Kinumpirma ni Dr. Eric Tayag na itinalaga siya bilang Undersecretary ng Department of Health sa ilalim ng Administrasyong Marcos.
Ayon sa opisyal, nakatakda siyang manumpa sa susunod na linggo.
Gayunman, wala pang inilalabas na impormasyon ang Malacañang kaugnay sa bagong appointment ni Tayag.
Una rito, nagsilbi rin si tayag bilang Assistant Secretary ng DOH at nakilala rin bilang ‘Dancing Asec.’
Sinimulan nang buksan ng Lokal na Pamahalaan ng Marikina ang Christmas Shoe Bazaar na may temang: #PaskongSapatosSaMarikina.
Pinangunahan ni Mayor Marcelino “Marcy” Teodoro ang aktibidad kasama ng iba pang opisyal ng lungsod, at mga miyembro ng Philippine Footwear Federation Inc. (PFFI).
Sa ilalim ng Ordinance no. 191 Series of 2022, ang Christmas Shoe Bazaar ay tatagal hanggang sa January 14, 2023 na magsisimula alas-9 ng umaga hanggang alas-7 ng gabi at matatagpuan sa Marikina Freedom Park malapit sa Marikina City Hall at Legislative Building.
Layunin ng naturang programa na matulungang makabawi ang mga lokal na Sapatero na lubhang naapektuhan ng pandemya.
Plano naman ng Marikina LGUs na gawing Perpetua o habang buhay na libre at walang babayaran sa puwesto ang mga magnenegosyo sa lugar dahil mismong ang lokal na pamahalaan na ang gagastos para rito.
Bukod pa dito, target din na maihatid ang Marikina Shoe Bazaar sa iba pang panig ng bansa upang mai-promote ang affordable at matitibay na sapatos na gawa ng mga Marikenyo.
Hindi titigilan ng Bureau of Internal Revenue (BIR) ang paghahabol sa lahat ng klase ng negosyante, kabilang na ang Online sellers, kaugnay sa pagbabayad ng tamang buwis.
Ayon kay BIR Deputy Commissioner Marissa Cabreros, kabilang sa kanilang kampanya ang pagpapa-rehistro ng mga influencer, vlogger at online sellers sa ahensiya.
Kung hindi anya naka-deklara, hindi rin maaaring hindi masulatan ang mga ito.
Inihayag naman ni Cabreros na nasa 1,000 influencers at vloggers na ang nagparehistro sa BIR
Ipinaliwanag din ng BIR official na iba ang obligasyon ng pagrerehistro sa pagbabayad ng buwis.
Nilinaw ng ahensya na bagaman noong isang taon pa sila nagbigay ng palugit at kahit late mag-register, hindi umano sila nagpapataw ng penalty.
Samantala, ipinaalala ni Cabreros na nakasaad sa Tax Code na kung kelan kumita at may kinita, kailangang nakapagreport at nagbayad ng buwis ang mga dapat magbayad.
Muling tiniyak ng isang grupo na sapat ang lokal na produksyon ng baboy hanggang sa Disyembre.
Sa panayam ng DWIZ, iginiit ni vice president Nick Briones, ng Pork Producers Federation of the Philippines (PPFPI) na nananatili pa rin ang farmgate price ng produkto sa P160 hanggang P180.
Dahil dito, nalulugi aniya ang mga magbababoy bunsod na rin ng mataas na presyo ng mais, soya at iba pa.
Binigyang-diin naman ni Briones na humiling sila ng ayuda sa gobyerno dahil sa epekto ng African Swine Fever (ASF) sa bansa.
Nakatakdang umapela sa Korte Suprema ang Metropolitan Manila Development Authority (MMDA) hinggil sa No Contact Apprehension Policy (NCAP).
Sinabi ni MMDA chairman Romando Artes na hihilingin nila sa Supreme Court na huwag isama ang ahensya sa Temporary Restraining Order (TRO) upang maipatupad nila ang polisiya sa mga kalsadang sakop ng kanilang hurisdiksyon.
Paliwanag niya, mula nang ipatigil ang NCAP, dumami ang mga motoristang lumalabag sa batas trapiko na hindi nila mahuli dahil sa kakulangan ng traffic enforcers.
