HOT STORIES OF THE WEEK

Binubuo na ng Philippine National Police o PNP ang guidelines na kanilang pagbabatayan sa pagpapatupad ng unilateral ceasefire sa Communist Party of the Philippines – New People’s Army (CPP–NPA).

Kasunod ito ng ideneklarang Suspension of Military Operations o SOMO ni Pangulong Rodrigo Duterte mula Disyembre 24 hanggang Enero 2 sa susunod na taon.

Ayon kay PNP Spokesperson Chief Superintendent Dionardo Carlos, oras na matapos na nila ang pagbalangkas sa nasabing guidelines ay agad na ipamamahagi ito sa lahat ng istasyon ng pulisya.

Samantala, sinabi naman ni Defense Secretary Delfin Lorenzana na wala talaga siyang planong irekumenda ang tigil putukan ngayong Kapaskuhan.

Gayunman, nagdeklara na aniya ang Pangulo kaya wala na siyang magagawa kundi sundin at ipatupad ito.

(Ulat ni Patrol 31 Jonathan Andal)

Nagdeklara na ng sampung araw na Suspension of Military Operations o SOMO si Pangulong Rodrigo Duterte para sa diwa ng Kapaskuhan.

Ayon kay Presidential Spokesperson Harry Roque, epektibo ang unilateral ceasefire sa Communist Party of the Philippines-New People’s Army o CPP-NPA simula sa Disyembre 24 hanggang Enero 2 sa susunod na taon.

Dagdag ni Roque, makababawas din sa agam agam ng publiko sa seguridad sa bansa ang ipatutupad na tigil opensiba ng tropa ng pamahalaan.

Umaasa naman ang Malacañang na magiging positibo ang tugon ng CPP-NPA at magdedeklara rin ito ng tigil putukan.

Gayundin, umaasa ang Malacañang na sa ganitong okasyon ay makikita ang pagkakaisa ng mga Pilipino bilang isang nasyon na naghahangad ng kapayapaan para sa bansa.

(Ulat ni Jopel Pelenio)

Patuloy na binabantayan ng Philippine Atmospheric Geophysical and Astronomical Services Administration o PAGASA ang sama ng panahon na kasalukuyang nasa labas pa ng Philippine Area of Responsibility o PAR.

Huli itong namataan sa layong 975 kilometro Silangan ng Mindanao.

Ayon sa PAGASA, inaasahang papasok sa teritoryo ng bansa ang bagyo ngayong umaga o hapon at papangalanang ‘Vinta’.

Ibinabala ng PAGASA na sa Biyernes posibleng mag-landfall ang bagyo sa bahagi ng Southern Mindanao at inaasahang lalakas pa ito at maging isang tropical storm pagpasok sa kalupaan ng bansa.

Pinapayuhan ng PAGASA ang publiko na manatiling nakaalerto at mag-antabay sa susunod na weather bulletin.

Sa ngayon ay apektado ng tail end of a cold front ang silangang bahagi ng Northern at Central Luzon habang apektado naman ng trough ng Low Pressure Area ang Silangang Mindanao na magdadala ng kalat-kalat ng mga pag-ulan sa mga nasabing lugar.

—-

Nakalabas na ng Philippine Area of Responsibility o PAR  ang bagyong Urduja batay sa pinakahuling ulat ng PAGASA ngayons alas-11:00 ng umaga.

Huling namataan ang bagyo sa layong 430 kilometro kanluran ng Puerto Princesa City, Palawan.

Taglay ng bagyo ang lakas ng hanging papalo sa 45 kilometro kada oras malapit sa gitna at pagbusgsong aabot sa 60 kilometro kada oras.

Kumikilos ito sa direksyong Kanluran Timog-Kanluran sa bilis na 18 kilometro kada oras.

Ayon sa PAGASA bagamat nakalabas na ng bansa ang bagyo ay asahan pa rin ang dala nitong mga pag-ulan sa bansa.

Inalis na ang Tropical Cyclone Warning Signal number 1 sa Palawan ngunit nananatiling mapanganib ayon sa PAGASA ang paglalayag sa western seaboard ng Palawan dahil na rin sa epekto ng northeast monsoon.

Samantala, patuloy na binabantayan ang Low Pressure Area o LPA sa labas ng PAR na huling namataan sa layong 1,395 kilometro Silangan ng Mindanao.

Cancelled flights

Samantala, bagamat inaasahang unti-unti nang gaganda ang panahon sa paglabas ng bagyo sa bansa, kanselado pa rin ang ilang flights ngayong araw.

Ayon sa Manila International Airport Authority o MIAA, apektado ng kanselasyon ang biyahe mula Maynila patungong Naga at pabalik ng Ceb Go.

Pinapayuhan naman ang mga apektadong pasahero na makipag-ugnayan sa airline company.

—-

Sisimulan nang talakayin sa senado ang panukalang Bangsamoro Basic Law o BBL na siyang inaasahang susi sa pagtatamo ng pangmatagalang kapayapaan sa rehiyon ng Mindanao.

Pagtitiyak ni Senate Committee on Local Government Vice Chairman Juan Miguel Zubiri, magiging komprehensibo at mabusisi ang isasagawa nilang mga pagdinig.

Iikot din sila sa ilang lalawigan na sakop ng Autonomous Region in Muslim Mindanao o ARMM na target ding masaklawan ng bubuoing bagong Bangsamoro Autonomous Government.

Magugunitang inihayag mismo ni Pangulong Rodrigo Duterte na nais niyang agarang maipasa ang BBL upang makamtan na ang kaunlaran at kapayapaan ng mga kababayang Bangsamoro.

—-