HOT STORIES OF THE WEEK

Nakahanda na ang buong pwersa ng Metropolitan Manila Development Authority o MMDA sa inaasahang Carmaggedon o napakatinding bigat sa daloy ng trapiko simula ngayong araw.

Ayon sa tala ng MMDA, inaasahang nasa humigit kumulang 400,000 sasakyan ang babaybay sa EDSA o 13 porsyentong mas mataas kumpara sa kaparehong araw na naitala noong nakaraang taon.

Kaugnay nito, nag-deploy na ng karagdagang mga traffic enforcers sa kahabaan ng EDSA at mga bus terminal partikular sa Pasay at Cubao para magmando ng trapiko.

Kasabay nanawagan ang MMDA sa mga motorista na iwasan muna ang EDSA ngayong weekend at maghanap na lang muna ng alternatibong ruta.

—-

Isang progresibo at payapang bansa ang hiling ni Pangulong Rodrigo Duterte para sa mga mamamayang Pilipino.

Ito ang mensahe ng Pangulo ngayong nalalapit na Kapaskuhan.

Maliban dito, hinikayat din ng Pangulo na alalahanin at ipanalangin ang mga nagsakripisyo ng buhay para sa bansa gaya ng mga bayani sa katatapos lamang na giyera sa Marawi City.

Samantala, binigyang pagkilala rin ng Pangulo ang sakripisyo ng mga kababayan nating Pilipino sa ibayong dagat na nalalayo sa kanilang mga pamilya para mabuhay.

“In the midst of all merriment, let us pause and remember our countrymen who have lost their lives fighting for the integrity of our country, and for those who lost their homes and loved ones in the recent war, those who are far from their families, and those who are not as fortunate and as blessed as most of us.

“Let us show our true compassion and include them in our supplications during the Yuletide season.” Bahagi ng mensahe ni Pangulong Duterte

—-

Hindi muli magsasagawa ng pagseselyo ng mga baril ang Philippine National Police o PNP ngayong Kapaskuhan at pagsalubong ng Bagong Taon.

Ayon kay PNP Spokesman Chief Superintendent Dionardo Carlos, noong nakaraang taon pa tinanggal ni PNP Chief Director General Ronald Dela Rosa ang nasabing tradisyon at hindi muli ito isasagawa ngayong taon.

Gayunman, tiniyak ni Carlos na mahigpit pa rin ang gagawing pagbabantay ng PNP para sa seguridad ng bansa ngayong holiday kasabay ng paglalatag ng Ligtas Paskuhan 2017.

“Duty po tayo, lahat ng pulis naka-duty, alas-5:00 ng hapon ng Disyembre 24 hanggang alas-5:00 ng umaga ng Disyembre 25, muling babalik ng alas-5:00 ng hapon ng Disyembre 31 at magtatapos ng alas-5:00 ng umaga ng January 1. Ito po yung pagbabantay ng lahat ng puwersa ng PNP para maiwasan ang paggamit ng paputok at illegal discharge of firearms.” Ani Carlos

on Reuters report

Samantala, kinuwestiyon ng PNP ang motibo sa pinalabas na special report ng international news agency na Reuters kung saan tinaguriang ang Quezon City Police District Station 6 bilang deadliest police station.

Ayon kay PNP Spokesman Chief Supt. Dionardo Carlos, walang binanggit at napatunayan nasabing sa special report hinggil sa ginawang paglabag ng mga pulis mula sa QCPD Station 6.

Iginiit din ni Carlos na hindi dapat direktang iugnay sa mga pulis na inilipat mula o malapit sa Davao City ang mataas na bilang ng napatay na drug suspects dahil regular na aktibidad aniya ng PNP ang magbalasa ng mga tauhan.

“I think ang importante diyan is you do a lot of analytics para makita natin kasi ang una nating tinitignan ay motibo, ano ang gusto nilang ibigay na impormasyon sa sinasabi nilang 4-month investigation, they should answer that. The transfer and reassignment is a regular activity of the PNP, what’s so special about it.” Pahayag ni Carlos

(Ratsada Balita Interview)

Tiniyak ni Senate Sub-Committee on the Bangsamoro Basic Law o BBL Chairman Migz Zubiri na aayon sa konstitusyon ang kanilang ipapasang BBL.

Kasabay ito ng pag-amin ni Zubiri na posibleng may kumuwestiyon sa ipapasa nilang BBL sa Korte Suprema.

Ayon kay Zubiri, sisiguraduhin nilang lahat ng lalamaning probisyon ng BBL ay alinsunod sa konstitusyon para hindi na rin sila mapahiya kung may kukuwestiyon dito.

Kasabay nito, ipinaliwanag ni Zubiri ang kanilang gagawing marathon hearing sa BBL para makamit ang target na maipasa ito sa Marso ng susunod na taon.

(Ulat ni Cely Bueno)

Opisyal nang idineklara ng Department of National Defense o DND ang ipatutupad na unilateral ceasefire ng Armed Forces of the Philippines o AFP sa Communist Party of the Philippines-New People’s Army o CPP-NPA.

Sa anunsyo ni DND Spokesman Arsenio Andolong, epektibo ang unilateral ceasefire mula alas-6:00 ng gabi ng December 23 hanggang alas-6:00 ng gabi ng December 26.

Gayundin mula alas-6:00 ng gabi ng December 30 hanggang alas-6:00 ng gabi ng January 2 ng susunod na taon.

Sinabi pa ni Andolong, bagama’t may ceasefire inaatasan pa rin ang lahat ng mga sundalo na manatiling mapagbantay at tiyakin ang kanilang kaligtasan.

Kasabay nito, hinimok din ng DND ang CPP-NPA na magmuni-muni at pag-isipan ang pagbabalik loob sa pamahalaan habang pinaiiral ang unilateral ceasefire.

(Ulat ni Jonathan Andal)