HOT STORIES OF THE WEEK

Hindi tatantanan ng Malacañang ang mga nasa likod ng kontrobersiya hinggil sa pagpapatupad ng programang bakuna kontra dengue.

Ito’y makaraang isiwalat ng French Pharmaceutical Company na Sanofi Pasteur ang peligrong dulot ng naturang bakuna para sa mga taong hindi pa nagkakaroon ng sakit na dengue.

Ayon kay Presidential Spokesman Harry Roque, tiyak na mananagot ang sinumang dapat managot sa pangyayari lalo’t maituturing aniya itong genocide dahil sa dami ng mga buhay na tiyak malalagay sa peligro.

Bagama’t nauunawaan ng pamahalaan ang sentimiyento ng ilang magulang, nanawagan pa rin si Roque sa publiko na iwasang magpakalat ng mga maling impormasyon o balita hinggil sa usapin.

Sanofi and former government officials

Samantala, malaki ang kahaharaping pananagutan ng kumpaniyang Sanofi Pasteur, ang French pharmaceutical giant na manufacturer ng anti-dengue vaccine na dengvaxia.

Ito’y ayon kay Dr. Leo Olarte, dating Pangulo ng Philippine Medical Association o PMA ay dahil sa maituturing iyong kapabayaan at “medical malpractice” nang hindi agad nito isiwalat ang mga posibleng epekto ng naturang bakuna.

Magugunitang inihayag ng Sanofi na posibleng magdulot ng severe dengue ang isang taong nabakunahan subalit wala pang history ng pagkakasakit ng dengue.

Giit ni Olarte, hindi rin ligtas ang mga dating opisyal ng gobyerno partikular ng Department of Health o DOH sa mga maaaring kaharapin na kaso o reklamo.

Pero bago magsisihan, ipinunto ni Olarte na dapat munang tutukan ng mga awtoridad ang mahigit 700,000 mga batang binakunahan ng dengvaxia upang hindi na lumala ang nagbabadyang problema.

—-

Kasado na sa susunod na taon ang formal negotiations sa pagitan ng Pilipinas at China para plantsahin ang gusot hinggil sa agawan sa teritoryo sa West Philippine Sea.

Ayon kay Philippine Ambassador to China Chito Sta. Romana, umaasa ang dalawang panig na sa unang bahagi ng taong 2018 magaganap ang ikalawang bilateral consultative sa Pilipinas.

Orihinal anyang itinakda sana ngayong buwan ang pulong pero iniatras ito sa susunod na taon dahil sa hindi magkakatugmang schedule ng mga dadalong government official at diplomat mula sa dalawang bansa.

Magugunitang nagpulong ang dalawang panig sa China-Philippines Bilateral Consultation Mechanism on the South China Sea nitong buwan ng Mayo sa Guiyang, Guizhou Province, China.

—-

Hawak na ng Malacañang ang rekomendasyon ng Armed Forces of the Philippines o AFP kaugnay sa pagpapalawig ng pinaiiral na Martial Law sa Mindanao.

Ito’y bago tuluyang mapaso ang ipinasang extension ng dalawang kapulungan ng Kongreso sa ika-31 ng buwang kasalukuyan o katapusan ng taon.

Ayon kay Presidential Spokesman Harry Roque, isusumite na ng AFP kay Pangulong Rodrigo Duterte ang dokumento at inaasahang magsasagawa ng anunsyo ang Punong Ehekutibo ngayong araw.

Gayunman, nilinaw ni Roque na tanging si Pangulong Duterte lamang aniya ang may kapangyarihang magpasya kung ano ang magiging kapalaran ng kaniyang naunang deklarasyon na naglalayong supilin ang terorismo sa Mindanao.

—-

Posbileng magkaroon ng re-enacted budget para sa susunod na taon.

Ito ang nakikita ni House Speaker Pantaleon Alvarez matapos manindigang hindi nila papayagan ang nais ng Senado na baguhin nila ang kanilang bersyon ng General Appropriations Act o GAA.

Hindi magkasundo ang Kamara at Senado partikular sa pagtapyas sa halos 51 billion pesos na budget ng Department of Public Works and Highways o DPWH samantalang kinukuwestyon ng Kamara ang realignment ng Senado sa 900 million peso anti-drug campaign budget at 500 million pesos para sa drug program ng Department of Interior and Local Government o DILG.

