Handa na ang buong pwersa ng Philippine Coast Guard (PCG) para sa Undas gayundin sa posibleng epekto ng Bagyong Paeng.
Sa panayam ng DWIZ, sinabi ni PCG Spokesperson Commodore Armand Balilo na dapat na planuhing mabuti ng mga pasahero ang kanilang biyahe upang maiwasang ma-stranded partikular sa mga pantalan.
Matatandaang naka-heightened alert ang PCG simula October 24 hanggang sa November 3 para sa Undas 2022.
Hawak na ng NBI-Manila sa Taft Avenue ang apat pang bilanggo na posibleng may kinalaman sa pagpatay sa broadcaster na si Percival Mabasa o Percy Lapid.
Kabilang sa dumating sa NBI headquarters mula sa Bureau of Corrections ang tatlong mayor ng mga gang at druglord na si German Agojo mula sa New Bilibid Prison, Muntinlupa.
Kinumpirma rin ni Justice Secretary Boying Remulla na kasama sa nauna nang itinurn-over sa kanila ang mga presong sina Christopher Bacoto at Jose Palana Villamor.
Gayunman, hindi pa malinaw kung magiging testigo ang anim sa imbestigasyon sa kaso ng pagpatay kay Ka Percy.
Binigyan na ng clearance ng Department of Justice ang n.b.i. na kunan ng salaysay ang anim na persons deprived of liberty hinggil sa nalalaman nila sa pagkamatay ng middleman na si Jun Villamor.
Inaasahan na sisimulan ang interview sa mga bilanggo ngayong umaga upang magawan sila ng mga sinumpaang salaysay. —sa ulat ni Aya Yupangco (Patrol 5)
Inaasahang matatapos ngayong araw ang isinagawang second autopsy sa katawan ni Jun Villamor na umano’y middleman sa pagpaslang sa brodkaster na si Percy Lapid.
Ayon kay Justice Secretary Jesus Crispin Remulla, nagkakausap sila ni Dr. Raquel Fortun kung saan isinagawa kahapon ang external at ngayong araw naman ang internal examine.
Dagdag ni Remulla na nakatakdang dalhin ang labi ni Villamor kasama ang kapatid nito pauwi ng Leyte.
Matatandaang kinuwestiyon ni Dr. Fortun ang ginawang autopsy sa bangkay ni Villamor sa NBI kung saan wala raw naging foul play sa pagkamatay nito at wala ring tinukoy na cause of death.
Pinag-iingat ng Office of Civil Defense (OCD) ang publiko sa posibleng aftershocks na maaaring maramdaman.
Ito’y matapos tumama ang magnitude 6.4 na lindol kagabi sa Abra.
Sinabi ng OCD na dapat laging isipin ng publiko ang mga gagawin kapag lumindol gayundin kapag tapos na ang pagyanig.
Ipinabatid pa ng ocd na kung mayroong tinamong pinsala ay huwag agad babalil sa gusali o tahanan pagkatapos ng lindol.
Kailangan din suriin ang mga linya ng tubig , kuryente maging ang tangke ng gas.
Mahalaga din aniya na makibahagi sa eartquake drill upang malaman ng publiko ang mga gagawin kapag tumama ang lindol.
Nakapagtala na ang PHIVOLCS ng 409 aftershocks kasunod ng magnitude 6.4 na lindol na tumama sa abra bandang alas-10:59 kagabi.
Batay sa monitoring hanggang kaninang alas-10 ng umaga, 81 dito ay plotted earthquakes habang lima naman ang may kalakasan.
Unang naitala ng PHIVOLCS ang magnitude 6.7 na lindol na kalaunay ibinaba sa magnitude 6.4.
Tectonic ang origin ng pagyanig na natunton ang sentro, 9 na kilometro, hilagang-kanluran ng Bayan ng Lagayan at may lalim na 11 kilometro.
Masyado pang maaga para ipatupad ang boluntaryong pagsusuot ng face mask sa indoor spaces.
Ito’y ayon kay Dr. Maricar Limpin, immediate past president ng Philippine College of Physicians, lalo’t nasa bansa na ang Covid-19 Omicron subvariant na “XBB” at bagong variant ng Covid na “XBC.”
Ikinababahala aniya nilang mga eksperto na isipin ng publiko na maaari nang maging kampante kahit na mayroon pang Covid-19.
Iginiit pa ni limpin na marami pa ang walang bakuna kontra Covid-19 at booster shots.
