HOT STORIES OF THE WEEK

Boluntaryo na rin ang pagsusuot ng face masks sa mga workplace sa pribadong sektor bilang pagtalima sa kautusan ni Pangulong Bongbong Marcos na gawing optional ang face mask use sa indoor spaces.

Kinumpirma ni Labor Secretary Bienvenido Laguesma na nilagdaan na niya ang Labor Advisory 22, series of 2022, o Guidelines on the Voluntary Wearing of Face Masks in Workplaces.

Gayuman, nilinaw ni Laguesma na may mga exempted sa nasabing kautusan gaya ng healthcare facilities, partikular ang mga ospital, clinic at laboratoryo;

Medical transport vehicles, tulad ng ambulansya; public transportation mapa-lupa, tubig at himpapawid.

Para naman sa government workplaces, kailangan pang hintayin ang kautusan mula sa Civil Service Commission.

Suportado ng isang mambabatas ang plano ni Pangulong Ferdinand “Bongbong” Marcos Jr., na magtayo ng Department of Public Works and Highways (DPWH) office sa Bangsamoro Autonomous in Muslim Mindanao (BARMM).

Ayon kay Basilan Rep. Mujiv Hataman, tama lang ang naging pasya ng Punong Ehekutibo dahil marami ang nasira sa sektor ng imprastruktura, kabilang na ang mga kalsada, at tulay.

Sinabi ni Hataman na malaking tulong ang pagpapatayo ng mga opisina sa BARMM para mas mapabilis ang pagsasaayos ng mga nasirang imprastruktura bunsod ng Bagyong Paeng.

Bukod pa dito, matututukan din ang implementasyon ng mga National Project na pinipondohan ng pamahalaan.

Umaasa ang mambabatas na matututukan ng Administrasyong Marcos ang sektor ng imprastruktura sa rehiyon.

Iginiit ng Department of Social Welfare and Development (DSWD) na hindi masasayang ang mga food packs na nakalaan para sa mga nasalanta ng bagyo sa mga lalawigan sa bansa.

Ayon kay DSWD Usec. Edu Punay, layunin ng kanilang ahensya na maiwasang umabot sa expiration date at maiwasang masira ang mga pagkaing ipinamimigay tuwing may banta ng kalamidad.

Iginiit ng opisyal na, maingat nilang sinusuri ang bawat produktong kanilang inilalagay sa bawat relief packages para hindi ito masayang.

Nagbitiw na bilang kasapi at Executive Vice President ng Partidong Aksiyon Demokratiko si Pasig City Mayor Vico Sotto.

Ito ang kinumpirma ng Chairperson ng Partido na si Ernest Ramel kung saan, sinabi niya na hindi nila inaasahan ang biglaang paghahain ni Sotto ng Resignation Letter.

Sa Twitter Post ng Alkalde, nakasaad sa kaniyang resignation letter ang araw ng kaniyang pagsali sa partido noong 2018.

Naniniwala si Sotto, na magkakaiba ang layunin at mithiin ng bawat indibidwal pagdating sa pulitika.

Sa kabila ng pagbitiw ng Alkalde sa kaniyang posisyon, bukas pa rin umano ang pintuan para kay Sotto sakaling bumalik ito sa partido.

Mariing itinanggi ng Metropolitan Manila Development Authority (MMDA) ang kumakalat na balita na muling ipatutupad ang No Contact Apprehension Policy (NCAP) sa November 15.

Ayon sa MMDA, fake news ang napaulat hinggil sa isyu ng NCAP at hindi umano nagmula sakanilang ahensya, ang naturang balita.

Sinabi ng MMDA, na ang umano’y muling pagpapatupad ng NCAP sa Metro Manila ay walang katotohanan dahil sinuspinde na ito noon pang buwan ng Agosto kasunod ng pagpapalabas ng Temporary Restraining Order (TRO) ng Korte Suprema.

Nagpaalala sa publiko ang MMDA partikular na sa mga motorista na huwag basta maniniwala sa mga nakapost sa social media platforms at alamin muna ang pinanggalingan ng impormasyon kung ito ba ay mula sa lehitimong sources.

Inihayag ng Philippine Coast Guard (PCG) na mananatiling naka- heightened alert hanggang sa Biyernes ang kanilang ahensya kasunod ng paggunita ng Undas 2022 at pananalasa ni Bagyong Paeng.

Ayon sa PCG, ito’y para masigurong ligtas sa anumang uri ng krimen at nasa maayos ang biyahe ng mga pasaherong magbabalik sa Maynila mula sa kani-kanilang mga probinsya.

Nakamonitor pa rin ang mga tauhan ng PCG sa bawat mga pantalan makaraang ibalik na sa normal ang operasyon nito matapos ang nagdaang bagyo.

