa 4.2 billion pesos ang halaga ng pinsalang idinulot ng bagyong Paeng sa sektor ng agrikultura.

Batay sa datos ng National Disaster Risk Reduction and Management Council (NDRRMC) hanggang kaninang alas-6:00 ng umaga, napinsala ng bagyo ang Cagayan Valley, Central Luzon, CALABARZON, MIMAROPA, Bicol Region, Western Visayas, Zamboanga Peninsula, Northern Mindanao, Bangsamoro Region, at Cordillera Administrative Region.

Pumalo naman sa higit 109,000 magsasaka at mangingisda ang naapektuhan ng bagyo.

Ang Cagayan Valley ang pinaka-napinsala ng kalamidad na may 1.2 bilyong pisong halaga; sinundan ng Bicol Region, 924 million; at CALABARZON, higit 726 million.

Umabot na sa 286,473,613.61 pesos ang naipamahaging assistance ng Department of Social Welfare and Development, LGUs, NGOs at iba pang partners nito sa mga biktima ng bagyong Paeng.

Sa ulat mula sa DSWD Disaster Response Operations Monitoring and Information Center, nananatili pa rin sa 168 evacuation centers ang 8,086 habang 131,690 pamilya naman ang nanunuluyan sa ibang mga lugar.

Ang mga apektadong pamilya ay mula sa Regions I, II, III, CAR, CALABARZON, MIMAROP, NCR, Regions V hanggang XII, CARAGA at BARMM.

Nasira ng bagyong Paeng ang ilang mga kabahayan sa nabing mga lugar, kung saan kabilang dito ang 5,341 totally damaged at 48,142 partially damaged houses.

Pinagmumulta ng mahigit P5-M ng Energy Regulatory Commission (ERC), ang National Grid Corporation of the Philippines (NGCP).

Ito’y matapos mabigo ang NGCP na gawin ang naging direktiba ng Department of Energy (DOE) na mangontrata ng reserbang kuryente kung saan, nilabag nito ang Section 7.4 ng Ancillary Services by the System Operator (AS-CSP) policy.

Ayon sa ERC, hindi nakapagsumite ang NGCP ng kanilang Terms of Reference (TOR) at Invitation to Bid (ITB) na isang paglabag sa kautusan ng DOE.

Dahil dito, maaring kanselahin ang kanilang Certificate of Public Convenience and Necessity (CPCN) at ang endorsement ng ERC sa kongreso ng revocation ng kanilang legislative franchise.

Tiniyak ng Philippine National Police (PNP) na aktibong makikipagtulungan ang kanilang ahensya sa Department of Justice (DOJ) hinggil sa kaso ng pagpatay sa hard hitting broadcaster-commentator na si Percival Mabasa o mas kilala bilang Percy Lapid.

Ayon kay PNP chief Pol. Gen. Rodolfo Azurin Jr., kanilang sisikapin na maibigay ang hustisya sa pamilyang naiwan ni ka-Percy.

Iginiit ni Azurin na hindi titigil ang PNP na makulong ang nasa likod sa pagpatay kay Percy Lapid at ang mga sangkot sa pagkamatay ng middleman na si Jun Villamor.

Sinabi ng opisyal na kanilang sisikapin at hahabulin ang mga sangkot sa krimen hanggang sa mapanagot ang mga ito sa ilalim ng batas.