HOT STORIES OF THE WEEK

Ipa-re-rehistro ng Department of Social Welfare and Development sa Philippine Statistics Authority (PSA) ang milyong indigenous people sa bansa.

Ayon kay DSWD undersecretary Edu Punay, isang malaking hamon para sa mga katutubo ang kawalan ng sariling identification o birth certificate.

Hindi rin anya sila nakakukuha ng mga benepisyo at serbisyo mula sa gobyerno dahil wala silang hawak na dokumento tulad ng birth certificate.

Gayunman, inaasahan ng kagawaran na madaragdagan ang populasyon ng milyong katutubo sakaling mairehistro sa PSA.—mula sa panulat ni Jenn Patrolla

Ibinabala ng Department of Health (DOH) na malaki ang banta ng pagkakaroon ng diabetes ng mga dinapuan ng COVID-19 virus.

Ayon kay DOH Officer-In-Charge Maria Rosario Vergeire, may kaugnayan ang diabetes at COVID-19 batay sa mga pag-aaral.

40% aniya ang tyansa na tamaan din ng diabetes ang mga taong nagkaroon ng COVID-19.

Iginiit ni Vergeire na ang pagbabakuna ang pinakamahusay na proteksyon laban sa COVID-19 at diabates kasunod ng pagsusuot ng face mask.

Pinayuhan naman ng kagawaran ang publiko na alamin kung may history ang kanilang pamilya ng diabetes upang maging handa sa sakit.—mula sa panulat ni Jenn Patrolla

Ipatutupad bukas ng Gardenia Bakeries Philippines Incorporated ang tatlong pisong taas-presyo sa kanilang tinapay maliban na lamang sa Pinoy Tasty at Pinoy Pan de sal.

Sa anunsiyo ng naturang kumpaniya, dadagdagan ng P3.00 ang kada 600 grams ng tasty na classic white bread loaf kung saan, mula sa dating P79, magiging P82 na ito.

Dalawang piso naman ang magiging dagdag sa presyo ng kada 400 grams nito na nagkakahalaga na ng P57.00 mula sa dating P55.00.

P52.00 naman sa ngayon ang dating P49.50 na presyo ng mas murang brand ng Gardenia na Neubake matapos madagdagan ng P2.50 sa kada 450 grams.

Magiging P55.00 naman mula sa dating P53.00 ang premium pandesal habang P53 mula sa dating P50.00 ang presyo ng soft delight pandesal family pack.

Ayon sa Gardenia Company, noon pang Hulyo huling nagmahal ang presyo ng kanilang produkto kaya panahon na para magdagdag sila ng presyo dahil nagmahal ang maraming sangkap sa paggawa ng tinapay kabilang na ang trigo na ginagawang harina; asukal at asin.

Sa ngayon, hindi muna itataas ng nasabing kumpaniya ang presyo ng Pinoy Tasty at Pinoy Pan de sal dahil kabilang ito sa basic necessities and prime commodities ng Department of Trade and Industry (DTI) na kinakailangan ng Suggested Retail Price (SRP) at dapat na may basbas ng DTI bago taasan ng presyo nito.

Kasado na bukas ang muling dagdag-bawas sa presyo ng produktong petrolyo sa bansa.

Ayon sa ilang kumpaniya ng langis, maglalaro sa 75 centavos hanggang Piso ang magiging dagdag-singil sa presyo ng kada litro ng gasolina.

Nasa P1.30 centavos hanggang P1.50 centavos naman ang magiging dagdag-presyo sa kada litro ng kerosene.

Samantala, aabot naman sa 25 centavos hanggang 50 centavos ang magiging bawas sa presyo ng kada litro ng diesel.

Nabatid na ito na ang pangalawang sunod na linggo na magkakaroon ng pagtaas sa presyo ng kerosene at gasolina kung saan, posible pa itong magpatuloy hanggang sa buwan ng Disyembre.

Ayon kay Atty. Rino Abad, Director ng Oil Industry Management Bureau ng Department of Energy, ang paggalaw sa presyo ng langis ay bunsod pa rin ng patuloy na bakbakan sa pagitan ng Russia at Ukraine, bantang pagbabawas ng produksiyon ng langis ng mga miyembro ng Oil Producing Exporting Countries (OPEC), at ang pagtaas sa presyo ng mga pangunahing bilihin at serbisyo sa bansa.

Inihirit ng ilang manggagawa ang kanilang pagnanais bumalik sa Work-From-Home o Hybrid Set-up upang makatipid sa harap ng nagtataasang presyo ng bilihin at serbisyo.

Kabilang sa nananawagan ang mga nasa Business Process Outsourcing (BPO) na idinadahilan ang lumalaki nilang gastos sa pasahe kada araw.