Sa ngayon, patuloy sa pagsasagawa ng ibat-ibang operasyon at koordinasyon ang ahensya upang tugunan ang pangangailangan ng mga biyahero.

Inihayag ng Department of Education (DepEd) na naging maayos ang unang araw ng pagbabalik sa normal na klase ng mga estudyante, sa mga pampublikong paaralan kahapon kasabay ng paggunita ng All Soul’s Day.

Ayon kay DepEd spokesperon Michael Poa, walang natatanggap na anumang uri ng krimen ang kanilang ahensya mula sa mga rehiyon sa bansa.

Iginiit ng ahensya na kanilang bibigyang konsiderasyon ang ilang mga paaralan na hirap paring magpatupad ng face to face classes, dahil sa classroom shortage bunsod ng mataas na bilang ng enrollees at mga nasirang silid-aralan dulot ng mga nagdaang kalamidad.

Sa kabila nito, tiniyak ni Poa na handa ang kanilang ahensya na tugunan ang anumang problema at banta na may kaugnayan sa mga paaralan.

Lumobo pa sa P6.2-B ang halaga ng pinsala ng Bagyong Paeng sa agrikultura at imprastraktura.

Sa datos ng National Disaster Risk Reduction and Management Council, pinaka-malaki ang pinsala sa imprastraktura na umabot sa P3.5-B.

Ayon naman sa Department of Agriculture, sumampa na rin sa mahigit P2.7-B ang pinsala sa Agriculture Sector.

Kabuuang 82,830 hectares ng agricultural land ang nagtamo ng pinsala sa Bicol, Cordillera Administrative Region, Cagayan Valley, Central Luzon, CALABARZON, MIMAROPA, Western at Eastern Visayas, Zamboanga Peninsula, Central Mindanao at Soccsksargen regions.

Kabilang sa matinding pinadapa ang mga palayan na umabot sa 95,000 metric tons ang volume loss o P1.7-B ang halaga ng pinsala na sinundan ng high value crops, P555.4-M at fisheries, P201-M.

Pinaka-lubhang nasalanta ang sektor ng agrikultura at imprastraktura sa Bicol Region na umabot sa P1.2-B ang kabuuang halaga.

Nagpapatuloy ang pamamahagi ng ayuda ng D.A. sa mga apektadong magsasaka at mangingisda.

Mahigit isang buwan bago mag-Pasko, nagmahal na ang mga produktong pang-Noche Buena.

Sa pag-iikot kahapon ng Department of Trade and Industry, tumaas ang presyo ng lahat ng Noche Buena products, gaya ng Hamon at Quezo de Bola.

Kabilang din sa nagmahal ang Pasta, tulad ng Elbow Macaroni na P40 na ang kada 400 grams kumpara sa P34 noong isang taon at spaghetti, P41 kumpara sa dating P35 kada pakete.

Inihayag naman ni Trade Assistant Secretary Ann Claire Cabochan na dahil sa dagdag-presyo, pinag-aaralan ng DTI kung maglalabas sila ng Price Guide sa Noche Buena items.

Samantala, wala pa ring pasya ang kagawaran sa hirit na dagdag-singil ng manufacturers ng basic at prime commodities, kabilang ang Pinoy Tasty at Pinoy Pandesal.

Gayunman, ilang Non-basic items ang kapansin-pansing nagmahal ngayong Nobyembre.

Kampante naman si Philippine Amalgamated Supermarkets Association President Steven Cua na inaasahang daragsa pa rin ang mga mamimili habang papalapit ang holiday season, kahit may price hike.

Pinamamadali na ni Senator Bong Revilla, Jr. sa Department of Public Works and Highways ang pagkumpuni sa mga nasirang imprastruktura, gaya ng mga tulay at dike dahil sa hagupit ng Bagyong Paeng.

Si Revilla ang Chairman ng Senate Committee on Public Works at kabilang siya at kanyang pamilya na pawang taga-Cavite na matinding nasalanta ng bagyo.

Sa kanyang sulat kay DPWH Secretary Manuel Bonoan, tinanong ng Senador kung kakayanin ba ang repair sa loob ng anim na araw.

Inihalimbawa naman ng Senador ang nangyaring magnitude 9.1 na lindol sa Japan noong March 2011, na umabot lang umano ng anim na araw ang pag-repair sa mga kalsada.

Pinagsusumite rin ng mambabatas si Bonoan ng report sa kabuuang pinsala ng mga pampublikong imprastruktura kabilang ang mga tulay, dike, flood control structures.

Tiniyak naman ni Revilla na hihingin niya sa Senate Committee on Finance na isama sa 2023 National Budget ang pondo para sa repair ng mga imprastruktura. —ulat mula kay Cely Ortega Bueno (Patrol 19)