HOT STORIES OF THE WEEK

Nasa 5,784 na police assistance desk ang ipinakalat ng Philippine National Police (PNP) sa mga sementeryo sa bansa ngayong paggunita ng Undas.

Ito’y upang matiyak ang kahandaan ng mga otoridad sa pagtugon sa pagdagsa ng tao sa 4,769 sementeryo, memorial parks at mga kolumbaryo sa bansa.

Ayon kay PNP Chief Police General Rodolfo Azurin Jr. mahigpit na inatasan nito ang kapulisan na panatilihin ang kaayusan at seguridad ngayong Undas.

Habang paalala naman ng PNP Chief sa publiko, sumunod sa mga patakaran ng mga sementeryo at huwag nang magdala ng ipinagbabawal na mga gamit. —sa ulat ni Tina Nolasco (Patrol 11)

Pumalo na sa 757,841,175 ang naitalang pinsala sa imprastraktura ng bagyong Paeng sa Region 5,6,7 at 10.

Habang hindi pa kasama sa ngayon ang halaga ng pinsalang naidulot sa imprastraktura ng naturang bagyo sa MIMAROPA at Region 11.

Ayon sa National Disaster Risk Reduction and Management Council (NDRRMC), 37 ang kabuuang bilang ng mga imprastrakturang nasira ng bagyo.

Kung saan 19 dito ay mula sa Region 6, siyam ay mula sa Region 7, apat ay mula sa Region 10, kapwa dalawa sa MIMAROPA at Region 5 at isa sa Region 11.

Pinakamalaki namang halaga ng pinsalang naitala sa ngayon ay mula sa Region 5 na umabot sa 357,179,900.

Sinundan ng mga imprastraktura sa Region 7 na napinsala ng aabot sa 272 million pesos, Region 10  na may 110 million pesos at mga imprastraktura sa Region 6 na  napinsala ng aabot sa 661,675 pesos. —sa ulat ni Tina Nolasco (Patrol 11)

Aarangkada na ngayong araw ang pagbibigay ng cash assistance para sa mga taong nasiraan ng kabahayan dahil sa Bagyong Paeng.

Ito ay ayon kay DSWD Secretary Erwin Tulfo, magmumula ang pondo sa Assistance to Individuals in Crisis Situations (AICS) program ng ahensya.

Habang ani Tulfo ang mga slightly damaged naman ay posibleng mabigyan ng pampaayos bukas o sa susunod na araw.

Sinabi pa nito na target nilang unahin ang pagbibigay ng mga pagkain sa mga indibidwal na hindi pa kumakain.

Samantala, tinatayang nasa mahigit 700 na kabahayan ang napinsala ng severe tropical storm Paeng.

Umakyat na sa 757,841,175 pesos ang naitalang pinsala sa imprastraktura ng Bagyong Paeng sa MIMAROPA, Region 5,6,7,10 at 11.

Ayon sa National Disaster Risk Reduction and Management Council (NDRRMC), 37 ang kabuuang bilang ng mga imprastrakturang nasira ng naturang bagyo.

Kung saan 19 dito ay mula sa Region 6, siyam mula sa Region 7, apat mula sa Region 10, kapwa dalawa sa MIMAROPA at Region 5 at isa naman sa Region 11.

Pinakamalaki namang halaga ng pinsalang naitala sa ngayon ay mula sa Region 5 na umabot sa 357,179,900.

Sinundan ng Region 7 na aabot sa 272 million pesos, Region 10  na nasa 110 million pesos at pinasala sa  Region 6 na aabot sa 661,675 pesos. —sa ulat ni Tina Nolasco (Patrol 11)

Nasa 15 indibidwal ang nailigtas kabilang ang kapitan at mga crew matapos tumaob ang private motorized pump boat sa Barangay Molocaboc, Sagay City, Negros Occidental.

Ayon kay Lieutenant Colonel Roberto Indiape Junior, Sagay Police Chief, nangyari ang insidente nang magdesisyon ang may-ari at kapitan na ihatid ang nasa 13 pasahero sa kabila ng pagbabawal ng Philippine Coast Guard (PCG) dahil sa Bagyong Paeng.

Dahil aniya sa malaking alon dulot ng malakas na hangin, tumaob ang naturang bangka.

Samantala, nailigtas ang lahat ng sakay at nakauwi na sa kani-kanilang pamilya.

Pumalo sa mahigit na 1,000 ang dumalaw sa kanilang mga yumaong mahal sa buhay sa Bagbag Public Cemetery sa Novaliches, Quezon City.

Sinabi ni Bagbag Public Cemetery Administrator Gene Biglang Awa, wala pa namang naitatalang untoward incident.

