Ilang pasahero sa Manila North Port Harbor Terminal patungong Bacolod ang limang araw nang stranded matapos ang pananalasa ng bagyong Paeng.
Ayon sa ulat, noon pang October 28 ang biyahe ng mga ito pero nadiskaril dahil sa bagyo kaya inilipat na lang sa November 4.
Dismayado naman ang karamihan sa mga pasahero lalo’t wala na silang sapat na salapi pabalik ng kanilang lalawigan at naubos na rin ang pagkain.
Sa ngayon, binigyan na ng DSWD ng food packs ang mga na-stranded na pasahero.
Pumalo na sa 61 ang bilang ng nasawi sa Maguindanao matapos ang pananalasa ng bagyong Paeng.
Ayon kay Governor Bai Mariam Sangki-Mangudadatu, 17 indibidwal pa rin ang kanilang hinahanap matapos ang naganap na landslide sa rehiyon.
Nangyari ang mga landslides na ito sa Barangay Kusiong sa Datu Odin Sinsuat; Barangays Romong-Ga-Ob at Lo-Oy sa South Upi; at Barangays Ma-A-Gabo Bayanga Sur Norte at Kabugaw Sapad sa Matanog.
Pumalo naman sa 30 mula sa 36 munisipalidad at 370 mula sa 508 barangay sa probinsya ang nasalanta ng bagyo, na nakaapekto sa 124,501 pamilya o 22,605 indibidwal.
Samantala, 10 tulay din ang nasira ng bagyo sa Maguindanao na kinabibilangan ng; Ledepan Bridge, Kurintem Bridge, DBS Bridge, Sarakan Street, Matengan Steel Bridge, Darapan Steel Bridge, Lower Magulat Kiga, Upper Magutay Rempes, Labu-Labu Bridge, at Nituan Bridge.
Naapektuhan ng severe tropical storm Paeng ang 110,000 indibidwal o katumbas ng 30,000 pamilya sa Cagayan.
Ayon kay Cagayan Vice Governor Boy Vargas, maraming mga residente ang nananatili pa rin sa mga evacuation center at may mga nanunuluyan din sa mga barangay hall at simbahan.
Matagal aniya na humupa ang tubig sa lalawigan kaya’t maaaring matagalan ng dalawa hanggang tatlong araw o higit pa bago makabalik ang mga residente sa kanilang mga tirahan.
Sinabi pa ni Vargas na nagtamo ng pinsala dahil sa bagyo ang 23 sa 29 na munisipalidad at isang siyudad sa lalawigan.
Handa na ang lokal na pamahalaan ng Surigao City sa posibleng pananalasa ng bagyong Queenie.
Nakamonitor 24/7 ang City Disaster Risk Reduction and Management Office (CDRRMO) sa lagay ng panahon para sa mabilis na pagtugon sa sama ng panahon.
Inihanda na rin ng CDRRMO ang mga kagamitan nito para sa road clearing, water search and rescue, at extrication sakaling may bumagsak na istruktura, gayundin ang floating aids at masonry tools.
Tinitingnan na rin ng mga otoridad ang pagpapatupad ng pre-emptive evacuation sa 33 barangays na binaha dahil sa mga nagdaang bagyo at 21 island barangays na posibleng maapektuhan ng malalakas na hangin at alon.
Samantala, nakikipag-ugnayan na rin ang CDRRMO sa iba pang ahensya ng gobyerno.
Sumampa na sa 154 ang bilang ng mga nasawi sa stampede na naganap sa Itaewon District sa Seoul, South Korea.
Ayon sa Interior and Safety Ministry ng South Korea, 150 sa mga nasawi ang natukoy na ng mga otoridad kung saan, 56 ang lalaki at 97 ang babae.
Nasawi sa insidente ang 26 na foreign nationals kabilang ang dalawang US citizens.
Iniulat din ng Ministry of Education ng South Korea na kabilang sa death toll ang anim na estudyante at tatlong guro.
Tumaas din ang bilang ng mga nasugatan sa 133 kung saan 37 ang nasa malubhang kondisyon.
