HOT STORIES OF THE WEEK

Inaasahan ang panibagong rollback sa presyo ng produktong petrolyo bukas, araw ng Martes.

Ayon sa ilang taga-industriya, 50 centavos hanggang 60 centavos ang maaaring ipatupad na tapyas-presyo sa kada litro ng diesel.

Habang 10 centavos hanggang 20 centavos sa kada litro ng gasolina at 67 centavos naman sa kada litro ng kerosene.

Sinabi naman ni Department of Energy – Oil Industry Management Bureau Director Rino Abad na posible na mas mababa sa piso ang ipatupad na bawas-presyo sa oil products.

Karaniwang inaanunsyo ng mga kumpanya ng langis ang price adjustments tuwing Lunes at ipinatutupad ito sa susunod na araw.

Samantala, nakaamba namang tumaas ang presyo ng Liquefied Petroleum Gas (LPG) sa pagpasok ng buwan ng Nobyembre.

Batay sa mga taga-industriya, ito’y dahil sa pagsirit ng demand bunsod ng bawas sa produksyon ng OPEC countries at pag-uumpisa ng taglamig o winter months sa Europa.

Sumampa na sa 72 ang naitalang bilang ng mga nasawi dahil sa Bagyong Paeng.

Sa datos ng National Disaster Risk Reduction and Management Council (NDRRMC) ngayong umaga, animnaput pito rito ay nagmula sa Bangsamoro Autonomous Region in Muslim Mindanao (BARMM), tatlo ang galing sa Region 12 at dalawa sa Region 6.

Tatlumput tatlo naman ang naiulat na sugatan habang 14 ang nawawala.

Nasa 49,767 pamilya o katumbas ng 184,000 indibidwal  naman ang apektado at mahigit 170 bahay ang napinsala dahil sa kalamidad.

Samantala, umabot na sa P54.5 million ang danyos sa agrikultura dulot ng Bagyong Paeng.

Nakapamahagi na ang gobyerno ng nasa P4.1 million na tulong sa mga biktima ng Bagyong Paeng.

Ayon sa Office of the Press Secretary (OPS), nasa P1.5 billion ang pondo ng gobyerno para sa pamimigay ng relief kung saan may P445.2 million sa standby funds at quick response fund.

Aniya, mayroon din ang Department of Social Welfare and Development (DSWD) na mahigit P1,000,000 halaga ng relief goods na nakahandang ipamahagi.

Pinaalalahanan naman ng Palasyo ang publiko na maging alerto kaugnay sa pananalasa ng naturang bagyo.

Arestado ang isang illegal drug courier mula sa South Africa matapos makuhanan ng mahigit P92.24 million na halaga ng shabu sa ikinasang operasyon ng Bureau of Customs, Philippine Drug Enforcement Agency, NAIA Inter-Agency Drug Interdiction Task Group sa NAIA Terminal 3, sa Pasay City kahapon, October 28, 2022.

Kinilala ang suspek na isang 40-taong gulang na babae at dumating sa bansa lulan ng Flight EK 334 na mula sa Johannesburg, South Africa.

Natagpuan ng mga otoridad ang naturang droga na nakatago sa isang false compartment ng bagahe na dala ng babae.
Agad namang nagsagawa ng Field Test ang Customs Anti-Illegal Drug Task Force (CAIDTF) kung saan nagpositibo sa shabu ang nasabing droga na umabot sa 13,565 grams at tinatayang nagkakahalagang P92,242,000.

Gayundin, isang Norwegian passenger ang naaresto ng mga otoridad kahapon dahil sa pagtatangkang magdala ng 8.34 kilos ng shabu na tinatayang nasa P56.7 million ang halaga.

Itinurn over naman ang nasabing pasahero at iligal na droga sa PDEA para sa inquest proceedings sa paglabag sa R.A 9165 o Comprehensive Dangerous Drugs Act of 2002 na may kaugnayan sa sections 118 o Prohibited Importation, 1113 o Goods Liable for Seizure and Forfeiture at 1401 o Unlawful Importation ng Republic Act 10863, na tinatawag na Modernization and Tariff Act (CMTA).

Samantala, ang Bureau of Customs, sa pamumuno ni Commissioner Yogi Filemon L. Ruiz at naaayon sa direktiba ni Pangulong Ferdinand Marcos Jr., ay mananatiling mapagbantay laban sa pagpasok ng mga ipinagbabawal na droga at iba pang kontrabando sa lahat ng paliparan at daungan sa buong bansa. —via Raoul Esperas (Patrol 45)

Libo-libong pasahero ang na-stranded sa mga daungan, terminal bunsod ng pananalasa ng Bagyong Paeng.

