HOT STORIES OF THE WEEK

Binigyang-diin ng National Economic and Development Authority (NEDA) ang kahalagahan ng mga biyahe ni Pangulong Ferdinand “Bongbong” Marcos Jr. sa ibang bansa.
Sa Laging Handa Briefing, sinabi ni NEDA Usec. Rose Marie Edillon na malaki ang maitutulong nito sa paglakas pa ng ekonomiya ng Pilipinas.
Ayon kay Edillon, ito ang kailangan para maparami pa ang economic activity sa ating bansa.
Samantala, kinumpirma ng Office of the Press Secretary na bibisita si Pangulong Marcos sa China sa pagpasok ng susunod na taon.
Ayon kay OPS OIC Usec. Cheloy Garafil, tinanggap na ng Presidente ang imbitasyon ni Chinese President Xi Jinping at ng gobyerno ng China.
Nabatid na isang state visit ang gagawin ng Punong Ehekutibo sa China sa January 3 hanggang January 6, 2023.
Sa ngayon, ayon sa OPS, hinihintay pa ng Malakanyang ang pagkumpirma ng Chinese government sa nasabing aktibidad.

Kinumpirma ng Office of the Press Secretary na isasagawa ng apat na araw ang state visit ni Pangulong Ferdinand “Bongbong” Marcos Jr. sa China.

Itoy matapos tanggapin ng Punong Ehekutibo ang imbitasyon ni Chinese President Xi Jinping at ng Peoples Republic of China na magsagawa ng state visit sa nasabing bansa.

Samantala, nakatakda namang gawin ang state visit ng mula January 3 hanggang January 4 sa susunod na taon.

Hinimok ng isang pari ang mga deboto ng Itim na Nazareno na dumalo pa rin sa siyam na araw ng novena masses sa Quiapo church sa Maynila.

Sa kabila ito ng muling kanselasyon ng inaantabayanang traslasyon na magaganap dapat sa January 9 nang taong 2023.

Sa panayam ng DWIZ kay Father Earl Allyson Valdez, attached priest ng Quiapo church, inanyayahan nito ang mga deboto na hindi lang sa Enero 9 magtungo sa Quiapo, kundi maging sa Disyembre 31 hanggang Enero 8 na petsa ng novena.

Ito ay para makaiwas sa inaasahang dagsa ng mga tao lalo’t posible pa rin ang hawaan dahil sa COVID-19 pandemic.

Kung nais po nilang bisitahin ang simbahan ng Quiapo, magdasal doon, makiisa sa pagdiriwang ng kapistahan ay maaring-maari pa rin kayong tumungo. Alam naman natin ang debosyon naman po natin ay hindi lamang sa prusisyon…maraming pamamaraan upang magbigay-pugay sa ating mahal na poong Jesus Nazareno…nariyan naman po ang pagbibigay-pugay makapipila pa rin po tayo dito sa simbahan at sa Quirino  Grandstand sa Luneta.

Ang pahayag ni Father Earl Allyson Valdez, attached priest ng Quiapo church sa panayam ng DWIZ

Nagpapatuloy ang pagbaba ng mga kaso ng COVID-19 sa bansa.

Ito’y dahil wala na sa higit 2,000 at sa halip ay umaabot na lamang ng 1,000 hanggang 1,500 ang naitatala sa arawang kaso sa buong bansa.

Sinabi ni Dr. Rontgene Solante na isa sa pinakamalaking factor ay ang population immunity kung saan tuloy-tuloy ang pagtanggap ng mga bakuna ng publiko.

Maliban dito, tuloy rin aniya ang pagbaba ng hospital utilization rate at ICU rate sa mga ospital.

Umaasa naman si Solante na wala nang bagong subvariants ng Omicron ang makapapasok sa bansa hanggang sa susunod na buwan.

Walang nagdedeklarang lugar sa bansa na tinamaan ng African Swine Fever (ASF) ang kanilang mga alagang baboy.

Sinabi sa DWIZ ni Congressman Nick Briones, Vice President ng Pork Producers Federation of the Philippines kung saan walang ayudang ipinamamahagi kaya’t posibleng mas bumilis pa ang pagkalat ng ASF sa mga lugar na dinapuan ng nasabing sakit.

Ipinabatid pa ni Briones na sablay ang pagkontrol sa pagkalat ng ASF sa mga lugar.

2019 nang pasukin tayo…eh ano na ngayon? Mahigit nang 3 years. D ‘yan mo makikita na sablay ‘yung pagkontrol ng pagkalat…lalabas ‘pag natamaan pa ang Cebu ay lahat na lang.

Samantala, kahit aniya nag-anunsiyo ang Cebu ng pork ban ay may sapat pa rin itong suplay ng baboy sa kanilang lugar.

