HOT STORIES OF THE WEEK

Walang namo-monitor na paglabag ang Department of Trade and Industry (DTI) sa ipinatutupad na price freeze sa mga lugar na nasa ilalim ng state of calamity dahil sa bagyong Paeng.

Ayon kay Trade Assistant Secretary Ann Claire Cabochan, compliant o sumusunod ang mga retailers sa mga lugar na naapektuhan ng bagyong Paeng base na rin sa monitoring ng kanilang regional at provincial offices.

Sinabi ni Cabochan na sa ilalim ng Price Act, ang presyo ng mga pangunahing bilihin sa mga nasa state of calamity ay mananatili sa kanilang kasalukuyang presyo o mas mababa pa sa loob ng 60 araw.

Ang sinuman aniyang lalabag sa price freeze ay makukulong ng isa hanggang 10 taon o kaya naman ay multa mula 5,000 hanggang isang milyong piso depende sa magiging pasya ng korte.

Isinusulong ng Department of Environment and Natural Resources (DENR) ang pagbusisi sa ilang mga batas at regulasyon na may kinalaman sa kapaligiran at yamang kalikasan.

Kabilang dito ang Solid Waste Management Act, Clean Air Act, Clean Water Act, at ilang Mining laws.

Ayon kay DENR Undersecretary Jonas Leones, mahalagang masilip kung anong pag-amyenda ang maaaring gawin sa mga batas at regulasyong ito para matugunan ang mga depekto upang mas maging responsable ang publiko at iba’t ibang sektor tulad ng mining firms.

Aniya, bagama’t kumikita rito ang gobyerno, kailangan ding balansehin at tiyaking nakasusunod sa itinatakdang batas ang mga kompanya.

Nagbabala naman ang opisyal na hindi sila magdadalawang-isip na maglabas ng Freeze Order laban sa publiko at maging sa mga kompanya na hindi sumusunod sa mga batas pangkalikasan. —ulat mula kay Gilbert Perdez (Patrol 13)

Itinuturing ng World Wide Fund for Nature – Philippines (WWF) na isang “ironic” ang mga problema na kinakaharap ng bansa pagdating sa pagkain.

Sa panayam ng DWIZ, sinabi ni WWF Project Manager Melody Melo-Rijk na nakararanas ang Pilipinas ng food insecurity at food loss and waste na hindi naiiba sa sitwasyon ng ibang bansa.

Dito po sa Pilipinas hindi po tayo naiiba lalo na sa setting ng urban setting wherein nakikita po natin yung access at yung trend kapag ikaw ay nakakabili ng pagkain ikaw ay most likely nakakapag-aksaya ng pagkain, yan po yung trend na nakikita natin even several researches, studies would really say that as to when yung ating capacity to buy gives us more capacity to waste…”

Sang-ayon din si Rijk na base sa isang survey ay mahigit tatlong milyong pamilyang Pilipino ang hindi nakakakain.

Samantala, binigyang diin ni Rijk na kung makagagawa ng tamang paraan ang bansa ay tiyak na mapipigilan ang parehong problema ng pag-aaksaya ng pagkain at food insecurity.

sa WWF mayroon po kaming tatlong strategies na ini-employ kapag pinag-uusapan ang fod loss and waste , in 8 years na lang kasi diba po 2030 dapat ma-achieve na natin yung mga goals natin yung sustainable development goals so sa Pilipinas, una po natin talagang ginagawa ay pinag-uusapan po natin yung food loss and waste is to reduce a scarce so mayroon po talaga tayong mga dapat gawin sa mga bahay natin, mga businesses, sa ating supply chain at value chain sa pagkain, na hindi po tayo mag-aaksaya ng pagkain in the first place…

Ang tinig ni WWF Project Manager Melody Melo-Rijk sa panayam ng DWIZ

Magtutulungan ang Pilipinas at Israel para mapataas ang general emergency preparedness laban sa ibat-ibang uri ng kalamidad.

Kasunod ito ng pagbisita ni Israel Defense Attaché to the Philippines Raz Roy Shabtay at iba pang opisyal ng embahada ng Israel sa tanggapan ng Office of Civil Defense (OCD) sa Camp Aguinaldo, Quezon City.

Sinalubong ni Civil Defense Administrator Undersecretary Raymundo Ferrer ang mga opisyal ng Israel kung saan, kanilang tinalakay ang iba’t-ibang hakbang hinggil sa naturang usapin.

Kasabay nito, kanila ring nilibot ang NDRRM Operations Center kung saan, kanilang nasaksihan ang patuloy na monitoring at koordinasyon ng mga tauhan ng ahensya.

Inihayag ng National Irrigation Administration (NIA) na pumalo na sa P200-M ang halaga ng napinsala sa mga irigasyon sa ilang lugar sa bansa bunsod ng Bagyong Paeng.

Sa datos ng ahensya, apektado ang 16,367 magsasaka mula sa Regions 4-A, 4-B, 5, 6, 7, 8, 9, at 12.

Ayon sa NIA, hinihintay pa ng kanilang ahensya ang pondong ilalaan para sa pagsasaayos ng mga pinsalang iniwan ni bagyong Paeng sa Irrigation System.