Noong Agosto nang pansamantalang suspendihin ng Korte Suprema ang pagpapatupad ng naturang polisiya dahil sa pagkwestiyon ng ilang transport group sa validity nito.
Naglabas na ng higit P8.5-B ang Department of Budget and Management (DBM) para sa year-end bonus at cash gift ng mahigit 220,000 pulis.
Ayon kay PNP chief, Gen. Rodolfo Azurin Jr., ang year-end bonus ay katumbas ng one-month base pay habang P5,000 naman ang cash gift.
Nilinaw ni Azurin na ang bonus ay bubuwisan alinsunod sa Tax Reform Acceleration and Inclusion law (TRAIN).
Samantala, sinabi naman ni PNP finance service Director, Brig. Gen. Bowenn Joey Masauding na ibibigay ang bonus bukas, November 15 sa pamamagitan ng Landbank ATM payroll accounts. —mula sa panulat ni Jenn Patrolla
Aaksyunan na ng Land Transportation Office (LTO) ang problema sa mga fixer sa gitna ng ulat na dumarami muli ang mga ito sa Metro Manila.
Inatasan na ni LTO-NCR-West Director Roque Verzosa ang lahat ng district heads ng ahensya na patuloy paalalahanan at turuan ang mga empleyado sa anti-fixing policy sa pamamagitan ng memorandum.
Ito’y bilang bahagi ng pinaigting na anti-fixer campaign ng LTO.
Bukod dito, mag-i-inspeksyon din anya sila sa mga rehiyon bilang bahagi ng mga hakbang laban sa mga fixer. —mula sa panulat ni Jenn Patrolla
Epektibo na ngayong araw ang adjusted mall hours sa Metro Manila upang maibsan ang inaasahang pagsikip ng daloy ng trapiko habang papalapit na ang Christmas season.
Ayon kay MMDA acting chairman, Atty. Romando Artes, mag-o-operate ang mga mall mula alas-11 ng umaga hanggang alas-11 ng gabi.
Hindi naman kabilang sa pinalawig na operating hours ang mga supermarket at restaurant.
Una nang inihayag ng MMDA na inaasahang darami pa ang mga mag-re-revenge shopping 40 days bago mag-Pasko, lalo sa mga mall sa kabahaan ng EDSA na magpapasikip sa daloy ng trapiko. —mula sa panulat ni Jenn Patrolla
Nanawagan si Camarines Sur Rep. Lray Villafuerte sa Kongreso na humanap ng pondo upang maipagpatuloy ang libreng-sakay o service contracting program sa susunod na taon.
Umaasa si Villafuerte na makahahanap ang senado at kamara ng pondo sa oras na magsagawa ng deliberasyon ang bicameral conference committe para sa 2023 National Budget.
Pinuri naman ng kongresista ang Marcos administration sa pagpapatuloy ng libreng-sakay program sa EDSA bus carousel hanggang sa katapusan ng taon.
Nito lamang agosto, humiling ang Department of Transportation ng P12-B upang maipagpatuloy ang libreng-sakay sa taong 2023.
Gayunman, hindi isinama ang budget sa national expenditure program dahil isa itong one-time- expenditure item o hindi na inuulit.—mula sa panulat ni Jenn Patrolla
Inihayag ng Bureau of Corrections (BuCor) at Department of Justice (DOJ) na posibleng dahil umano sa pagmimina ng ginto ang dahilan ng nadiskubreng malaking hukay sa New Bilibid Prison (NBP) dahil na rin sa nakitang metal detector.
Base sa naging imbestigasyon ng BuCor at DOJ, napag-alaman na ang ginagawang pagmimina sa loob mismo ng compound ng NBP ay lagpas isang taon nang ginagawa mula pa noong taong 2021.
Ayon sa BuCor, nakipag-ugnayan na sila sa DENR para ipatigil ang naturang operasyon na mahigit 30 metro na ang lalim o katumbas ng pito hanggang siyam na palapag na gusali.
Sa naging pahayag ng DENR, Illegal Quarrying ang ginawang paghukay kung saan, posibleng makasuhan ang nasa likod nito.
Sa ngayon, pinag-aaralan na ang naturang isyu dahil wala umanong nakitang dokumento o permit na nagpapatunay sa dahilan ng malaking paghukay sa loob ng Bilibid.