Nakatakda namang bumuo ang South Korean Authorities ng investigation team upang tutukan ang nangyaring trahedya.
Inanunsyo ng Korte Suprema na tuloy ang 2022 bar exams na naka-iskedyul ngayong Nobyembre.
Ayon kay Supreme Court spokesman Brian Keith Hosaka, isasagawa ang bar exam sa November 9, 13, 16 at 20 na orihinal petsa para rito.
Dagdag pa nito, nasa 9,916 ang inaasahan na magta-take mula sa 10,075 na nag-apply ngayong tason.
Ang ilan aniya sa mga aplikante ng bar exam ay nag-withdraw.
Sumampa na sa 110 ang napaulat na nasawi dahil sa pananalasa ng bagyong Paeng sa bansa.
Ayon sa National Disaster Risk Reduction and Management Council (NDRRMC), sa nasabing bilang ay 79 ang kumpirmado habang bineberipika pa ang 31.
Karamihan ay naitala sa Bangsamoro Autonomous Region in Muslim Mindanao (BARMM) kung saan 59 ang nasawi.
22 naman ang galing sa Region 6; 12 mula sa CALABARZON; lima sa Region 8, apat sa Region 9; tatlo sa Region 12; dalawa sa MIMAROPA at tig-isa mula sa CAR, Region 5 at Region 7.
Maliban dito, nakapagtala rin ang NDRRMC ng 101 na napaulat na nasugatan kung saan 63 ang kumpirmado habang 33 naman ang napaulat na nawawala kung saan 23 dito ang kumpirmado. —sa ulat ni Tina Nolasco (Patrol 11)
Nagbigay ng paalala ang National Capital Region Police Office (NCRPO) sa publiko kaugnay sa paggunita ng Undas.
Sa panayam ng DWIZ, sinabi ni NCRPO spokesperson Police Lieutenant Colonel Dexter Versola, na sa kanilang pagbisita sa ilang mga sementeryo ay marami nang nakumpiskang matutulis na bagay ang mga otoridad.
Kabilang aniya sa mga ipinagbabawal dalhin sa loob ng sementeryo ang mga nakalalasing na inumin, gamit pang-sugal at speakers.
Sinabi pa ni Versola na maliban sa mga police personnel, ay mayroon ding mga force multipliers upang tiyakin ang seguridad ngayong panahon ng Undas.
Sa ating mga kababayan, mainam po ng mga protective gear against sa inclement weather..ngayon parang maaraw na so maganda po na magdala na sila ng payong against sa araw at mainam na rin po na magdala sila ng sapat ng pagkain at tubig at ok din po sana na magdala na rin sila ng trash bags para hindi na rin po magdagdag ng mga lilinisin pa sa mga sementeryo.
Ang mensahe ni NCRPO Spokesperson Police Lieutenant Colonel Dexter Versola sa mga pupuntang sementeryo ngayong Undas 2022.
Limang tropical cyclones pa ang inaasahang papasok sa Philippine Area of Responsibility hanggang sa pagtatapos ng 2022.
Ayon sa Philippine Atmospheric, Geophysical and astronomical Services Administration (PAGASA), ngayong buwan ng Nobyembre ay inaasahang papasok ang dalawa hanggang tatlong bagyo habang isa hanggang dalawang bagyo naman sa Disyembre.
Sa ngayon ay patuloy na binabantayan ng state weather bureau ang bagyong Queenie.
Tumatanggap na rin ang Department of Social Welfare and Development (DSWD) ng mga donasyon para sa mga nasalanta ng bagyong Paeng.
Sinabi ng ahensya na bukas sila sa mga donasyon na kinakailangan ng mga naapektuhang pamilya tulad ng mga pagkain, damit, sleeping kit, hygiene kit, tent at tarpaulin.
Handa ring tumanggap ang DSWD ng cash donations na maaaring ipadala sa DSWD bank accounts.
Una na rin nanawagan ang ahensya ng volunteers para tumulong sa repacking ng relief goods para sa Paeng-affected areas.