Kasama sa ipinatutupad na seguridad ang hiwalay na entrance ng babae at lalake at sila ay kapkapkapan upang walang maipuslit na ipinagbabawal na gamit tulad ng speakers, mga gamit pang sugal, alak o anumang uri ng inuming nakalalasing.

Maliban dito, kailangan din magpresinta ng vaccination card ang mga magulang na may kasamang bata at ang mahigpit na pagpapatupad ng No Face Mask, No Entry policy.

Samantala, nasa 500,000 katao ang inaasahang dadagsa sa Bagbag Public Cemetery hanggang sa November 2.

Tiniyak ni Defense Officer-In-Charge and Senior Undersecretary at NDRRMC Chairperson Jose Faustino Jr. na hindi titigil ang gobyerno sa paghahatid ng tulong at pagtugon sa pangangailangan ng mga nasalanta ng Bagyong Paeng.

Ayon sa opisyal, inatasan na nito ang lahat ng mga regional agencies ng Office of the Civil Defense na ipagpatuloy ang relief operations sa lahat ng lugar na hinagupit ng bagyo

Nakatakda na rin aniya silang bumisita sa visayas at atasan ang Armed Forces of the Philippines na ihanda ang kanilang land, sea at air asset para sa anumang aktibidad na kailangang gawin pagkatapos ng bagyo.

Dagdag pa nito na hindi natatapos ang pag-aabot ng tulong ng pamahalaan sa Luzon at Mindanao.

Kaugnay nito, nagpaabot ng pakikiramay ang opisyal sa nang mga nasalanta at nawala ng mahal sa buhay dahil sa bagyo. —sa ulat ni Tina Nolasco (Patrol 11)

Umabot na sa 98 ang nasawi dahil sa paghagupit ng bagyong Paeng batay sa ulat ng National Disaster Risk Reduction and Management Council o NDRRMC ngayong umaga.

Sa mga napaulat na namatay 58 rito ang kumpirmado na habang 40 ang bineperipika pa.

Kung saan pinaka maraming bilang ng kumpirmadong nasawi ay mula sa Bangsamoro Autonomous Region in Muslim Mindanao o BARMM

Habang nakapagtala rin ang NDRRMC ng 69 sugatan at 63 nawawala dahil pa rin sa bagyo.

Mula sa mga bilang nang napaulat na sugatan 42 rito ay kumpirmado na at 27 ang kinukumpirma pa ng ahensya.

Sa mga bilang naman ng mga nawawala 25 na ang nakumpirma ng NDRRMC at 38 rito ay bineberipika pa sa ngayon.

Mahigit 700 Persons Deprived of Liberty (PDLs) ang ligtas na naibalik sa Rizal Bureau of Jail Management and Penology (BJMP) matapos ilikas ang mga ito bunsod nang pananalasa ng tropical storm Paeng.

Nabatid na mahigit 600 lalaki at mahigit 100 babaeng inmates ang inilikas noong Sabado.

Ayon kay Rizal BJMP Warden Jail Superintendent Alvin Gavan, nagbigay ng direktiba ang lokal na pamahalaan na ilikas ang mga malapit sa ilog dahil sa pagtaas ng tubig na dulot ng matinding pag-ulan.

Aminado naman si Galvan na hindi naging madali ang paglikas at pagbalik sa kulungan ng mga preso dahil sa mga security measures na kailangang gawin.

Umakyat na sa 80 ang napaulat na nasawi habang 31 indibidwal ang nawawala kasunod ng pananalasa ng Bagyong Paeng.

Batay sa situation report na inilabas ng National Disaster Risk Reduction and Management Council (NDRRMC), 38 sa bilang ng mga nasawi ang kumpirmado habang ang iba ay patuloy na bineberipika.

Karamihan sa naitalang casualties ay mula sa Bangsamoro Autonomous Region in Muslim Mindanao (BARMM) na may 40; sinundan ng Region 6 o Western Visayas na may 18;

Labindalawa naman sa CALABARZON; apat sa Region 9 o Zamboanga Peninsula; tatlo sa Region 12 o SOCCSKSARGEN; dalawa sa Region 8 o Eastern Visayas at isa sa Region 5 o Bicol.

Mayorya naman sa bilang ng mga nawawala ay naitala sa BARMM at Eastern Visayas na may tig-10; anim sa Western Visayas; tig-dalawa sa CALABARZON at MIMAROPA; at tig-isa sa Bicol, at SOCCKSARGEN.

Naapektuhan ng Bagyong Paeng ang kabuuang 339,051 pamilya o 1.174 milyong indibidwal, kung saan 70,538 families o 266,984 individuals ang nananatili sa evacuation centers.