Naniniwala si Limpin na mas mainam kung bababa ang bilang ng mga kaso ng Covid-19 sa bansa upang mahikayat ang mga turista na bumisita sa Pilipinas.
Sinimulan na ng Philippine National Police (PNP) ang imbestigasyon hinggil sa pagkakadawit ni Bureau of Corrections (BuCor) Chief Gerald Bantag na sinuspinde kamakailan matapos mapasama ang pangalan nito sa 160 personalidad na itinuturing ‘persons of interest’ sa Percy Lapid Slay Case.
Ayon sa PNP, binabalangkas na nila ang naging broadcast ni Lapid hinggil sa mga alegasyong si Bantag umano ang pinatatamaan nito sa kaniyang programa.
Sinabi ng PNP na walang katiyakan na binanggit ni Lapid ang pangalan ni Bantag pero may isang broadcast na tinitignan ang kanilang ahensya na maaring si Bantag nga ang tinutukoy o pinatatamaan ni ka-Percy.
Inaalam narin ng PNP kung may pananagutan si Bantag sa pagkamatay ng ‘middleman’ na si Jun Villamor, matapos mahirapan umanong huminga sa loob ng New Bilibid Prison (NBP).
Sa ngayon, mas pinaigting pa ng PNP ang follow up investigation kaugnay sa naganap na krimen.
Tatlong weather system ang nakakaapekto sa loob ng ating bansa na binubuo ng northeast monsoon o hanging Amihan, Shearline at Low Pressure Area (LPA) na namataan sa layong 1,110 kilometers silangan ng silangang Visayas.
Ayon kay PAGASA weather specialist Obet Badrina, patuloy na binabantayan ang LPA na posibleng maging bagyo ngayong araw at kung sakaling maging isang ganap na bagyo, tatawagin itong Bagyong Paeng.
Mataas ang tiyansa nito na manalasa sa silangang bahagi ng Luzon at posibleng hindi na tumama sa kalupaan pero hindi parin inaalis ng PAGASA ang posibilidad na magladfall ito sa Central o Southern Luzon o Visayas.
Ang Shearline o ang pinagsamang malamig at mainit panahon mula sa Pacific Ocean parin ang nagdadala ng mga kaulapan sa bahagi ng Southern at Central Luzon maging sa Metro Manila.
Asahan din na mas mararamdaman ang epekto ng Shearline sa Southern Luzon partikular na sa Quezon Province, Bicol Region, at MIMAROPA habang makararanas naman ng mahihinang tiyansa ng pag-ulan ang Northern Luzon.
Inihayag ni Department of Tourism (DOT) Sec. Christina Frasco, na makakatulong sa Pilipinas ang pagpapaigting ng mas maluwag na restriksiyon upang mapalakas ang turismo at ekonomiya ng bansa.
Ayon kay Frasco, bukas at handang tumanggap ng mga turista at investments ang Pilipinas para masolusyonan ang pagdapa ng ekonomiya.
Sinabi ni Frasco, isa na sa pagluwag ng polisiya ang opsiyonal na pagsusuot ng face mask sa indoor places.
Bukod pa dito, inalis na rin ang RT-PCR test requirements para sa mga hindi bakunadong dayuhan.
Layunin ng pamahalaan na mapagaan ang pag-biyahe ng mga turistang bumibisita o nagbabakasyon sa Pilipinas.
Sinabi pa ni Frasco, na kumpiyansa si Pangulong Ferdinand “Bongbong” Marcos Jr., na magbibigay ng dagdag na oportunidad sa mga Pilipino ang pagluluwag ng restriksiyon, at matutulungang makabangon ang naluging kabuhayan ng mga maliliit na negosyo bunsod ng Covid-19 pandemic.
Hinihintay nalang ng Department of Health (DOH) ang pagpapalabas ng Official Guidelines ng Malacanang hinggil sa boluntaryong pagsusuot ng face mask sa indoor places.
Ayon kay DOH Officer-in-Charge Maria Rosario Vergeire, nire-respeto ng kanilang ahensya ang desisyon ng Malacañang hinggil dito at naipaliwanag narin nila sa Inter-Agency Task Force (IATF) ang lahat ng maaaring maging senaryo sakaling ipatupad na ang nasabing kautusan.
Sa kabila nito, patuloy na hinihikayat ng opisyal ang publiko, na magsuot pa rin ng face mask, sundin ang social distancing, magpabakuna at panatilihing malinis sa pangangatawan dahil nananatili parin ang COVID-19 sa bansa.