Nagpalipas ng gabi sa mga terminal ng bus, daungan o paliparan ang mga pasaherong patungo sa probinsya matapos sinuspinde ang ilang biyahe at flights.

Umabot sa 25,000 domestic passengers habang 19 na bus ang hindi pinayagang bumiyahe.

Sinabi ng pamunuan ng PITX na maaring manatili sa terminal ang pasahero habang naghihintay na payagan ng Department of Transportation (DOTr) na ipagpatuloy ang mga biyahe. —sa panulat ni Jenn Patrolla

Kasalukuyang lampas tao na baha ang nararanasan ng Barangay Upi sa Maguindao bunsod ng Bagyong Paeng.

Apektado rin ng landslide ang ilang lugar sa Maguindano kung saan ilang katao na ang lumikas patungo sa mga evacuation centers.

Sa panayam ng DWIZ, sinabi ni Volunteer Noelle Jean Ruvi Gamino, alas-6 ng gabi ng Huwebes nang magsimulang lumakas ang ulan habang tumaas ang tubig ng alas-12 nang madaling araw, kahapon.

Mga paaralan at gym sa naturang lugar ang pansamantalang tinutuluyan ng mga nagsilikas.

Nagsasagawa naman ng rescue operation ang lokal na pamahalaan habang nananawagan ng donasyon ang ilang mga residente. —sa panulat ni Jenn Patrolla

Nailipat na ang isa pang Person of Interest mula sa Intelligence Service of the Armed Forces of the Philippines detention facility sa kustodiya ng National Bureau of Investigation.

Ayon kay Justice Department spokesman Assistant Secretary Mico Clavano na ito na ang ang ika-walong person of interest sa kasong Percy Lapid na binanggit ni justice secretary Jesus Crispin “Boying” Remulla noong Miyerkules.

Sa walong persons of interest, lima ang nasa kostudiya ng DOJ habang ang tatlo ay nasa kustodiya ng Philippine National Police.

Sinabi pa ni Clavano na maaring makunan na rin ngayon ng salaysay ang ika-walong person of interest.

Sinabi naman ni Philippine National Police chief general Rodolfo Azurin, Jr. na si Bantag ay kabilang sa 160 personalidad na itinuturing na “persons of interest” sa naturang kaso.

Nagpaabot ng pasasalamat si Eastern Mindanao Command o Eastmincom commander Lieutenant General Greg Almerol sa Pangulong Ferdinand “Bongbong” Marcos Jr. sa kanyang naging pagbisita sa headquarters sa Panacan, Davao City kahapon.
Sinabi ni Almerol, ang pagbisita ng Pangulo ay nagpataas sa morale ng mga tropa, na labis ang kasiyahan na personal na makita ang kanilang commander in chief.
Sinabi ni pa nito na isang karangalan na kilalanin ng Pangulo ang kontribusyon ng mga tauhan ng Eastern Mindanao Command sa kapayapaan, seguridad at kaunlaran sa kanilang area of operations na naging daan sa pag-dismantle ng NPA sa buong Davao Region
Samantala, kasama din sa nasabing seremonya sina Vice-President Sara Duterte, Department of National Defense (DND) Senior Undersecretary Jose Faustino Jr., Gov. Corazon Nuñez-Malanyaon ng Davao Oriental, Gov. Edwin Jubahib ng Davao Del Norte, Gov. Dorothy Montejo-Gonzaga ng Davao De Oro, at Mayor Sebastian Duterte ng Davao City.

Pormal nang ipinag-utos ni Pangulong Ferdinand Marcos Jr. na gawing voluntary o optional ang pagsusuot ng face mask sa indoor at outdoor settings.

Ito’y matapos lagdaan ng Punong Ehekutibo ang Executive Order No.07 na may kaugnayan dito.

Gayunman, nilinaw sa direktiba ng Pangulong Marcos na mandatory pa rin ang pagsusuot ng face mask sa mga healthcare facilities, medical transport vehicles at public transportation.

Ang EO No.07 ay pinirmahan ni PBBM ngayong araw, Oktubre 28, sa pamamagitan ni Executive Sec. Lucas Bersamin.

Panibagong bawas-presyo sa petrolyo, asahan na sa susunod na linggo
Asahan na ang tapyas-presyo sa produktong petrolyo sa susunod na linggo.
Sinabi ng Department of Energy Oil Industry Management Bureau o DOE OIMB Director Rino Abad, nasa P0.60 hanggang P0.95 ang bawas-presyo sa kada litro ng diesel.
Habang P0.30 hanggang P0.60 naman sa kada litro sa gasolina.
Samantala, karaniwang inaanunsiyo ng mga kompanya ng langis ang oil price adjustment tuwing Lunes o sa mismong araw na ipatupad ito.