Target ng Dalawang Kapulungan ng Kongreso na maipasa ang halos apat na trilyong pisong 2018 national budget bago mag-Pasko.

—-

Ipinatigil na ng Department of Health o DOH ang libreng pagbabakuna kontra dengue.

Ito ay matapos lumabas sa pag-aaral na posibleng magkaroon ng severe dengue ang mga tinurukan ng dengvaxia nang hindi pa nagkaka-dengue.

Ayon kay Health Secretary Francisco Duque III, nakatakda silang makipagpulong sa World Health Organization o WHO ukol dito.

Kasabay nito, nais din ng DOH na linawin ng pharmaceutical company na Sanofi kung ano ang ibig sabihin ng “severe dengue”

“Focusing on again, surveillance na talagang napaka-importante, monitoring, investigation and reporting.” Ani Duque

Sa kabila nito, pinawi ni Duque ang pangamba ng mga magulang ng mga batang nabakunahan na noon ng dengvaxia.

“Safe pa rin ang mga bakunang ito, huwag po kayong mangangamba ang DOH ay nasa ibabaw ng issues na ito.” Dagdag ni Duque

Ayon naman sa kay Dr. Benjamin Co ng Food and Drug Administration o FDA, hindi rin muna maaaring ibenta ang mga bakuna kontra dengue na nasa merkado na.

“Basta hindi lang nila puwedeng ibenta hanggang hindi napapalitan ang product information leaflet.” Pahayag naman ni Co

—-

Itinalaga na ni Pangulong Rodrigo Duterte bilang bagong Acting Secretary ng Department of Agrarian Reform o DAR si Interior and Local Government Undersecretary John Castriciones.

Si Castriciones ang kapalit ni dating DAR Secretary Rafael Mariano na hindi nakalusot sa makapangyarihang Commission on Appointments (CA) dahil sa kanya umanong kaugnayan sa Communist Party of the Philippines (CPP).

Alinsunod sa appointment papers, Disyembre 1 nagsimulang manungkulan si Castriciones.

Kabilang si Castriciones sa tatlong Undersecretaries na nasa likod umano ng pagpapatalsik kay dating Interior Secretary Mike Sueño.

Ipinagmalaki ni Pangulong Rodrigo Duterte na tanging siya at si dating Pangulong Ferdinand Marcos ang may malasakit sa mga sundalo.

Sa kanyang pagharap sa mga sundalo sa Camp Teodulfo Bautista sa Jolo, Sulu, inihayag ni Pangulong Duterte na patunay ng kanyang malasakit ay ang bonus ng mga sundalo at panibagong dagdag suweldo simula sa susunod na taon

Kasi ako bilib ako sa serbisyo ninyo. Saludo ako.

Never was a time na walang ibang… hindi ako nagyayabang, walang ibang presidente, dalawa lang… nakapag – bigay ng atensyon na kinakailangan para sa isang sundalo, ako lang pati si Marcos. Marcos was also a lover of soldiers. Kaya kita mo ‘yang increases ninyo, malapit naman ang Disyembre.

Gayunman, nagbabala ang Punong Ehekutibo sa mga magpe – prenda ng kanilang mga bonus sa mga loan shark o nagpapa – 5/6 ngayong magpa – Pasko.

Pero ‘yung iba ipagbili na siguro ninyo ‘yung sweldo, nandoon na sa 5/6. ‘Wag mong ibigay ‘yan doon, hidi ko ‘yan ibigay sa… hindi ko ‘yan ihulog sa ano… humanap ka ng paraan. Ang kikitain ng Pasko nito, ang yayaman ang 5/6.

Para sa pamilya ‘yan. Kung wala kang pamilya, ibigay sa Nanay.

Bukod sa bonus at dagdag suweldo, makatitikim din aniya ng bakasyon ang mga sundalo at Christmas party.

So, nandito ako to say Merry Christmas and for those who will be left behind during the holidays, skeletal lang siguro maiwan.

Kasi ‘yung maiwan, tiis lang kayo, Hong Kong ang price ninyo, basta magpa – iwan dito.