Ang Cebu ay sila’y may sapat na suplay…ang siguradong bawal diyan ‘yung mga meat products at saka ‘yung mga animals na galing sa mga ASF outbreak…’yung mga nasa red zone. Ang Iloilo ngayong puwede na lang silang magdala ng baboy o karneng baboy dito sa Luzon ‘yung mga red zone areas sa Metro Manila.

Ang pahayag ni Congressman Nick Briones, Pork Producers Federation of the Philippines sa panayam ng DWIZ

Nagsalita na sa kauna-unahang pagkakataon ang nasuspindeng hepe ng Bureau of Corrections na si Gerald Bantag.

Kaugnay ito sa pagkakasangkot niya sa pagpatay sa broadkaster na si Percival Mabasa o Percy Lapid.

Partikular na binanatan ni Bantag si Justice Secretary Jesus Crispin Remulla dahil sa pagsasangkot nito sa dating BuCor official sa pagpatay.

Ayon kay Bantag, imbes na siya ay pag-initan, mas mabuting bumaba na lang si Remulla sa pwesto dahil wala umano itong kredibilidad na mamuno.

Inakusahan pa ni Bantag si Remulla sa plano nito sa politika sa 2025 at ginagamit lamang ang Department of Justice para sa exposure.

Sa ngayon, wala pang sagot si Remulla at tagapagsalita ng DOJ na si Atty. Mico Clavano sa akusasyong ito ni Bantag.

Inihayag ng isang infectious disease specialist na angkop gamitin bilang ikatlong booster shot laban sa COVID-19 ang Bivalent COVID-19 vaccines.

Ito ang sinabi ni Dr. Jaime Montoya, Executive Director ng Philippine Council for Health Research and Development matapos matukoy na epektibo ito laban sa iba pang variant ng virus.

Ayon kay Montoya, magbibigay ng dagdag na proteksyon ang Bivalent Vaccines laban sa Omicron sub-variants na kumakalat ngayon sa bansa gaya ng XBB at XBC variants.

Ikinatuwa naman ng opisyal na nasa proseso na ng pagbili ng   Bivalent vaccines ang Department of Health na magiging available na sa mga Pilipino, kung mabibigyan ng emergency use authorization ng Food and Drug Administration.

Tanging ang mga edad 50 pataas at may comorbidities na edad 18 hanggang 49 na may commorbidities, ang kwalipikado para sa ikalawang booster shot.

Nailibing na ang sampu sa 176 na katawan ng Persons Deprived of Liberties (PDLs) na nasa isang punerarya sa Muntinlupa City.

Ayon kay Gregorio Catapang Junior, Officer-In-Charge ng Bureau of Correction (BuCor), naipon ang mga katawan ng PDL sa Eastern Funeral Homes para imbestigahan kasunod ng pagkamatay ni Cristito “Jun Villamor” Palaña, umano’y middleman sa pagpatay sa brodkaster na si Percy Lapid.

Bagaman batid ng mga pamilya ng PDL ang kanilang pagkamatay, nagpasya ang mga itong hindi na kuhanin ang mga labi.

Matatandaang una rito, sinabi ni Secretary Jesus Crispin Remulla na nakipag-ugnayan na sila sa Philippine General Hospital para sa otopsiya ng mga labi.

Tiniyak pa ni Guevarra ang paglalabas ng pangalan ng mga ito at dahilan ng kanilang pagkamatay.

Posible nang makita sa susunod na apat na buwan ang pagbabago sa pamamahala sa Bureau of Corrections (BuCor).

Sa ginanap na sesyon sa plenaryo ng senado para sa 2023 budget ng Department of Justice at mga ahensiyang nakasailalim dito, natanong ni Senator Raffy Tulfo kung kailan titigil ang korupsiyon sa BuCor.

Sinabi ito ni Tulfo kasunod ng kontrobersiya kung saan nanggaling umano sa New Bilibid Prison ang utos na patayin ang brodkaster na si Percy Lapid.

Sagot dito ni Senator Sonny Angara, maaari ang plano sa loob ng dalawa hanggang apat na buwan kung magkakaroon ng sistematikong pagbabago.

Si General Gregorio Pio Punzalan Catapang Junior ang itinalagang Officer-In-Charge sa BuCor habang wala pang kapalit si General Gerald Bantag.

Ikinalungkot ng Philippine Sports Commission (PSC) ang gulong naganap sa laban ng Jose Rizal University (JRU) at College of St. Benilde noong Martes.

Ito ay matapos magwala at manuntok ang basketball player ng JRU na si John Amores dahilan para suspendihin ito pang habang-buhay.

Sa panayam ng DWIZ kay Noli Eala, Chairman ng PSC, sinabi nito na walang lugar ang violence sa sports.

Kinuwestiyon naman ni Eala ang paulit-ulit na karahasang ipinakita ni Amores sa laro, na hindi magandang ehemplo sa mga kabataan.