Sa ngayon, nagpapatuloy ang operasyon ng NIA para sa paghahatid ng tulong sa mga apektadong magsasaka.

Pumalo na sa 1,162 ang bilang ng mga pampublikong paaralan ang nasira ng bagyong Paeng sa Western Visayas.

Kabilang ang Western Visayas sa apat na rehiyong isinailalim ni Pangulong Ferdinand Marcos Junior sa state of calamity kung saan, ang probinsya ng Antique ang pinaka-napuruhan.

Sa naturang lalawigan pa lamang, umabot sa 534 public school buildings ang nawasak o napinsala.

Inanunsiyo naman ni Governor Rhodora Cadiao na suspendido ang klase sa Antique hanggang ngayong araw at sa Lunes inaasahang ang pagbubukas ng mga paaralan.

Samantala, mahigit 400 pampublikong paaralan ang nasira sa Aklan, 100 sa Negros Occidental, nasa 60 sa Capiz, mahigit 30 sa Iloilo, anim sa Iloilo City at isa sa Roxas City. —sa panulat ni Hannah Oledan

Tiniyak ng Department of Agriculture na sapat ang supply ng bigas sa kabila ng pananalasa ng Bagyong Paeng na nagresulta sa P2.8-B na halaga ng pinsala sa sektor ng agrikultura.

Aminado si Agriculture Assistant Secretary Kristine Evangelista na bagaman nasa 95,694 metric tons ang lawak ng pinsala, tiyak na maka-aapekto ito sa supply.

Pero sapat ang supply, partikular ang local rice, dahil nagkaroon naman na ng improvement sa produksyon ng palay.

Ayon kay Evangelista, hindi pa ikinukunsidera ng DA na mag-import muli ng bigas kahit malaki ang pinsalang idinulot ng bagyo.

Sa katunayan anya ay lumago ang produksyon ng palay ngayong taon sa 12.67 million metric tons.

Para naman sa fourth quarter, nasa 2.6 million metric tons ang rice inventory level o katumbas ng 70 araw na supply.

Samantala, mamamahagi ang kagawaran ng mga rice, corn at vegetable seeds sa mga magsasaka.

Dinagdagan na ng Department of Budget and Management ang National Disaster Risk Reduction and Management Fund sa proposed 2023 National Budget.

Ito’y upang magkaroon ng improvement sa kahandaan at pagtugon ng bansa tuwing may kalamidad.

Itinaas ng DBM sa P31-B ang pondo sa 2023 Proposed National Budget mula sa kasalukuyang P20-B.

Alinsunod ito sa direktiba ni Pangulong Bongbong Marcos gawing proactive ang ekonomiya, kabilang ang pagpapatatag sa kapasidad ng bansa na humarap sa mga kalamidad, gaya ng bagyo.

Ipinunto ng Kagawaran na bagaman walang sinumang makapagsasabi kung gaano kalakas ang isang bagyo o lindol maging ang lawak ng epekto ng anumang kalamidad, mas maigi na anilang laging handa.

Itinanggi ni Transportation Secretary Jaime Bautista ang ulat na nanganganib umanong hindi mag-hire ang mga International Shipping Agencies, na kabilang sa European Union, ng mga Filipino seafarer.

Ipinaliwanag ni Bautista na hindi naman nabigo ang Pilipinas sa isinagawang audit ng European Maritime Safety Agency (EMSA) sa Training Program and at Accreditation System ng bansa para sa seafarers..

Sa katunayan ay patuloy anyang nagha-hire ng mga Pinoy mga International Shipping Agencies, kabilang ang mga naka-base sa E.U. Member States.

Ayon sa Kalihim, isinagawa ng EMSA ang audit para sa pagtalima ng bansa sa 1978 International Convention on Standards of Training, Certification and Watchkeeping for Seafarers noong 2020.

Ang EMSA ang ahensyang nakatutok upang mabawasan ang maritime accidents, marine pollution mula sa mga barko at pagkalagas ng mga buhay sa karagatan sa pamamagitan nang pagpapatupad ng mga batas ng E.U.

Maaari namang malagay sa alanganin ang trabaho ng nasa 50,000 Pinoy seafarers na nasa European Shipping Companies kung mabibigong tumalima sa requirements ng nasabing ahensya.

Sa kasalukuyan, mahigit 600 Filipino seamen ang nagtatrabaho sa iba’t ibang panig ng mundo.

Muling ipinaalala ng Light Rail Transit Authority (LRTA) na hanggang bukas na lang, Nobyembre a-5 ang libreng sakay para sa mga estudyante sa LRT Line 2.

Ayon kay LRTA Administrator, Atty. Hernando Cabrera, aabot sa isa’t kalahating milyong estudyante na ang nakinabang sa Libreng Sakay ng Line 2 mula Masinag, Antipolo hanggang Recto Avenue, Maynila simula noong August 22.

Ang naturang programa ay ipinatupad bilang suporta sa mga mag-aaral na naapektuhan ng COVID-19 pandemic.

Gayunman, hindi na anya ito palalawigin pa at hanggang bukas na lang.

Tiniyak naman ng LRTA na makatatanggap pa rin ang mga estudyante ng 20% discount sa tren simula sa linggo, Nobyembre a – 6.