HOT STORIES OF THE WEEK

Nagbukas ng hotline ang Department of Health o DOH para sa mga sumbong hinggil sa naging epekto ng anti-dengue vaccine na dengvaxia sa mga wala pang dengue subalit naturukan na nito.

Ito’y makaraang ihayag ng Volunteers Against Crime and Corruption o VACC na may tatlong kaso umano ng mga nabakunahan ng dengvaxia ang namatay dahil sa naturang gamot.

Ayon kay Health Spokesman Dr. Lyndon Lee Suy, iba ang ibig pakahulugan ng Sanofi sa salitang severe dengue na siyang epekto ng nasabing bakuna.

Gayunman, maaari aniyang tumawag lamang sa kanilang hotline na 711-1001 at 711-1002 tuwing office hours para maiulat sa kanila kung may mga insidente kaugnay nito.

Una nang sinabi ni Volunteers Against Crime and Corruption o VACC Founding Chairman Dante Jimenez na mahalaga sa kanilang makumpirma ang naturang impormasyon upang mahabol ang lahat ng mga dating opisyal ng gobyerno na sangkot sa pagbili ng multi-bilyong pisong halaga ng bakuna.

—-

Patuloy na binabantayan ng Department of Trade and Industry o DTI ang epektong dulot ng bird flu sa isang poultry farm sa Cabiao, Nueva Ecija noong isang linggo.

Ito’y kahit pa una nang sinabi ng Department of Agriculture o DA na kontrolado na nila ang kaso ng bird flu sa nasabing lugar.

Ayon kay DTI Undersecretary Ted Pascua, posible kasing makaapekto sa pagbaba ng presyo ng manok sa mga palengke ang naitalang kaso ng bird flu lalo’t mataas pa naman ang demand nito ngayong Kapaskuhan.

Batay sa pinakahuling monitoring ng DTI sa presyo ng manok, papalo na 130 hanggang 150 pesos ang kada kilo ng karne ng manok makaraang maiulat ang pito hanggang sampung pisong pagtaas sa presyo nito.

Maliban sa manok, posible ring tumaas ang presyo ng karne ng baboy sa mga susunod na araw bunsod din ng mataas na demand dito ngayong panahon ng Kapaskuhan.

—-

Dalawa (2) pang mahistrado at isang dating mahistrado ng Korte Suprema ang nakatakdang dumalo sa pagpapatuloy ng impeachment proceedings laban kay Supreme Court Chief Justice Maria Lourdes Sereno sa Disyembre 11.

Ipinabatid ito ni House Justice Committee Chair Reynaldo Umali matapos magpadala ng feelers para makasali sa pagdinig sina associate Justices Francis Jardeleza, Noel Tijam at dating Associate Justice Arturo Brion.

Sinabi ni Umali na babalik din sa Kamara para sa impeachment proceedings si Associate Justice Teresita De Castro na una nang tumestigo kaugnay sa aniya’y pagmamanipula ni Sereno sa ilang resolusyon ng Korte Suprema.

Una nang ibinunyag ni De Castro sa pagdinig ang pagbuo ni Sereno sa Judiciary Decentralized Office o JDO sa 7th Judicial Region sa pamamagitan ng isang administrative order na wala naman sa kapangyarihan ng Punong Mahistrado.

Isasailalim sa re – evaluation ng World Health Organization o WHO ang kaligtasan ng anti – dengue vaccine na ‘dengvaxia’ na gawa ng Sanofi Pasteur.

Kasunod na din ito ng pag – amin ng Sanofi na delikado ang nasabing bakuna sa mga hindi pa nagkakaroon ng dengue.

Ang full review ay nakatakdang isagawa ng Global Advisory Committee on Vaccine Safety at Strategic Advisory Group of Experts (SAGE) na siyang magpapalabas ng revised guidelines kaugnay sa paggamit ng dengvaxia.

Magugunitang sa lumabas na position paper ng WHO noong Hulyo 2016, conditional recommendation ang ibinigay nito para sa paggamit ng dengvaxia na anito’y dapat gamitin lamang sa mga lugar na may matinding kaso ng dengue.

Hindi na lamang nakatutok sa isyu sa transportasyon ang ginagawang pagkilos ng grupong Pinagkaisang Samahan ng mga Tsuper at Opereytor Nationwide o PISTON at No to Jeepney Phaseout Coalition.

Ito ang inihayag ng Land Transportation Franchising and Regulatory Board o LTFRB kasabay ng pagtitiyak na patuloy nilang imo-monitor ang PISTON bagama’t kinansela na nito ang nakatakda sana nilang malawakang tigil-pasada ngayong araw.

Ayon kay LTFRB Spokesperson Atty. Aileen Lizada, kasama na ng PISTON ang iba pang militanteng grupo tulad ng Gabriela, KMU at BAYAN kung saan kanilang inihahayag ang iba pang usapin sa bansa bukod sa jeepney phase out at modernization program.

Dagdag ni Lizada batay sa kanyang nakuhang impormasyon, tila hinihikayat na ni PISTON President George San Mateo ang publiko na mag-aklas laban kay Pangulong Rodrigo Duterte kapag hindi sila pinakinggan.

“If I’m not mistaken in the text message na we received na galing kay George San Mateo addressed to media, sinasabi po niya doon na pinapatigil nila ang PUJ modernization otherwise ito yung ibinigay sa akin, otherwise guguyurin nila ng mamamayan daw si President Duterte, so this is not anymore a transport issue, because they are now also building on peace and order, this is not proper so we need to be on top para ating i-monitor.” Pahayag ni Lizada

(Balitang Todong Lakas Interview)