HOT STORIES OF THE WEEK

Inihayag ng Department of Social Welfare and Development (DSWD) na umabot na sa 3,000,000 indibidwal ang naapektuhan ng pananalasa ng Bagyong Paeng.

Ayon kay DSWD Assistant Secretary at Spokesperson Romel Lopez, patuloy pang nagsasagawa ng ibat-ibang operasyon ang kanilang ahensya sa mga apektadong lugar partikular na sa National Capital Region (NCR), Cordillera Administrative Region (CAR), Regions 1, 2, 3, CALABARZON, MIMAROPA, Regions 7, 8, 9, at Bangsamoro Autonomous Region in Muslim Mindanao (BARMM).

Sinabi ng opisyal, na nasa 76,000 na pamilya mula sa ibat-ibang lalawigan sa bansa ang lumikas at nananatili parin sa mga evacuation centers.

Iginiit naman ni Lopez, na nasa P69-M na ang kabuuang bilang ng naipamahagi nilang tulong na binubuo ng family food packs at cash assistance mula sa dswd, lgus at ngos.

Sa ngayon nasa P82-M pa ang available na Standby Fund ng mga Regional Offices habang nasa 46,441 na foodpacks naman, ang nakatakdang ipamahagi sa iba pang lugar na apektado ng nagdaang bagyo.

Aabot sa P48.1-M na halaga ng food and non-food items ang naipamahagi na ng Department of Social Welfare and Development (DSWD) sa 75,168 pamilya sa 3,208 evacuation centers sa 17 rehiyon na naapektuhan ng pananalasa ng Bagyong Paeng.

Ayon kay Undersecretary Edu Punay, 560,000 pamilya o katumbas ng may 2.1 milyong indibidwal ang nakatanggap ng ayuda mula sa ahensiya.

Sinabi ni Punay, na bukod sa kanilang ipinamahaging food and non-food items, bibigyan din nila ng tulong ang mga pamilyang nawalan ng kani-kanilang mahal sa buhay sa ilalim ng Assistance to Individuals in Crisis Program ng DSWD.

Sakop din ng naturang programa ang mga sugatan at nawalan ng tirahan.

Samantala, nanawagan naman ang ahensya ng karagdagang volunteers para sa pagsasagawa ng repacking aid at non-financial donations sa mga Paeng affected areas.

Ilan pang bansa ang nagsimula nang magpaabot ng tulong sa Pilipinas matapos ang pananalasa ng Bagyong Paeng.

Kabilang sa mga naunang sumaklolo ang U.S. at China habang nangako rin ng tulong ang Japan at Australia.

Ayon sa U.S. Embassy, nasa 10,000 family food packs ang kanilang ipinadala sa South Cotabato sa pamamagitan ng DSWD.

Nag-donate rin ang Chinese Embassy ng unang batch ng disaster relief materials, na kinabibilangan ng libu-libong distilled bottled water, instant noodles, bigas at kape, sa Datu Odin Sinsuat, Maguindanao Del Norte.

Magkakaloob naman ang Australia ng Life-Saving Family Kits sa mga pinaka-apektadong komunidad sa Bangsamoro Autonomous Region in Muslim Mindanao na ipadadala sa pamamagitan ng Philippine Red Cross.

Kabilang sa mahigit 500 family kits, ang emergency household gaya ng sleeping kits, jerry cans, hygiene kits at tarps para sa mga naapektuhang pamilya sa Maguindanao at Zamboanga.

Samantala, inihayag ng United Nations-Office for the Coordination of Humanitarian Affairs na umabot na sa P51-M ang halaga ng ayudang ipinamahagi ng government at humanitarian partners.

Hinikayat ang mga guro at magulang na pagsuotin pa rin ng face mask sa loob ng mga silid-aralan ang kanilang mga estudyante at anak sa pagsisimula ng face-to-face classes upang mapigilan ang pagkalat ng Covid-19.

Ito’y sa kabila pagtalima ng Department of Education sa Executive Order 17 na nagpapahintulot sa boluntaryong pagsusuot ng face mask sa mga indoor setting, gaya ng silid-aralan.

Ipinunto ni Lito Senieto ng National Parents-Teachers Association of the Philippines na masyadong siksikan ang mga classroom sa bansa at kung walang face mask ay mabilis kakalat ang sakit.

Para naman kay Teachers Dignity Coalition Chairman Benjo Basas, masyado pang maaga na ipatupad ang boluntaryong pagsusuot ng face mask sa mga silid-aralan.

Hindi pa anya nagtatapos ang pandemya kaya’t kung siya ang tatanungin kanyang pa ring pagsusuotin ng face mask ang mga mag-aaral kahit sa face-to-face classes.

Simula ngayong araw ang full implementation ng face-to-face classes sa buong bansa maliban sa mga lugar na nagdeklara ng class suspension matapos lubhang maapektuhan ng Bagyong Paeng.

Sumampa na sa 160 lungsod, bayan at lalawigan ang isinailalim sa State of Calamity matapos ang pananalasa ng Bagyong Paeng.

Batay ito sa datos ng National Disaster Risk Reduction and Management Council hanggang kahapon.

Kabilang sa pinaka-bagong nadagdag ang mga lungsod ng Muntinlupa sa Metro Manila at Biñan sa Laguna.

Nasa State of Calamity rin ang mga bayan ng Amulung, Cagayan; Lalawigan ng Quezon at San Juan, batangas; San Pablo at San Pedro Cities sa laguna;

Albay, Catanduanes, Aklan, Capiz, Tibiao sa Antique; Calbayog City, Samar; Sirawai, Zamboanga del Norte; Zamboanga City, Zamboanga del Sur; Pigcawayan, Cotabato at buong Bangsamoro Autonomous Region in Muslim Mindanao.

Isinailalim na rin State of Calamity ang Muntinlupa City matapos ang pinsalang idinulot ng Bagyong Paeng.

Alinsunod ito sa resolusyong ipinasa ng Sangguniang Panglungsod na inendorso ni Mayor Ruffy Biazon sa Local Disaster Risk Reduction and Management Council na nagrekomenda ng deklarasyon.

Sa naturang resolusyon, binigyang-kapangyarihan ang Alkalde na gamitin ang 30% ng quick response fund ng Local Disaster Risk Reduction and Management para sa relief operations at rehabilitation ng mga apektadong lugar.

Simula October 29 hanggang 30, nakaapekto sa lungsod ang bagyo na nagdulot ng malakas na ulan, hangin at pagbaha kaya’t nagsuspinde ng klase, ipinatigil ang negosyo at naputol ang power supply.

Batay sa Initial Assessment ng Muntinlupa City Department of Disaster Resilience and Management Office, dalawa ang namatay at mahigit 1,200 pamilya o 5,000 indibidwal ang apektado ng bagyo sa lungsod.

Samantala, 13 sa 25 risk areas sa Muntinlupa ang nananatiling lubog sa baha.

Tiniyak ng Department of Social Welfare and Development (DSWD) na sapat ang kanilang pondo para sa pagtulong sa mga sinalanta ng bagyong Paeng at pagdating ng iba pang kalamidad sa bansa ngayong taon.

Ayon kay Edu Punay, Undersecretary ng DSWD, may natitira pa silang 1.2 billion pesos na kabuuang resources, stockpiles at stand-by funds na gagamitin hanggang Disyembre.

Mula dito, gumastos na ang DSWD ng 69 million pesos bilang relief assistance.

Kung sakaling maubos ang natitirang pondo, nakahanda ang DSWD na dagdagan ito para sa pagtugon sa iba pang kalamidad.