Aminado si BPO Industry Employees Network spokesperson Mylene Caballona na halos lahat ng kanilang kasamahan ay nagresign upang maghanap ng mga permanenteng Work-From-Home set-up.

Dapat anyang magkaroon ng dayalogo sa pagitan ng mga employer at employee sa issue ng hybrid set-up, lalo para sa mga hindi talaga kinakaya ang magastos na pagko-commute araw-araw.

Samantala, hinimok naman ni Labor secretary Benny Laguesma ang mga employer na gamitin ang batas sa Telecommuting, na isa rin sa solusyon upang mabawasan ang bumibigat muling daloy ng trapiko.

Dapat din anyang magkaroon ng malinaw na kasunduan sa pagitan ng mga employer at empleyado sa nasabing issue upang matiyak na magiging balanse ang interes ng mga negosyo at kapakanan ng mga manggagawa.

Tinalakay na ng mga Regional Director ng Department of Labor and Employment at Regional Tripartite Wages and Productivity Boards (RTWPB) ang hirit na panibagong dagdag-sahod ng mga manggagawa.

Kinumpirma ni Labor secretary Bienvenido Laguesma na kabilang sa ikinukunsidera ng RTWPB ang kapasidad ng mga negosyo na magbigay ng wage increase at consumer price index.

Bukod anya sa umento, maaari ring palawigin ng gobyerno ang subsidiya sa mga minimum wage earner matapos sumipa sa 7.7% ng inflation rate nitong Oktubre.

Tiniyak ni Laguesma na masusing pinag-aaralan ng wage boards ang umiiral na wage rates upang makasabay sa anumang “developments” sa sektor ng paggawa.

Aminado naman ang Kalihim na sinimulan na rin nilang buksan ang naturang issue sa private sector pero kanyang nilinaw na ang minimum wage adjustments ay maaari lamang ipatupad isang beses kada taon.

Hunyo nang ipatupad sa labing-apat na rehiyon, kabilang sa Metro Manila, ang dagdag-sahod ng mga manggagawa.

Ipinanawagan ni Pangulong Ferdinand Marcos Jr. sa mga miyembro ng Association of Southeast Asian Nations (ASEAN) ang maagang pag-apruba sa Code of Conduct (COC) sa South China Sea batay sa pandaigdigang batas.

Sa kanyang talumpati sa ASEAN Summit sa Cambodia, binigyang-diin ng Pangulo na ang COC ay magsisilbing gabay ng mga bansa upang maiwasan ang sigalot sa pinag-aagawang teritoryo.

Mahalaga aniyang mangibabaw ang United Nations Convention on the Law of the Sea (UNCLOS) na siyang nagtatakda ng universal framework sa lahat ng mga aktibidad sa karagatan.

Umarangkada na ang delibersayon sa ilang panukalang batas na layong magtayo ng mga evacuation centers sa bawat bayan at lungsod sa buong bansa sa panahon ng kalamidad.

Napagkasunduan naman sa pagtalakay ng House Sub-Committee on Disaster Preparedness ni Lanao del Sur 1st District Rep. Zia Alonto Adiong na pagsamahin na lamang ang 26 House bills.

Kabilang sa combined measures ang House Bill 16 na inakda nina Speaker Ferdinand Martin Romualdez, Tingog Party-list Representatives Yedda Marie Romualdez at Jude Acidre.

Sa naganap na deliberasyon, binigyang-diin ni Romualdez na dapat nang matigil ang nakasanayan ng lahat kung saan ginagawang default evacuation centers ang mga paaralan.

Hindi aniya ito dapat ginagawa dahil wala namang sapat na kakayahan at pasilidad ang mga eskwelahan para sa mga bakwit.

Lalagda ng Memorandum of Agreement ang Presidential Commission for the Urban Poor (PCUP) sa isang local shipping company upang mabigyan ng maayos na serbisyo ang marginalized at underprivileged sectors sa bansa.

Ayon kay PCUP Chairperson Undersecretary Elpidio Jordan Jr., magaganap ang MOA signing sa pagitan ng PCUP at Archipelago Philippine Ferries Corporation (APFC) sa Disyembre 7 kasabay ng pagdiriwang ng Urban Poor Solidarity Week.

Matatandaang nakipagpulong si Jordan kina APFC general manager Segundo Mentoya Jr., vice president for marketing Christine Guevarra, at iba pang mga opisyal ng kompanya para talakayin ang kanilang pro-poor initiatives.

Sinabi ni Jordan na ang mga poverty alleviation programs ng PCUP ay ipatutupad sa susunod na taon bilang bahagi ng mga hakbang ni Pangulong Ferdinand Marcos Jr. para sa agarang pagbangon ng ekonomiya at pagpapaunlad sa mga mahihirap na komunidad.